Xixón Fala en 3’

Ye una revista de cultura que naz en 2011 a partir d’una iniciativa común ente’l diariu La Voz d’Asturies y Ediciones Trea. Coordinada por Jaime Priede, esta revista llegó al mercáu col enfotu de sirvir de plataforma pa la divulgación de la cultura, siendo garré’l puntu d’unión ente’l mercáu cultural y el gran públicu. L’actualidá lliteraria, artística, escénica y editorial son protagonistes de les sos páxines.


Amosamos una escoyeta de testos que foron presentaos en dalguna de les trés ediciones del concursu Xixón Fala en 3’, qu’empobina la Oficina de Normalización Llingüística de Xixón: ensayinos de temátiques estremaes y pensaos pa ser espuestos o lleíos en trés minutos, aproximao.

Son unos ensayinos de temátiques estremaes y pensaos pa ser espuestos o lleíos en trés minutos, aproximao.

Pa rematar queremos dicir que ye pa nós motivu d’arguyu superlativu la esistencia d’una estaya moza (ente 14 y 18 años) que da la oportunidá de falar a la mocedá —tantes vegaes tapecida poles voces adultes— y que ye garante de vida pa esta llingua milenaria.

Saber que con una, con ún, nun se va tamién la so llingua materna ye una tranquilidá.

Más nada, convidar a que pasen, llean y esfruten.


SALÚ MENTAL: LA IMPORTANCIA DE LO INVISIBLE,

de Celia Corrales García (estaya moza 14-18 años)

¿Ves igual a un esquizofrénicu qu’a una persona con movilidá amenorgada? ¿Ye lo mesmo tener depresión qu’un cáncer? ¿Consideres que merez el mesmu tratu una persona con un trestornu mental que dalguien con un síndrome?

Na dómina de lo visible, entá hai temes invisibles como la salú mental.

Los trestornos nun mos definen. Tu nun yes bipolar, tienes un trestornu de bipolaridá, y tampoco tienes por qué avergonzate d’ello.

Estes condiciones mentales nun faen nenguna distinción, y afecten a xente de cualquier edá, sexu, raza, relixón y situación social. Estes enfermedaes, como munches otres, pueden desviar los oxetivos d’aquellos y aquelles que les sufren ya impiden-yos siguir cola so rutina. Mentáu esto, quiero puntualizar tamién que la concienciación y el compromisu cola salú mental ye dalgo qu’ocupa tanto a la izquierda como a la derecha.

Les enfermedaes mentales afecten al 25% de la población a lo menos una vegada na vida, polo que nun se trata de casos aisllaos. N’Asturies, según estudios fechos nel añu 2016, 24.000 persones tienen dalguna enfermedá psíquica. Yepreciso concretar qu’esti porcentaxe comprende namás aquellos casos yá diagnosticaos, y ello significa qu’entá hai munches persones que nin siquier saben que carecen dalgún tipu de trestornu. Esto, poques gracies, agrava la situación, porque suel crear una mayor sensación de malestar ente les persones afectaes, al nun entender qué-yos asocede nin cómo poner fin a esta congoxa. Si realmente se trata d’un problema tan grave, ¿por qué tamos tan poco avezaos a sentir falar d’esti tema?

La verdá ye que nun ye xera fácil atopar una respuesta coherente pa ello, sacante que tolo rellacionao cola salú mental siga siendo tabú. Sicasí, nun esiste únicamente una falta de visibilidá, sinón que malpenes se tien en cuenta nos presupuestos autonómicos. Anguaño, solo seis centros de salú cuenten o van cuntar con especialistes n’atención psicolóxica clínica. Dende’l mio puntu de ver ye, cuantimenos, esmolecedor.

Según otru estudiu del Institutu Nacional d’Estadística, Asturies lidera la tasa de suicidios por cada 100.000 habitantes, amosando una media d’alredor d’una muerte cada trés díes.

