Música y escritora, debuta cola llingua n’una novela qu’axunta les aventures piquiñines’ de les sos andances pol conceyu de Piloña. LNE /
María José posa cola so nueva novela y l’Urogallo del Centru Asturianu de Madrid
Presentó la so primer novela n’asturianu, «Nun horru al debalu» (Editorial Cuatro Gotes), nel pabellón «Iniciativa pol asturianu» y de la mano del so hermanu, el gaiteru José Ángel Hevia.
A la feria llevólu un horru al aviesu, el de la so primer novela n’asturianu. Un horru que llexa sobro les agües, colos pegollos pates arriba, nun mar ensin horizonte. Nél viaxa María José Hevia, la protagonista d’un relatu que surdió mientres la pandemia y col que, con esa trama tan estravagante como escusa, recueye un bon recímanu d’anécdotes socedíes mientres aquel tiempu tan estrañu, mientres les sos andances pol conceyu de Piloña partiendo’l corréu.
Nun ye’l primer llibru de María José, nin la so primer novela. Con estudios en Marina Mercante, va años quedó finalista nel Premiu Lliterariu Nostromo, entamáu pola Asociación Amigos de Nostromo y el Museu Marítimu de Barcelona. Allegó naquella ocasión con una narración de temática náutica y en castellán. Y siguió escribiendo en castellán, hasta que na pandemia dio’l saltu al asturianu.
«Nun horru al debalu» retoma l’ambiente marítimo d’aquellos entamos, pero en tonu surrealista, quiciabes debedor de l’atmósfera del tiempu nel que foi escritu. María José, percusionista y miembru de la banda del so hermanu, recuerda aquella dómina: «Nun había xires nin conciertos, non podía tocase; taba aforfugada y busqué un trabayu en Correos, en Piloña». Ella, que nació en Villaviciosa y que les sos raigaños familiares fundinse en Cabranes, d’onde yeren los sos güelos, diz qu’aquella esperiencia sirviólu pa reconectar colo rural. D’andar con vecinos y colos «neorrurales», cola xente mayor de los pueblos, porque neños y mozos confirma qu’hai pocos, sacó un bon puñáu d’hestories.
«Siempres me pasaben aventures piquiñines», cuenta, y con toes elles fixo un llibru, con un argumentu insólitu. «La protagonista, que soi yo, espierta nun horru pegollos enriba, metanes la mar; na mar atopo con náufragos, que son xente de la mio vida, la mio güela… Y voi cuntándo-yos aquelles hestories piquiñines», rellata. La hestoria avanza escontra’l futuru, con María José compartiendo esa rara aventura coles sos sobrines: «A elles cúntolos como apaecí nun horru».
Na novela fala colos horros y colos perros, tou frutu de la soledá na que s’embarca ensin pretendelo, y na so novela, diz, hai ciertu aliendu d’esa soledá de los pueblos, deshabitaos, ensin apenes xente, que se tán convirtiendo en museos arqueolóxicos». Si hai que busca-y una intención diz que sería la de sirvir de «aponderamientu del mundu rural».
La novela tien un aire señardoso, almite la so autora, pero tamién ta trescalada del optimismu y la sabiduría de los pueblos. Pesa muncho nella l’alcordanza de la güela Carmen y el convencimientu de que na vida «somos como eses algues que paecen llexar soles nel mar, y que depués tán arrodiaes de más algues; pos garré nós».
Acabante presentar la so primer novela n’asturianu María José confirma que, con horru o ensin él, tien la intención de siguir saleando peles agües de la lliteratura y yá empezó a escribir una novela negra, agora en castellán.
El 4 d’agostu presento la mio primer novela, n’asturianu. A les 17:30 en La Feria d’Amueses De Xixón. Y a les 19:30, el Centru Asturianu de Madrid va apurrime un Urogallo Especial. ¡Día completu!.Maria José Hevia Velasco
