RTPA / Actualidá / La nueva Llei d’Infancia del Principáu refuerza los derechos, la participación y la protección de menores y adolescentes. El testu da más voz a neñes y neños na vida pública y dexa que mayores de 16 años suscriban iniciatives lexislatives populares. La nueva Llei d’Infancia y Adolescencia, aprobada güei pola Xunta Xeneral del Principáu, supon la mayor actualización del sistema asturianu de protección a la infancia nes postreres trés décades.
Nerea Monroy, conseyera de Derechos Sociales: “Esta lexislación supon un compromisu colectivu col presente y el futuru d’Asturies”. La norma impulsa la prevención, el sofitu a les families y la coordinación ente alministraciones pa garantizar redolaes segures y llibres de violencia.
La norma sustitúi a la lexislación vixente dende 1995 y afai el marcu autonómicu a los cambeos social y normativu producíos dende entós. Nesti sentíu, incorpora les meyores impulsaes pola lexislación estatal y los nuevos desafíos rellacionaos cola salú mental, la violencia contra la infancia y l’adolescencia, la igualdá d’oportunidaes y la protección na redolada dixital.
El testu asitia a les persones menores d’edá nel centru de les polítiques públiques como ciudadanos y ciudadanes de plenu derechu, fortalez les garantíes de protección y consolida un modelu basáu na prevención, el bon tratu y l’interés cimeru de la infancia. Amás, amplía los mecanismos de participación na vida pública.
Ente otres novedaes, establez que les persones mayores de 16 años van poder suscribir iniciatives lexislatives populares, impulsa la creación de conseyos de participación infantil en tolos conceyos y obliga a que los proyectos normativos incorporen un informe d’impactu sobro la infancia y l’adolescencia.
La conseyera de Derechos Sociales y Bienestar, Nerea Monroy, destacó que l’aprobación de la llei representa «un compromisu colectivu col presente y el futuru d’Asturies». «Los neños y neñes de güei van ser tamién quien van construyir el futuru d’Asturies, polo que tenemos de garantiza-yos más derechos, meyor protección frente a cualquier forma de violencia y una participación real nes decisiones que los afecten», señaló.
La llei impulsa programes de parentalidad positiva, servicios de mediación familiar y actuaciones de sofitu a les families pa detectar de forma temprana situaciones de vulnerabilidá y evitar que desagüen n’escenarios de desprotección más graves.
Coles mesmes, refuerza la coordinación ente los servicios sociales, los sistemes educativu y sanitariu, les entidaes locales, les fuerces y cuerpos de seguridá y les organizaciones sociales, col fin d’ameyorar la detección y la respuesta énte cualquier forma de violencia contra la infancia y l’adolescencia.
Nesti ámbitu, preve’l desenvolvimientu de protocolos específicos frente al maltratu, l’acoso escolar, el ciberacoso, la violencia de xéneru, les autolesiones o’l suicidiu.
Otra de les novedaes destacaes de la llei ye la incorporación de midíes específiques de protección na redolada dixital. Asina, la norma contempla campañes d’información y sensibilización empobinaes a menores, families y profesionales pa fomentar un usu seguro y responsable d’internet y de les redes sociales.
El testu tamién fortalez l’acoyimientu familiar como midida preferente de protección cuando resulte compatible col interés cimeru de cada menor. Pa ello, regula de forma detallada la formación y l’acompañamientu de les families atopadices, establez sofitos económicos destinaos a atender les necesidaes de los menores y potencia l’acoyimientu na redolada familiar y afeutivo más próximu.
Igualmente, la norma empresta atención específica a moces qu’abandonen el sistema de protección. Los programes de preparación pa la vida independiente y de transición a la vida adulta van incluyir actuaciones de formación, sofitu psicolóxicu, orientación llaboral, asesoramientu xurídicu y accesu a recursos de vivienda, con acompañamientu hasta los 26 años nos casos qu’asina lo riquir.
Con esta llei, el Gobiernu d’Asturies actualiza’l marcu de protección de la infancia y l’adolescencia pa dar respuesta a los desafíos actuales y consolidar un sistema basáu nos derechos, la prevención, el bon tratu y la protección integral de neños, neñes y adolescentes.