Ye obvia la importancia del asuntu, pero más lo ye l’impactu que puede suponer pa la persona enferma y pal so entornu. Trátase d’un infiernu ensin salida aparente: onde güei visti una lluz mañana atopes namás llume. Si nun buscamos alternatives pa tratar y solventar esti problema, va medrar y medrar, hasta que seya tan grande que nun vamos ser quién a abarcalu. Tamos a tiempu. Hai solución. Inclusive en plural, soluciones. Nun se trata de consiguir que tola xente afectada pueda aportar a un tratamientu pa sentise meyor, sinón pa sentise normal. Nun ye una meyora de la calidá de vida, ye un derechu a poder vivila con normalidá.

Afortunadamente, les cifres pueden, y tien de, cambiase y mencionase. Nun ye dalgo ensín importancia y poro nun hai que dexar que la xente lo escaeza.

Esta llucha ye nuesa, el problema ye nuesu, y la solución de toes y pa toos.


ASTURIES, NUN YE TIEMPU DE NÓS

d’Inés Corrales García (estaya moza 14-18 años)

Amuésase ente la xente asturiano una falta d’identidá, de ciñu polo propio, de compromisu col territoriu. Cada vez ye más frecuente la poca involucración de munchos asturianos pa sacar alantre a la nuesa rexón pero:

¿Cualá ye la consecuencia d’esto? Dixebramientu.

Apaecen entós tres estayes, bien diferenciaes y representatives de la, a la fin non tan bayurosa, sociedá de nueso.

Primeramente podemos mentar a los qu’ensalcen tolo rellacionao cola rexón como si realmente fora’l paraísu que-yos venden a los foriatos. Falen con llárimes nos güeyos d’un valiente rei Pelayo, de llograr mantenemos fieles a nós, anque demientres rechacen dalgo tan propio como les nueses costumes, asumiendo meyor les qu’aporten dende bien lloñe…

Dempués, tán los más críticos y conscientes de la precaria situación d’Asturies y la so xestión, teniendo como oxetivu puxar por un bayurosu futuru. Esti colectivu llucha día tres día pa normalizar tolo rellacionao cola nuesa cultura, destacando sobromanera la nuesa llingua, y evitar qu’aquello que mos estrema como rexón caiga nel escaezu y asina facer que les xeneraciones futures puedan siguir esfrutando y calteniendo.

Y, d’últimes, los que renieguen y sienten vergoña d’aquello que mos distingue, que mos define y identifica como asturianos. Los qu’ intenten desmerecer lo asturiano de forma estremista ensin tapuxos, arriendes de la so falta d’argumentos y conocimientu na materia.

Dende’l mio ver, solucionar esti problema ye urxente, porque ye la colectividá la que fae medrar una nación, una idega, una sociedá.

Algamar el bien común ye necesario pa la continuidá de la xeneración mozo n’Asturies y tien de facese dende lo menos valorao, como la cultura y los vezos, hasta lo qu’anguaño ye prioritario, como la economía. Nun quiero siguir siendo amenorgada  por falar la mio llingua d’ avezu, tampoco quiero ser aplaudida por ello, namás busco que se normalice esta situación.

Deconstruyilo too, pa desfacer dogmes y avanzar, vivir nun nuevu modelu formáu en conxunto onde hai llugar pa toes y toos, onde convivir nun ye una llucha sinón un arguyu. Onde los guah.es medren ensin tapuxos nin miéu a ser xulgaos por como falen, polo que faen, polo que son y polo que sienten.

A la fin, tornar a ser asturianos y definimos como tal.

A lo cabero, prestaríame recordar que siguir puxando por esta anovada idega de rexón nun ye trabayu namás de los mayores, sinón que la mocedá también xugamos un papel mui importante pa qu’esto salga alantre. Gracies.


L’ASTURCÓN,

d’Andrea Otero Huerta (estaya moza 14-18 años)

Voi entamar falando del caballu típicu asturianu que ye’l poni asturianu o más conocíu como asturcón. Esta ye una raza de caballu rústicu de tamañu pequeñu d’orixe asturianu. Esa raza ye una de les más antigües y más pures del mundu. Destaquen principalmente por tener un tamañu pequeñu, como yá dixi, poles sos estremidaes fines, tener un pelo negro con gran capilariá, cascos pequeños redondiaos y flexibles. Esti ye un animal montesín, polo qu’habita en llibertá nel monte.

