Un centenar de texedores, bordadores, costureres y crocheteres nel Muséu del Pueblu d’Asturies. L’alcuentru ta entamáu pola asociación ‘Atrévete’ y l’influencer Diego Varela.
En Xixón, alcuentru d’un centenar de texedores, bordadores, costureres y crocheteres de toa Asturies. L’alcuentru entámalu l’asociación de Muyeres Emprendedores ‘Atrévete’, en collaboración col influencer y espertu en crochet Diego Varela. Llévase alantre, hasta esta tarde, nel Muséu del Pueblu d’Asturies. Una ocasión pa compartir esperiencies y técniques, y tamién pa deprender. Hai talleres amás pa esplorar, por exemplu, el valor terapéuticu d’estos llabores.
