Muyer, Vuelta ciclista y L’Angliru, 12,5 kilómetros pa llegar a una cume que paecía reservada pa ellos hasta agora, porque pedaliar hasta La Cuesta les Cabanes ye tan duro como la ‘muria’ invisible de los trabayos non remuneraos y porque cada curva hasta Purció queda curtia comparada col 29% de fendidura nes pensiones.
Quiciabes haya avituallamientu en L’Angliru y resistiremos a comer el 17% de ‘desigualdá nel poder’ o la precariedá llaboral de Les Picones. Fadremos un sprint hasta’l ruempepiernes de Cobayos peleando escontra l’acosu en redes sociales que sufre’l 13,7% de les moces. La páxara llegará, ensin dulda a 872 metros, en Xonceo.
Y cola cume tres la ñublina intentaremos atacar dando zapata dando tira: ‘Más mecha que mieu: ¡da-y p’arriba!’. Y cruzaremos la meta. Y nun lo fadremos soles, porque na Cuenca y oxalá en tol mundu repetiráse: ‘Si sube una subimos toes’. Somos Brigada.