L’asturcón tien oríxenes selvaxes y nun tenía utilidá nenguna pal ser humanu, pero dempués foi domesticáu y usáu pa llabores d’agricultura y pal tresporte y tamién yeren usaos pa montar y, n’ocasiones, pa bienes alimenticios o de sacrificiu, tal y como amuesen les excavaciones arqueolóxiques de Noega equí, en Xixón, asina como polos romanos nes mines (por eso llegó a haber exemplares del asturcón en Valencia).

Tres sieglos de rindimientu tuvo cerca la estinción. Debío a esto fundaron diverses asociaciones pa protexer la raza como ACPRA que ye una asociación de cría d’asturcones con pureza.

Anguaño los exemplares caberos d’esta especie redúcense a la sierra del Sueve nel oriente asturianu ente los conceyos de Parres, Caravia, Piloña y Colunga y tán protexíos por ACAS que ye l’asociación conservadora d’asturcones del Sueve que foi apoyada pol ministeriu d’agricultura declarando en 1981 l’asturcón como raza autóctona n’Asturies.

Tamién hai una folixa, llamada «La doma del asturcón» que ye organizada por esta asociación ya nomada, que se fai metanes agostu n’Espineres (Piloña) na que se fai un control de los asturcones montesinos al traviés d’un marcaxe.

La hestoria d’Asturies nun se concibe ensin l’aportación d’esti animal qu’enxaya a la perfección cola escarpada ya irregular xeografía asturiana.

 


HESTORIA DEL FOLK N’ASTURIES,

de Llara Vega Díaz (estaya moza 14-18 años)

Voi falar de la música folk n’Asturies, dende los sos entamos hasta güei.

Fai munchos años la música qu’había d’aquella nes romeríes p’amenizar, yera la gaita, el tambor y dalguna vegada’l vigulín.

Pocu a pocu entamaron les orquestes y grupos musicales, dexando nel escaezu la música tradicional. Los gaiteros pasaren a ser consideraos cuasi que los borrachos del pueblu, por dir tocando de romería en romería.

Col tiempu, surdieron grupos como Beleño, qu’entamaren a introducir na música tradicional asturiana otru tipu d’istrumentos como la guitarra o’l bouzouki, asina la música folk asturiana entamó a garrar la dirección qu’anguaño algamó.

Nos años 80 les nueches celtes n’Asturies garraren mala fala por culpa d’una tribu urbana que venía pa Les Piragües y pasaron pela Nueche Celta de Corao destrozando tolo que garraren al pasu. Tardóse munchu tiempu en tornar a facese folixes d’esti tipu n’Asturies.

Hasta que ñacieron grupos como Llan de Cubel o Felpeyu, que garraron el relevu a Beleño, y qu’empezaron a llograr que la xente apreciara’l grandor de la nuesa  tradición musical.

Gracies a iniciatives como’l sellu discograficu L’aguañaz, ñacíu de la mano de Xune Elipe, llíder de Dixebra, diéronse a conocer grupos como N’ Arba o Corquiéu, dexóse de tener refugu a les nueches celtes que tamién pasaron a ser una cita obligada.

Naquel tiempu surdieron tamién les bandes de gaites y lo qu’enantes yera consideráu pueblerín pasó a ser aceptáu, compartíu, respetáu y practicáu por cada vez más asturianos.

En concretu yo puedo falar de Corquiéu, yá que mio pá foi ún de los sos fundadores. Como datu, ente los cientos de conciertos que realizó, Corquiéu tuvo l’honor de representar dos vegaes a Asturies nel festival de Lorient, consideráu unu de los festivales más importantes nel mundu folk.

Gracies a que mio pá formó parte d’esti grupu, al yo ñacer, punxeren el mio nome a unu de los sos cantares. Préstami pensar qu’al traviés d’esti cantar formo parte d’hesta hestoria a la que tovía-y queda muncho pa terminar. Asina, que si un día tenéis ganes de sentir la mio canción, una canción bien guapa y prestosa, el mio nome ye Llara.


