Vivir solo yá ye la opción mayoritaria en 68 de los 78 conceyos d’Asturies.
Nueve de cada diez llares de la comunidá son de nacionalidá española, concentrándose la mayor tasa de residentes estranxeros en Cabranes.
Los llares formaos por una sola persona son una realidá cada vez más común n’Asturies. Y amás estiéndese de forma xeneralizada tanto peles principales árees urbanes de la comunidá como pelos conceyos de monte. Trátase tamién d’un fenómenu marcáu pol avieyamientu: a partir de determinada edá, concretamente al superar los 65 años, la inmensa mayoría d’estes viviendes unipersonales correspuenden a muyeres que viven soles.
Asina lu revelen los últimos datos del informe Llares 2025, publicáu pola Sociedá Asturiana d’Estudios Económicos y Industriales (SADEI) a partir de la base de la Población Residente de Referencia. Acordies con esti análisis, les viviendes habitaes por un únicu individuu son yá’l modelu residencial más frecuente d’Asturies, y suponen yá’l 34% del conxuntu de llares asturianos.
Los llares unipersonales son los más comunes en 68 de los 78 conceyos asturianos, superando a cualquier otra estructura familiar. Nos otros diez conceyos, los llares de dos miembros son llixeramente cimeros. La composición interna d’estos llares varia de manera notable en función de la edá y del sexu de les sos ocupantes.
Nel tramu d’edá entendíu ente los 0 y los 64 años, la presencia masculina ye mayoritaria, contabilizándose 44.717 homes frente a 36.275 muyeres.
Sicasí, a partir de los 65 años l’enclín inviértese con contundencia debíu a una mayor llonxevidá femenina: rexístrense 50.650 muyeres vivendo soles frente a 22.038 homes, una cifra que más que dobla a la masculina y que nos dos conceyos más populosos, Xixón y Uviéu, llega prácticamente a triplicala.
La escepción a esti patrón xeneral alcuéntrase en 15 conceyos de monte, onde los homes siguen siendo mayoría nos llares unipersonales a cualquier edá, llegando a superar el 70% del total en casos como Ponga y Pezós.
Lo cierto ye que la puxanza de llares habitaos por una sola persona dase al par qu’una perda de los venceyos comunitarios cotidianos. Los datos del Indicador Multidimensional de calidá de Vida (IMCV), ellaboráu pol Institutu Nacional d’Estadística (INE), reflexen un progresivu debilitamientu del texíu interpersonal nel Principáu. Magar los asturianos declaren un prestu apreciable col tiempu llibre disponible, puntuada con un 6,7 sobre 10, la frecuencia cola que caltienen alcuentros presenciales con amigos, familiares o compañeros de trabayu baxó de forma siguida en comparanza cola década pasada. Esta reducción del contactu cola redolada relacional asitia al ámbitu d’ociu y relaciones sociales como la dimensión con peor valoración de tol perfil asturianu nel índiz del INE.
Cómo son los llares n’Asturies. En términos xenerales, el volume global de llares n’Asturies xubía a 448.492 a 1 de xineru del 2025, con un tamañu mediu rexonal de 2,23 persones per llar. La distribución espacial respuende a la repartida poblacional, concentrándose’l 56% de toles viviendes en trés conceyos urbanos: Xixón (120.992 llares), Uviéu (96.485) y Avilés (33.872).
Atendiendo a la media de convivientes por vivienda, esisten notables diferencies xeográfiques ente conceyos. Los valores promediu más elevaos alcuéntrense na nala occidental y l’área central: Coaña rexistra la cifra más alta con 2,58 persones, siguida d’El Franco con 2,53, y de Llanera y Navia, dambos con un promediu de 2,44 miembros. Otra manera, un total de 14 conceyos asítiase con valores medios per debaxo de los dos habitantes por llar.
Les medies más baxes de la comunidá correspuenden a Pezós, con 1,73 persones per vivienda, Quirós, con 1,77, y Eilao, con 1,82. Nel cómputu global asturianu, tres del 34% de llares unipersonales, allúguense los de dos persones (31%), trés (19%), cuatro (11%), cinco (3%) y seis o más integrantes (2%). Pese al predominiu de les viviendes unipersonales en númberu d’unidaes, la mayor parte de los ciudadanos mora en llares de dos persones (28% de la población), siguíos de los de trés (26%) y cuatro miembros (19%).
Respectu al orixe y la nacionalidá de los miembros qu’integren cada unidá familiar, el 92% de los llares asturianos ta compuestu na so totalidá por persones con nacionalidá española. Nel porcentaxe restante onde convive población forana, estrémense dos realidaes: los llares mistos, integraos por persones españoles y estranxeres, que representen el 4,69%, y los formaos puramente por ciudadanos estranxeros, que suponen el 2,79%. Esta prevalencia de los llares mistos sobre los puramente estranxeros reproduzse na casi totalidá del territoriu rexonal, salvu en 11 conceyos d’escasa población.
Los conceyos que presenten un mayor pesu relativu de viviendes con presencia de persones estranxeres son Cabranes, onde algamen el 14,07%, Cangues d’Onís, con un 10,72%, y Uviéu, con un 10,28%, asitiándose la capital de la mesma como’l conceyu col mayor volume absolutu d’estos llares. Nel estremu opuestu, les menores proporciones de residencies con población estranxera rexístrense en Yernes y Tameza, con un 1,47%, Peñamellera Alta, con un 2,44%, y Illas, con un 2,48%.
. N’Asturies, les postreres estadístiques oficiales dibuxen el mapa d’un parque residencial de casi 686.000 viviendes, colos precios de compraventa en máximos de los últimos años, una actividá constructora que repica y diferencies importantes ente’l númberu de cases esistentes, les que se vienden y les que s’incorporen al mercáu.
Asturies cuntaba con 685.892 viviendes nel 2025, según la última estimación del parque residencial del Ministeriu de Vivienda y Axenda Urbana. La cifra, que creció un 0,3% respectu al añu anterior, ufierta la referencia más recién sobre’l tamañu del conxuntu de viviendes de la comunidá. Nun indica, sicasí, cuántes tán ocupaes davezu, cuántes s’utilicen como segunda residencia o cuántes tán disponibles pa mercar o arrendar. Pa conocer l’usu de los inmuebles hai que recular hasta’l Censu de Población y Viviendes del 2021. L’Institutu Nacional d’Estadística contabilizó entós 674.342 viviendes n’Asturies, de les que 100.646 fueron clasificaes como vacíes y otres 77.587 como viviendes d’usu esporádicu.

