Publicado en Pueblos, Reconocimientu

Cuideiru acaba de consiguir daqué importante

Esti pueblu d’Asturies, Cuideiru, acaba de consiguir daqué que bien pocos puen presumir n’España. Mi Oviedo

La so presencia ente los seis primeros puestos de la clasificación del 2026 refuerza la so proyección como destín turísticu.


Cuideiru vuelve asitiase nel escaparate del turismu nacional. La localidá asturiana consiguió facese un güecu ente los destinos rurales más populares del país al algamar la sesta posición na clasificación de los pueblos más visitaos del 2026 de l’Asociación Los Pueblos Más Guapos d’España.

Una reconocencia que refuerza l’encantu turísticu d’esta villa marinera, conocida poles sos cases de colores, les sos cais empinaes y la so característica disposición en forma d’anfiteatru frente al mar Cantábricu.

El conceyu ye, amás, l’únicu representante d’Asturies ente los diez primeros puestos d’una clasificación qu’axunta dalgunos de los enclaves más emblemáticos del territoriu nacional. La so presencia supón un nuevu escaparate pa una localidá que convirtió’l so patrimoniu marineru, la so gastronomía y el so paisaxe nes sos principales señes d’identidá.

El ranking ta encabezáu per Santillana del Mar, en Cantabria, que se proclama como’l pueblu más visitáu de la rede mientres anguaño. Síguenlu Comillas, tamién en Cantabria, y Albarracín, na provincia de Teruel. La cuarta posición correspuende a Potes, nuevamente en territoriu cántabru, ente que Peñíscola, en Castellón, ocupa’l quintu llugar, darréu per delantre de Cuideiru.

Per detrás de la localidá asturiana apaecen Chinchón, en Madrid; Lerma, en Burgos; Aínsa, n’Huesca; y El Banzáu, en Salamanca, que completa los diez primeros puestos.

Una reconocencia basada nes visites de los viaxeros. La clasificación ellaboróse a partir de los datos arrexuntaos pola aplicación oficial de l’Asociación Los Pueblos Más Guapos d’España mientres el periodu entendíu ente’l 1 d’ochobre del 2025 y el 30 de setiembre del 2026.

El sistema contabiliza tanto les visites detectaes cuando los usuarios lleguen a cada localidá como aquelles que los mesmos viaxeros rexistren manualmente al traviés de l’aplicación.

Sicasí, l’asociación introduz una precisión importante: estos resultaos nun representen el númberu total de turistes que recibe cada conceyu, sinón namás les visites rexistraes per aciu esta ferramienta dixital. Poro, el sestu puestu de Cuideiru reflexa la so popularidá ente los usuarios de l’aplicación, pero nun constitúi una midida refecha de tola so actividá turística.

La entidá tamién estrema esti llistáu del correspondiente a los pueblos meyor valoraos, que s’igua a partir de les puntuaciones otorgaes polos visitantes.

Cuideiru, un escaparate turísticu p’Asturies. La reconocencia vuelve poner el focu sobre ún de los paisaxes más reconocibles de la mariña asturiana. El puertu pesqueru, les viviendes gradiaes sobre la fastera y los sos miradores formen parte d’una estampa qu’atrai cada añu a numberosos visitantes.

La distinción tamién va tener continuidá nos próximos meses. Santillana del Mar recibió oficialmente la reconocencia como Pueblu Más Visitáu del 2026 mientres la cena de gala de la XIV Asamblea Nacional de l’asociación, celebrada’l pasáu 24 d’ochobre en Alcúdia, Mallorca.

Amás, los pueblos distinguíos van recibir una nueva reconocencia mientres FITUR 2027, la Feria Internacional de Turismu que se va celebrar en Madrid, onde Cuideiru va tener otra oportunidá de proyectar la so imaxe énte’l sector turísticu nacional y internacional.

Asina, la villa pixueta cierra esta reconocencia del 2026 con una posición destacada dientro d’una rede qu’agrupa dalgunos de los destinos más singulares d’España y col méritu añedíu de ser la única localidá asturiana que figura ente les diez más visitaes de la clasificación.

Autor:

Maestra de Llingua Asturiana Colexu Carmen Ruiz-Tilve - Uviéu