LA MINERÍA N’ASTURIES,

d’Álvaro Moráis (estaya moza 14-18 años)

A finales del sieglu XVI atopamos el primer documentu sobre la minería de carbón n’Asturies. Trátase d’una carta na que’l rei Felipe II da autorización a Fray Agustin Montero, pioneru de les esplotaciones carboníferes, pa entamar a estrayer el carbón d’Arnao, en Castrillón.

Dende esi momentu y adulces, otros mineros asturianos fueron pidiendo más permisos pa dir abriendo pequeñes mines, que munches vegaes, yeren pa alimentar una fragua.

Más tarde, nel sieglu XVIII tenemos otru documentu importante, nel que vuelve a falase del carbón n’Asturies. Firma esti documentu l’alférez mayor d’Uviéu, Antonio Carreño y Cañedo, y nel mesmu fae referencia al so güelu, mientres cazaba pelos montes de Carbayín decatose de la presencia de carbón viendo una quema que tardó cinco meses n’apagase.

Sicasí, la estraición de carbón, y el so usu como combustible nun s’entendió como una actividá industrial hasta la segunda metá del sieglu XVIII, col sofitu de los illustraos de la dómina, con Xovellanos como figura cabezalera.

Xovellanos, como siempres adelantándose al so tiempu, firmó’l documentu de mayor relevancia sobre la minería del carbón n’Asturies. Esti testu titulóse «Informe sobro’l beneficiu del carbón piedra y utilidá del so comerciu» y nesi documentu, Xovellanos plantega dalgunes idees como la llibertá pa la esplotación de mines, la meyora de los tresportes y la construcción d’una carretera carbonera ente Llangréu y Xixón.

Dende finales del sieglu XVIII hasta mediaos del sieglu XX, la esplotación minera n’Asturies tuvo muncha importancia económica y gran desendolcu. Munches families asturianes vivieron de la minería del carbón.

Foi na década de los 80 del sieglu XX, cuando la minería asturiana entamó a perder puxu, ya que’l carbón que llegaba d’otros países yera muncho más económico que lo nueso. Ello dio llugar a un procesu de reconversión y pieslle de les mines. Pa evitalo, hubo munches manifestaciones, protestes, fuelgues… Foi un procesu mui dolorosu, que desgraciadamente nun algamó l’ésitu esperáu, porque la mayoría de les mines asturianes zarraron. Too ello marcó fonderamente non solo la nuesa hestoria y la nuesa economía, sino que tamién influyó na nuesa sociedá y cultura.

Nun podemos escaecer a los cientos de persones que morrieron nes mines asturianes, non solo homes, sinón tamién muyeres y neños, que trabayaron nes mines dende l’entamu, anque tampoco podemos olvidanos de les víctimes d’enfermedaes provocaes pola mina como la silicosis

Nun ye desaxeráu dicir que la hestoria de la minería de carbón n’Asturies escríbese col sangre y sudu de munches families yá que casi tolos asturianos conocemos o tenemos na familia dalgún pariente mineru.

El polvu de carbón ta y tará nos nuesos corazones y nes nueses llárimes pa tola vida.


LORCA, SANGRE ASTURIANA,

d’Alma Hidalgo (estaya moza 14-18 años)

La rellación que caltenía el poeta Federico García Lorca con Asturies foi intensa y llarga, anque son pocos los que conocen esta hestoria…

Federico García Lorca ñació nel añu 1898 en Fuente Vaqueros, pese a que la mayor parte de la so vida, pasóla en Granada capital, onde se mudaría con unos cinco años y onde diría al colexu , ya que siendo bien mozu, entamaría los sos estudios universitarios na Residencia d’Estudiantes de Madrid.

Nel añu 1922 presentaría una tesis titulada El cante jondo la cual taba basada en cinco puntos fundamentales, que defendíen que’l cante andaluz yera mui parecío a les vaqueiraes, tanto en temática como n’estuctura. Nel añu 1929, espublizaría otru trabayu tituláu Nanes infantiles, o lo que ye lo mesmo, Añaes. Trabayu qu’espondría nel añu 1930 nel Dindurra, anque nun tengamos casi documentación fotográfica yá que nesi momentu los medios de comunicación taben en fuelga.

