- 𝗛𝗜𝗦𝗧𝗢𝗥𝗜𝗔 𝗡’𝗔𝗦𝗧𝗨𝗥𝗜𝗔𝗡𝗨 / Xuan Fernandi
Güei, 8 de mayu de 2026, Día de les Lletres Asturianes, ye un día afayadizu pa presentar el primer proyectu d’usu vehicular de la llingua asturiana nuna materia de calter non llingüísticu na Educación Secundaria Obligatoria.
En xunu de 2024, en falando con dellos responsables de la Conseyería d’Educación, y col preste del equipu directivu, presenté’l proyectu 𝘏𝘪𝘴𝘵𝘰𝘳𝘪𝘢 𝘯’𝘢𝘴𝘵𝘶𝘳𝘪𝘢𝘯𝘶 al Claustru y al Conseyu Escolar del IES Santa Cristina (La Pola, Ḷḷena), col envís de poner clas de Xeografía y Historia en 4ESO n’asturianu, un proyectu basáu nes característiques del plan pilotu d’Educación Primaria que se desendolcó en delles escueles del país nos cursos 2017-2018 y 2018-2019.Depués de llograr l’aprobación del profesoráu y de la comunidá educativa por una amplia mayoría y de presentar formalmente’l proyectu a la Conseyería d’Educación, col compromisu de delles families que queríen que les fíes y los fíos deprendieran historia usando l’asturianu como llingua vehicular, echamos andar el proyectu nel cursu 2025-2026 con un grupu de quince alumnes y alumnos.
Magar que la Conseyería d’Educación, que siempre dio muestres de tar interesada nel proyectu, nun llegó a dar el preste per escrito, el Conseyu Escolar del centru afaló a siguir con él col sofitu del equipu directivu.
Por ello, esti cursu, per primer vegada, punximos con xeitu clas d’historia contemporánea n’asturianu a les rapaces y los rapazos del institutu de Ḷḷena.
