- Alborecemos col cielu poco nuboso o escampláu ya con unes temperatures que tan alrodiu de los 11ºC, rexistrándose nel puirtu Payares 9,9ºC.
- Güei vamos tener el cielu poco nuboso en xeneral, sicasí puen sudir dellos intervalos de nubes altes y al finar el día nubosidá baxa pela costa con unes temperatures másimes n’ascensu que mos dexarán un ambiente mui afayaizu.
- Mañana llunes va tar el cielu más nublu, asina y too puen abrise dellos claros o abancios durante’l día pa aumentar la nubosidá al atapecer y dexanos precipitaciones febles en forma d’orpín al final de la xornada con un ascensu de les temperatures mínimes y un llixeru descensu de les másimes.
- El martes alboreceremos con dalgo d’orpín pero con tendencia a desaparecer a primera hora de la mañana, cola apertura de pequeños claros o abancios nes hores centrales del día pero con un descensu moderáu de les temperatures másimes. Esti día tendremos dalgo de nordés que baxará entovía más la sensación térmica.
- El miércoles pali que pali dirá meyorando’l tiempu cola apertura de dellos claros o abancios durante’l día pero con unes temperatures que suben pero poco.
- El xueves ya vienres vamos seguir cola mesma tendencia de meyora con unes temperatures que suben pero nun muncho y paez que’l sábadu ya domingu si tendremos díes braniegos de calor con másimes yá rondando los 30ºC pero esto yá lu diremos viendo.