Llega el añu 1932 y con él, la Barraca aterriza n’Asturies, faciendo una xira por varios conceyos, pasando por: Gráu, Cangues d’Onís, Xixón, Avilés y Uviéu. Esti viaxe dexónos daqué pa comentar, ya que l’escritor quedóse unos díes col musicólogu Martínez Torner, llevantando revuelu ente les males llingües que los acusen de haber tenío un affaire. Esti, apurrió-y al escritor dellos cantares pa que Federico siguiera investigando y nel añu 1933, Lorca vino por última vez a Asturies, dispidiéndose de la nuesa tierra en Mieres.

Cabe destacar que’l poeta fizo un guiñu a Asturies na añada 373, na que fala del papón y d’una muyer que pierde al so home y nadie sabe cómo, anque esto nun foi lo único que nos dexare Lorca, yá qu’alcontramos otra añada que ta basada nun cantar típicu de Trubia, esta pieza atopámosla n’asturianu, y llegaremos a la conclusión de que foi una de les pieces que-y pasó Martinez Torner nel añu 1932.

Lorca defendió la nuesa llingua, y nosotros nun tenemos que facer menos.


BOROÑA, LLECHE Y FABES. L’ALIMENTACIÓN NA ASTURIES PREINDUSTRIAL,

de Xuan Fernandi Bas


«Amás, pasar tola vida con boroña, lleche y fabes yera bien duro.» Estes pallabres, diches por un llabriegu de L’aldea perdida, que vivió en Llaviana al rodiu de 1870 cuando entamaba la minería y la industrialización, condensen la dieta de los llabradores asturianos ente’l sieglu xvii, cuando s’espardió pel país el maíz, un cereal d’orixe americanu, y l’últimu terciu del sieglu xix.

Los llabradores, que constituyíen nesta dómina la mayoría de la población d’Asturies, yeren cuasi toos mui probes, y ello amosábase sobre too na alimentación. Producíen tolo que necesitaben pa comer en casa. Sicasí, pese a trabayar mui duro tol añu, teníen graves dificultaes p’algamar un sostenimientu afayadizu, dalgo perdifícil, dao que teníen poques tierres y pocu ganáu y, amás, habíen dar parte de la collecha a los señores en conceptu de renta. La dieta yera, nesti sen, sobria, irregular y munches vegaes insuficiente. De mano, solía haber problemes d’escasez ente una collecha y otra, pero sobre manera una collecha mala, o la so perda, producía una crisis de subsistencia que trayía fame, epidemies y miseria. L’alimentación perbaxo d’unos mínimos aceptables yera, poro, crónica. De fechu, la respuesta de la xente ante esta situación yera davezu la emigración. Pero la dieta tamién yera monótona pola poca diversidá de los alimentos y probe pola baxa calidá de los mesmos.

Tratábase, en fin, d’una dieta llactovexetariana. Ello ye, los cereales yeren l’alimentu principal, básicamente’l maíz y el centén pal occidente; y depués les fabes y verdures xunto a la lleche y los sos derivaos. Otros alimentos complementarios yeren les castañes, pañaes en monte, y les pataques, un tubérculu d’orixe americanu que s’aclimató al país nel sieglu xix.

Col maíz ellaborábase boroña, un pan duro y escuro, que yera l’alimentu cimeru, y farrapes, una pastia cocida con agua o lleche. Les fabes yeren la base’l pote, un guisu nel que tamién s’echaben berces y pataques, qu’acabaron sustituyendo a les castañes, pero cuasi nunca carne. En cuanto a la lleche, tomábase normalmente desnaturalizao, en forma de bira, depués de quita-y la nata pa ellaborar con ello mantega y quesu.

No que cinca a la bébora, namás se tomaba davezu l’agua de les fontes, pues la sidra o’l vinu pal occidente quedaba pa dellos momentos mui concretos.

Yera, asina, una dieta rica n’hidratos de carbonu, pero perprobe en proteínes d’orixe animal, que solo apaecíen mui de xemes en cuando.

