La Agencia Estatal de Meteorología tien activos n’Asturies avisos de nivel naranxa y mariellos por altes temperatures que podríen llegar a los 40 graos. Tamién hai un avisu mariellu por nubes nel suroccidente. Avisos actualizaos na web d’AEMET: https://aemet.es/es/eltiempo/prediccion/avisos?k=ast
- Alborecemos col cielu poco nuboso o escampláu, sicasí hai dalgo de nublina pela costa y restos de nubes de desendolque na fastera más surocidental, con unes temperatures altes perriba de los 21ºC, dalgo menos na costa, rexistrándose nel puirtu Payares 23,7ºC. por tantu nueche tropical na mayor parte d’Asturies.
- Güei vamos sufrir otra vegada temperatures mui altes con másimes perriba de los 35ºC, ayeri volvió a superase’l récord de temperatura másima pa un mes de xunu n’Uviéu, con una másima de 37,8ºC, sicasí na primer llinea de costa va tar más afayaizu por mor de les brises costeres y se quedarán con másimes alrodiu de los 30ºC. El cielu tará poco nuboso en xeneral con dalgo de calima.
- L’otru día mos entrugaba Severino Cuervo Alvarez pol ascensu súbito de les temperatures durante la truena del riscar del llunes, algamándose n’Uviéu los 33ºC a les tres de la mañana, esti eventu nomase «reventón de calor» y ye un fenómeno meteorolóxico estremu qu’ocurre cuando una masa d’aire mui caliente y seca desciende de sópitu dende una nube de tormenta. Al chocar escontra’l suelu, s’espande horizontalmente, provocando un aumentu drásticu ya repentinu de la temperatura, vientos furacanaos ya un desplome de la humedá en cuestión de minutos.
- Mañana xueves descensu bultable de les temperatures, yá con másimes alrodiu de los 25ºC, seguiremos viendo’l sol y l’ambiente sedrá muncho más afayaizu.
- El vienres tornen a subir les temperatures que mos dexará un ambiente más chornosu col cielu poco nuboso en xeneral.
- El sábadu seguirá soleyeru con un descensu llixeru de les temperatures y el domingu aumentará la nubosidá ya tendremos precipitaciones febles en forma d’orpín al finar el día con un descensu nidiu de les temperatures.
Una dana nel Atlánticu foi la responsable d’impulsar aire templao escontra la península, y arriendes d’ello, de la fola de calor que güei va llegar al so fin. Esti episodiu dexó valores de récord en valores de temperatures mínimes y tamién máximes, según la temperatura medio d’ayeri coronó’l día de xunu más templáu desque hai rexistros.
El fuerte solazu, xunida al pasu del centru d’aire frío n’altor, crean l’escenariu aparente pa la formación de núcleos tormentosos, capaces de dexar agües intenses y dir acompañaos de fuertes raches de vientu y xarazo.
