MúsicAsturiana: AMCA

Va unos díes presentóse l’Archivu de la Música Contemporánea Asturiana (AMCA). La iniciativa sigue’l camín que dibuxaron los munchos y variaos archivos de la música tradicional. En cuenta de recoyer documentos sonoros de calter tradicional, l’AMCA céntrase na música d’espresión asturiana que se fixo nes últimes décades. Entrevistamos a Xune Elipe, una de les cabeces que tán darrera esti proyectu. Enllaz noticia

L’AMCA, destaquen los sos promotores, “va ser una especie d’enciclopedia del sieglu XXI dedicada a la música asturiana, dando forma a un proyectu pioneru n’Asturies, con una ventana abierta a cualesquier requexu del mundu al traviés del click“. Too ello “dende una perspectiva empresarial profesional que puxa por reconocer el papel fundamental que tien la música con identidá propia dientro de la marca Asturies“. Pasu ente pasu “vamos dir dixitalizando y dando a conocer un conxuntu de materiales bayurosu (cartelería, grabaciones, programes de mano, maquetes, cartafueyos, revistes, audiovisuales, semeyes…) y perinteresante, con bien de conteníos inéditos y/o esclusivos”.

Musicasturiana.com pon en marcha un proyectu pa convertise na mayor web de música asturiana, con conteníos informativos, guía de recursos, tienda online remocicada y la incorporación del Archivu de la Música Contemporánea Asturiana (AMCA), una iniciativa de Goxe Producciones que, ente otres coses, va dixitalizar y ufrir al públicu un conxuntu de materiales bayurosu.

L’AMCA naz con voluntá de serviciu públicu. Nesti sen, queremos convertinos nuna fonte de consulta, publicidá y estudiu del fechu musical asturianu y/o n’asturianu y gallego-asturianu dende mediaos de los años 70 hasta güei. Tolos materiales van poder sentise o vese llibremente, otra cuestión aparte ye poder baxalos o facese con ellos. De munchos tenemos nós los derechos, pero d’otros non, poro, pa evitar problemes llegales l’AMCA plantégase como un escaparate onde tener accesu a ellos, onde poder consultalos o simplemente disfrutalos, pero nada más.

L’AMCA naz como una iniciativa privada que surde de la collaboración de dos empreses mui venceyaes a la música del país: Goxe Producciones y Mecigaya Creativa. De mano vamos entamar una serie de reuniones con responsables de la política cultural pa presenta-yos el proyectu, que lu conozan y valoren, y ver de qué manera pueden apoyalu. Pel momentu la financiación ye dafechu propia, como la dixitalización de les grabaciones y los materiales físicos.

Hai una primer época onde se produz la nacencia de la música d’espresión asturiana contemporánea, que ta marcada pola creación de Conceyu Bable a mediaos de lo años 70 y l’apaición del Nuevu Canciu. Posteriormente, nos 80, apaez el movimientu musical más importante hasta la fecha n’Asturies: el folk de calter atlánticu. Nos 90 produzse’l gran boom de la música asturiana, que tien a Hevia como cabezaleru, pero la crisis del añu 2008 llevó per delantre munches de les manifestaciones de la nuestra música (grupos, nueches celtes, festivales, escueles…). Agora, depués de la nuestra travesía del desiertu particular, principia a vese un espolletar nuevu y, dalgo que ye perimportante y hasta imprescindible, una anovación nes formes y maneres d’entender lo que ye la música asturiana, muncho más abierta y diversa. De toes maneres, falta ciertu relevu xeneracional y por eso ye tan importante dar a conocer lo que se fixo y los antecedentes qu’hai, pa qu’esa mocedá que quiera incorporase a la música asturiana tenga una base sólida.


«30 ANIVERSARIU DE CONCEYU BABLE»