Fonte / Los psicólogos coinciden: los padres tienen d’implicase lo menos posible nos deberes de los neños. La psicóloga Rocío Ramos encamienta llindar les extraescolares y dexar delles tardes llibres para amenorgar l’estrés infantil.
La educación de los fíos suel convertise nun terrén de tensión dientro de munches families, especialmente cuando lleguen los deberes y les esixencies académiques. Sicasí, dellos psicólogos defenden agora una idea que ruempe cola costume más estendida ente munchos padres españoles.
La psicóloga infantil Rocío Ramos-Paúl, https://rocioramos-paul.com/ conocida popularmente pol so papel de Supernanny, considera que los proxenitores tienen d’amenorgar al máximu la so implicación directa nes xeres escolares. Según esplica, asumir tamién el rol de profesor acaba xenerando conflictos constantes dientro de casa.
La esperta aseguró que «los padres tiénense qu’implicar lo menos posible» porque nun pueden convertise en tou pa los sos fíos. Al so xuiciu, los discutinios polos deberes son una de les mayores fontes d’enfrentamientu familiar.
La especialista encamienta que’l neñu encare primero les xeres ensin ayuda. Dempués d’esi intentu inicial, los padres pueden resolver duldes concretes. L’oxetivu ye que’l menor aprienda a xestionar la frustración, entamase y desenvolver autonomía frente a les obligaciones escolares.
Ramos-Paúl aportuna amás en que equivocase forma parte esencial del aprendizaxe. Ello ye que sostien que los neños aprienden muncho más cuando apurren deberes imperfectos y reciben darréu les correcciones de los sos profesores nel colexu, en llugar de presentar exercicios dafechu supervisaos en casa.
Descansu y socialización. La psicóloga reconoz qu’esta postura suel resultar incómoda pa munchos padres, especialmente pa quien sienten presión por consiguir bones notes. Aun así, considera qu’intervenir demasiao perxudica la capacidá de los menores pa resolver problemes por sigo mesmos.
Más allá de los deberes, Ramos tamién encetó la organización de les actividaes extraescolares. El so encamientu pasa por atopar equilibriu y evitar axendes enchíes. Según esplica, lo ideal sería llindar estes actividaes a dos o trés selmanales a lo más.
Amás, cree fundamental que los neños dispongan de tiempu llibre mientres la selmana. Tener siquier xuna o dos tardes ensin actividaes ayuda a amenorgar l’estrés y favorez el descansu, daqué especialmente importante mientres los primeros años d’escolarización y adolescencia.
Sobro la elección d’actividaes, la esperta aconseya escuchar les preferencies de los fíos, anque tamién anima a valorar aspeutos que puedan beneficia-yos socialmente. Por casu, encamienta deportes d’equipu pa neños con dificultaes pa rellacionase con otros compañeros.
La transición escontra Primaria y darréu al institutu ye otru de los momentos que más esmolez a les families. Según Ramos-Paúl, nestes etapes los padres tienen d’abandonar el control constante y adoptar una posición más discreta, anque calteniendo supervisión y llendes clares.
Sicasí, considera que tamién supon una oportunidá por que los menores apriendan a desendolcase ensin una sobreprotección permanente dientro y fora de casa
