Asturies va acoyer el 28 Congresu de l’Asociación poles Llingües y Cultures Amenazaes (ALCEM) que preside l’antropóloguy y académicu de la Llingua, Roberto González-Quevedo y que va celebrase los díes 24 y 25 de xunetu nel salón d’actos del Muséu Arqueolóxicu d’Asturies n’Uviéu.
Ye esta la segunda vez que la capital asturiana fai de sé d’un aconceyamientu d’esta plataforma internacional ya independiente, que xunta a especialistes y representantes d’entidaes comprometíes na defensa de los idiomes minorizaos del continente européu, después del que s’entamó en 1987.
La sesión inaugural d’esti nuevu congresu va ser pela mañana del vienres 24 na Xunta Xeneral, con una visita al parlamentu de los asistentes y los discursos del presidente de l’Asociación y los representantes institucionales d’Asturies. Darréu va facese un homenaxe al escritor triestín de llingua eslovena Boris Pahor, que fuera candidatu al Premiu Nobel y de siguío l’antropóloga Giustina Selvelli, de la Universidá de Ljubljana va dar una conferencia sobre la diversidá llingüística y cultural de la rexón de los Alpes-Adriáticu. El programa matinal completaránlu el poeta Mario Obrero cola ponencia ‘¿Y tú d’ónde yes’ y l’escritor Inaciu Galán con una comunicación sobre’l presente y el futuru del asturianu.
El congresu treslládase pela tarde al Muséu Arqueolóxicu onde Francho Nagore va falar de la historia del Consello d’a Fabla Aragonesa y de siguío, representantes de les comunidaes llingüístiques invitaes van esponer les situaciones nos sos respectivos territorios. El sábadu 25 va entamar con un coloquiu sobre’l papel de la creación lliteraria n’idiomes minorizaos con autores en diverses llingües, ente ellos los asturianos Est her García, Pablo Rodríguez Medina, Llucía Fernández García, Francisco González-Banfi y Ernesto García del Castillo ‘Neto’, autor tamién del cartelu del congresu.
-
-
Conferencia. Giustina Selvelli: ‘Linguistic diversity endangered in the Alps-Adriatic region: sociopolitical and ecological challenges of ethnic minority communitie’. Vienres 24, 10.30.
-
Ponencia. Mario Obrero: ‘Perp tu ¿d’ónde yes?’. Vienres 24, 11.20.
-
Comunicación. Inaciu Galán: ‘Presente y futuru del asturianu’, Vienres 24, 12.10.
-
Comunicación. Francho Nagore: ‘La recuperación del aragonés a través del Consello d’a Fabla Aragonesa’. Vienres, 24, 15.00.
-
Presentaciones. Informes de los representantes de les comunidaes llingüístiques sobre la situación de los sos idiomes. Viernes, 24, 15.30.
-
Coloquiu. Varios autores: ‘La creación lliteraria contemporánea nes llingües amenazaes. ¿Por qué?’. Sábadu, 25, 9.30.
-
Conferencia. Robert K. Shepherd: ‘La littérature celtique. Hyde, Pearse, Yeats, Synge : les écueils du texte bilingue irlandais-hiberno-anglais comme outil pédagogique et modèle de dialecte littéraire’. Sábadu 25, 16.30.
-
Conferencia. Avelino Corral: ‘Las lenguas celtas hoy en día. Un análisis de los intentos llevados a cabo para su preservación y revitalización’. Sábadu 25, 17.30.
-
Pieslle. Actes, clausura y asamblea xeneral de l’ALCEM. Sábadu 25, 18.40.
-
Les postreres ponencies van tar dedicaes al idioma lliterariu desenvueltu polos escritores de la lliteratura céltica irlandesa como Yeats, Synge, Pearse yHyde, a cargu del profesor de la Universidá Autónoma de Madrid, Robert K. Shepherd y del docente de la mesma universidá, Avelino Corral sobre les llingües celtes anguañu. La presentación de les actes del últimu congresu y les conclusiones d’esti nuevu van piesllar les sesiones. Los asistentes van viaxar el domingu pela mañana a Cangues d’Onís y Cuadonga.
