Publicado en Concursu, Música, Musicasturiana.com

XVIII Premiu Camaretá al Meyor Cantar

Marisa Valle Roso, Tania Pereira, Namá y Ochobre van competir el 2 d’ochobre na final del XVIII Premiu Camaretá al Meyor Cantar. La gala va celebrase nel Teatru de la Llaboral de Xixón y el ganador va recibir un premiu de 6.000 euros.  Cultura presenta’l videoclip inmersivo en 360º de Xatu, el cantar cola que Ferla Megía llogró’l galardón na pasada edición.

 

El videoclip Xatu de Ferla Megía pue vese nesti enllaz: https://youtu.be/icwdxzFQEmI

Videoclip de Ferla Megía, Premiu na XVII edición de la Gala Camaretá al Meyor Cantar, promovíu pola Conseyería de Cultura, Política Llingüística y Deporte, na edición del 2025. Nesti videu 360º, el públicu pue movese llibremente usando’l cursor pa ver tolos ángulos del sitiu, el picu María los Corros.

La final del XVIII Premiu Camaretá al Meyor Cantar va axuntar
el 2 d’ochobre a Marisa Valle Roso, Tania Pereira, Sólo y Ochobre

  • Los cuatro artistes van competir nel Teatru de la Llaboral de Xixón por un gallardón dotáu con 6.000 euros
  • Cultura presenta’l videoclip en 360° de Xatu, tema col que Ferla Megía llevó’l premiu na edición anterior

La Conseyería de Cultura, Política Llingüística y Deporte celebra’l vienres 2 d’ochobre la gala final del XVIII Premiu Camaretá al Meyor Cantar nel Teatru de la Llaboral de Xixón. Marisa Valle Roso, Tania Pereira, Sólo y Ochobre van competir por un gallardón dotáu con 6.000 euros que reconoz la creación musical n’asturianu y eonaviegu.

La gala va dexar escuchar en directo los cuatro cantares finalistes primero de conocer el fallu del xuráu. Tamién va volver al escenariu Ferla Megía, ganador de la edición pasada con Xatu, que va interpretar el tema col que llevó’l premiu y va presentar los cantares nos que trabayó nel últimu añu.

El Premiu Camaretá al Meyor Cantar busca afianzar, prestixar y arriquecer la creación musical nes llingües propies d’Asturies y dar visibilidá a artistes, estilos y xeneraciones distintes. El premiu tien, amás, continuidá más allá de la gala: l’artista ganador va incorporase al circuitu Autores nel Camín, dientro del programa autonómicu Asturies, Cultura en Rede, qu’avera la ufierta cultural a los conceyos asturianos.

Los cuatro temes finalistes reflexen esa diversidá de voces y maneres de facer música n’asturianu:

  • Marisa Valle Roso compite con La carbonera. Cantante y compositora, ye una de les voces más reconocibles de la música asturiana y reinterpreta’l repertoriu tradicional dende una mirada contemporánea.
  • Tania Pereira presenta Piquena, dientro d’una propuesta de raíz folk abierta a soníos actuales, con influencies del rock alternativu, l’indie y el pop.
  • Sólo llega con Foles. Baxo esti nome, el cantautor turonés Alfredo González abre una etapa artística más íntima y personal na qu’esplora rexistros sonoros nuevos. Foles ye, amás, el primer cantar en llingua asturiana d’esti proyectu.
  • Ochobre completa la final con Escuela d’amor. La banda asturiana combina una propuesta enérxica con elementos procedentes del folk y sonoridaes contemporánees.

De forma paralela, la ciudadanía yá pue participar activamente nesta edición al traviés d’una consulta popular que s’atopa abierta. El resultáu de la votación nun va tener calter vinculante pa la resolución del xuráu oficial, pero dexa a l’afición sofitar los sos temes favoritos y involucrase directamente nel certame. El formulariu de participación ta disponible na web oficial:

https://www.asturiesculturaenrede.es/premiucamaretaalmeyorcantar/

Xatu, un viaxe al monte en 360°

Como antoxana de la final, la Conseyería presentó esta mañana en La Llaboral el videoclip de Xatu, el tema col que Ferla Megía ganó’l Camaretá nel 2025. Antonio Llaneza dirixe esta pieza en 360° interactivu, rodada a más de 1.900 metros d’altitú nel picu María los Corros, nel sierru de Las Trés Marías. El monte forma parte tamién de la historia compartida por dambos, porque Llaneza y Megía conociéronse faciendo rutes y escalada y yá trabayaren xuntos nel videoclip de Tiempu!

Con esta estrena Ferla Megía zarra una etapa con un cantar, Xatu, y un álbum, Páxaros 01, que-y abrieron les puertes a facer una xira pela península y cola que se dio a conocer fuera del país. Fernando Labrador Megía, más conocíu como Ferla Megía, ye un músicu multiinstrumentista y una de les voces más inquietes de la escena asturiana, con un soníu que bebe tanto de la música tradicional como d’estilos urbanos y electrónicos, dende’l cantar d’autor al trap, dende l’ambient al reguetón. El so últimu trabayu, Páxaros 02, ta formáu por seis cantares nuevos compuestos y producíos pol propiu artista.

Ferla Megía tamién va ser ún de los artistes que va actuar el 2 d’ochobre nel Teatru de la Llaboral na final del XVIII Premiu Camaretá al Meyor Cantar.

El videoclip Xatu de Ferla Megía pue vese nesti enllaz: https://youtu.be/icwdxzFQEmI

Autor:

Maestra de Llingua Asturiana Colexu Carmen Ruiz-Tilve - Uviéu