L’Autoridá Portuaria instala nel puertu Deportivu paneles coles indicaciones a siguir en casu de qu’estos mamíferos acompañen la to travesía. El Comercio
Asitiáronse nel puertu Deportivu de Xixón unos paneles informativos sollertando de la gran biodiversidá qu’escuenden estes agües. La tabla amuesa les sanciones, les prohibiciones específiques y los pasos a siguir en casu d’atopar cetáceos (delfines y orques, principalmente) mientres una travesía pel mar Cantábricu.
Queda prohibíu averase a menos de 500 metros de los cetáceos con cualquier tipu d’embarcación. Para les persones ensin barcu tamién ta prohibíu’l contactu físicu con estos mamíferos, pudiendo buciar o nadar a una distancia mínima de 60 metros.
En casu d’atopase a un delfín a menos de 500 metros, la embarcación tendrá de caltener la velocidá y l’aldu. Sicasí, si’l cetáceu pertenez a otra especie, la embarcación tendrá d’esviar la so trayectoria ensin cambeos sópitos de velocidá o d’aldu. Y, si’l cetáceu apaez mui cerca, tien de ponese la embarcación en puntu muertu y, si fuera necesariu, detenela.
Ente otres prohibiciones, destaquen torgar el movimientu de los cetáceos o interponese nun grupu, producir soníos fuertes pa llamar la so atención y refundiar cualquier oxetu, borrafa o alimentu pa los animales. En resume, ta prohibíu causa-yos cualquier molestia.
Acordies con la Llei 42/2007 del patrimoniu natural y la biodiversidá y el Real Decreto 1727/2007 sobro midíes de protección de los cetáceos, l’incumplimientu d’estes normes trai la penalización económica con multes que bazcuyen ente los 100 y los 2 millones d’euros.
