Educación quier blindar la seguridá de los profesores asturianos: tutoríes so supervisión, sofitu emocional y asesoramientu xurídicu gratuitu. El Principáu sorraya la considerancia d’autoridá pública del docente y les posibles consecuencies llegales de faltes de respetu graves. Actualidá / LNE
Según un informe de la confederación de sindicatos d’enseñanza STEs (na que s’engloba l’asturianu SUATEA), el 79,13% de los profesores asturianos reconocen vivir so un clima de conflictividá nes sos aules. Una realidá pola que la conseyera d’Educación, Eva Ledo, reconoció «sentise esmolecida» magar, dixo que se trata de casos aisllaos». Por ello’l so departamentu trabaya para amenorgar la violencia nos centros. Un trabayu que se materializa agora n’una batería de midíes para reforzar la protección del profesoráu.
D’esta forma, Educación va publicar guíes con pautes d’intervención énte distintes situaciones cotidianes, amás de reforzar el papel del Serviciu d’Inspección Educativa (SIE) como canal d’asesoramientu permanente del personal docente. Sorrayen, dende l’alministración, que «el profesoráu tien considerancia d’autoridá pública nel exerciciu de les sos funciones» polo que les faltes de respetu grave pueden tener consecuencies llegales. Amás, en casu de qu’haya denuncies contra un docente, este va poder solicita-y al Principáu asesoría xurídica.
Coles nueves normes, la Conseyería quier dexar claro qu’énte situaciones violentes, «va prevalecer en tou momentu la protección del docente» y van evitase los contactos directos ya informales que puedan xenerar tensión». Por eso, cuando un profesor tenga una tutoría con persones qu’amosaren conductes desavenientes (magar nun especifiquen de qué se trata) nun se van deber realizar en solitariu, sinón en compañía d’un miembru del equipu directivu, preferiblemente el xefe d’estudios o director. Anque, pa nun llegar a esi puntu, la canal de comunicación prioritariu coles families va ser el corréu electrónicu.
Coles mesmes, espliquen, los equipos directivos van ufiertar «sofitu emocional» a los profesores énte incidentes graves. Tamién van cuntar col respaldu del Serviciu de Relaciones Llaborales de la conseyería, si la situación llegara a afectar a la so salú.
Otra de les guíes previstes pola conseyería van establecer pautes d’actuación pa los equipos directivos coles persones qu’exercen la tutoría mandar del alumnáu o nos casos de families separaes. Tamién van ufiertar orientación en cuestiones rellacionaes col bienestar emocional.
Unu de los asuntos qu’esmolecen a los equipos directivos ye l’accesu a les cortiles escolares. Nesti sentíu, el Principáu peracaba xuna guía na que recuerda que los centros educativos nun son espacios públicos de llibre tránsitu, sinón llugares acutaos puramente a profesoráu, alumnáu y personal llaboral non docente, que tienen de salvaguardar la seguridá de los menores. Arriendes d’ello, les demás persones, incluyíes les families del alumnáu, solo van poder aportar al traviés de los calces establecíos y siguiendo les instrucciones del equipu directivu.
En casu d’incumplimientu d’eses normes, la dirección del centru va poder llamar a los cuerpos y fuerces de seguridá pa caltener l’orde públicu.
