Los tres asturianos del cruceru nun presenten síntomes y tán consideraos contactos «non estrechos».
La conseyera de Salú, Concepción Saavedra, treslladó esti miércoles un mensaxe de «tranquilidá» al respective de la situación de los tres asturianos que tán nel cruceru aislláu por hantavirus porque’l Gobiernu asturianu ta «preparáu» pa la so atención en casu de que seya necesario.
Saavedra, que fixo estes declaraciones nel Centru de Salú Severo Ochoa na presentación de l’ampliación del axente virtual NOAH pa la xestión de cites en primaria, apuntó que los tres asturianos a bordu tán «nuna bona situación clínica» y «ensin sintomatoloxía», y tán n’aisllamientu dende principios de mes.
La conseyera indicó que’l Principáu caltiénse a la espera de ser informáu del protocolu a siguir una vez que’l pasaxe puea desembarcar.
Saavedra garantizó que, en virtú de la esperiencia garrada na pandemia de coronavirus y otres situaciones, Asturies ta «preparada» pa l’atención d’estos pacientes, siempres «a la mira de que digan qué va soceder y cuál va ser el protocolu».
Sobre esti asuntu pronuncióse tamién la vicepresidenta del Principáu, Gimena Llamedo, quien sorrayó que’l Gobiernu asturianu ta a disposición de les families.
