‘Oxetivu Chupu’ vuelve a Xixón para averar el teatru a los más pequenos. El festival va celebrar la so XIV edición del 16 al 31 d’ochobre nel Espaciu Escénicu El Güertu con cuatro espectáculos y dos talleres empobinaos a la primer infancia. El Comercio
El teatru, la danza, los títeres y el xuegu volverán atopase colos espectadores más pequenos en Xixón. L’Espaciu Escénicu El Güertu va celebrase del 16 al 31 d’ochobre la XIV edición de ‘Oxetivu Chupu’, el Festival d’Artes Escéniques para Primer Infancia. Anguaño inaugúrase col innovador taller destináu a padres, madres y docentes coles mires d’averase al teatru en familia y el so valor na educación.
«El festival ye una esperiencia para enfusase nel mundu de la creación y de les emociones dende la redolada familiar nun ambiente íntimo y cercano», declaren Estrella García y Miguel Quiroga, codirectores de la cita. Los responsables recuerden que la primer infancia, que va dende los cero hasta los cinco años, «ye la edá na que somos una fueya en blancu, una edá-llaboratoriu na que tou ta por afayar. La edá na que tou ye posible y les llendes nun esisten».
La cita va cuntar esta edición con cuatro espectáculos y dos talleres al cargu de la compañía asturiana Zig Zag Danza, la gallega Caramuxo Teatru, la madrilana Tarambana y la catalana Teatre Nu. D’esta miente, el festival va arrincar el 16 d’ochobre, a les 18 hores, col taller Pequenos espectadores, grandes esperiencies’, impartíu por Estrella García.
L’actividá, gratuita previa inscripción, ta dirixida a families y docentes d’Educación Infantil y Primaria. L’alcuentru va encetar el valor del teatru na educación, la espresión llibre de los neños y el papel de los adultos mientres les representaciones, tantu nel ámbitu familiar como nel escolar.
La programación va siguir el 17 d’ochobre, a les 18 hores, y el día 18, a les 12.30 hores, con ‘Pañuelos’, de Tarambana Teatru, una propuesta de danza-teatro y calter sensorial. El 23 d’ochobre, a les 18 hores, va ser la vez de ‘Aupapá’, de la compañía asturiana Zig Zag Danza, una de les pieces clásiques del so repertoriu para la primer infancia.
Pela so parte, la compañía gallega Caramuxo Teatru va presentar ‘Zapatos’, una obra de teatru d’oxetos que combina música y poesía visual. Les funciones van ser el 24 d’ochobre, a les 12.30 y a les 18 hores. El zarru va llegar el 31 d’ochobre con ‘Numa’, de la compañía catalana Teatre Nu, un espectáculu de títeres para los más pequenos que va poder vese a les 12.30 y a les 18 hores. Ese mesmu día, a les 16.30 hores, la formación va impartir el taller ‘Construcción de títeres en familia’.
