Publicado en TIEMPU

Estáu del tiempu n’Asturies: domingu 4

  • Alborecemos col cielu nuboso y precipitaciones fuertes ente Cuideiru y Navia ya ente Xixón y Llanes, dempués d’una nueche pasada per agua con más de 100l m2 en puntos del llitoral asturianu, cantidaes muncho más discretes nel interior con unes temperatures que tan alrodiu de los 16ºC, rexistrándose nel puirtu Payares 9,6ºC.
  • Güei seguiremos con xarabatos y bastiazos durante la mañana que puen ser llocalmente fuertes o mui fuertes, sobre too nel llitoral de la fastera centru-ocidental d’Asturies, na metá sur sedrán poco probables con tendencia a remitir y desaparecer durante la tarde con unes temperatures en descensu ya col aire que sedrá sele ya variable en xeneral.

  • Mañana llunes tendremos un día muncho más seliquino con apertura de grandes claros o abancios durante’l día y ascensu de les temperatures.
  • El martes va dir empeorando’l tiempu cola llegada d’un frente pela tarde que mos dexará precipitaciones xeneralizaes al atapecer con unes temperatures que van camudar poco o descenderán llixeramente.
  • El miércoles dempués d’una mañana seliquina cola apertura de dalgún claru o abanciu, la irrupción de vientu de componente norte pela tarde, va empobinanos xarabatos frecuentes ya intensos qu’amás van ser xeneralizaos en toa Asturies con un descensu nes temperatures y vientu de norte-noroeste que pue soplar con raches fuertes en zones de montaña ya en puntos del llitoral.
  • El xueves vamos seguir con xarabatos pela mañana pero con tendencia a dir remitiendo y dir ganando terrén les altes presiones.
  • Paez que la fin de selmana va tar más estable’l tiempu ya tendremos nel cielu nubes ya claros con unes temperatures alcordes coles feches nes que mos atopamos.

 

Autor:

Maestra de Llingua Asturiana Colexu Carmen Ruiz-Tilve - Uviéu