La introducción del maíz quitó al aniciu muncha fame, pero aprobeció al final abondo la dieta. De fechu, el gran consumu de productos de maíz dio llugar al espardimientu d’enfermedaes alimentaries como’l mal de la rosa.

Cola industrialización y l’ameyoramientu de los tresportes a finales del sieglu xix, l’alimentación cambió dafechu: acabaron les crisis de subsistencies, dexó de producise tolo necesario en casa y púnxose fin a la dieta llactovexetariana. La xente entamó a comer davezu pan blanco de trigu, carne, vinu y productos nuevos adquiríos en mercáu, lo que contribuyó, ensin dulda, a la imaxe qu’anguaño tenemos de l’alimentación tradicional asturiana.


EL VEXETARIANISMU: UNA ACCIÓN ECOLÓXICA,

de Claudia Gutiérrez Lueje


¿A quién nun impactaron les imáxenes de los incendios amazónicos? Tol mundiu ablucó y movióse peles redes sociales pa dar a conocer esta realidá: el pulmón de la Tierra ta encesu, encesu non de vida, de fueu. Sentimos qu’esti tema yera de nueso: afeutábanos a tola humanidá, non solo a Hispanoamérica.

Pero… ¿por qué se dan estos incendios provocaos? Esti yera ún de los factores que más afeutó a la xente: el planeta ambura arremente.

L’oxetivu d’esta quema nun s’alloña d’una función que’l ser humanu dio al fueu a lo llargo de la hestoria: crear zones de cultivu.

¿Pa qué necesitamos tantes zones de cultivu? La mayor parte d’estos cultivos tán dedicaos a la soya, un vexetal fundamental na producción del piensu animal p’alimentar el ganáu que va producir tanto carne como productos ovollácteos.

Esto tien arreyaes otres consecuencies, como que’l 83% de tola tierra cultivao del planeta ta dedicao a dar de comer a estos animales, lo que supón l’equivalente a tol continente americanu. Amás, pa mantenelos y da-yos de comer tien de gastase’l 27% de tol agua potable del mundiu. Esto significa que pa producir un kilu de carne de vaca necesítense 15000 llitros d’agua duce.

Poro, el vexetarianismu sí ye una acción ecolóxica. Nun tenemos qu’escaecer qu’anguaño vivimos delles crisis mundiales. Perbaxo la pandemia, el cambéu climáticu avanza seliquín (y non tan seliquinamente). Asina, el vexetarianismu ye una bona opción pa lluchar escontra esti problema y amenorgar la nuestra buelga de carbonu, y ye que’l 15% de toles producciones CO2 provienen d’esta industria, l’equivalente a la suma de toles emisiones d’aviones, camiones, coches y barcos.

El vexetarianismu nun te fai meyor persona, nin muncho menos. Comer carne forma parte de nós como especie, ta dientro’l nuestru ADN y na nuestra cultura porque somos un animal omnívoru. Por embargu, ye una ferramienta bien afayadiza pa dar un puxu al nuestru planeta y ser quien a tener un futuru pa tol mundiu: pa tolos seres humanos y pa tolos seres vivos.


LA MUYER NA INFORMÁTICA: ¿UNA RARA AVIS?,

de Javier González Rodríguez

Anguaño vivimos nuna sociedá cada vez más informatizada y dixitalizada, por embargu dame la sensación de que nun hai un interés real por conocer cómo funciona la informática o por estudiala. Esto afecta especialmente a la muyer, malpenes presente en carreres o Formaciones Profesionales informátiques.

Llámame l’atención, yá que la muyer fue un sofitu fundamental nel desarrollu d’esta ciencia yá dende los sos inicios. Pa entamar, la pallabra computadora (computer n’inglés) usábase nun iniciu pa nomar a persones que facíen cálculos matemáticos, na so mayoría muyeres como les computadores humanes de Harvard.

Tamién tenemos nel sieglu XIX a la primera persona programadora, Ada Lovelace, que desarrolló algoritmos informáticos pa una máquina que nin taba construyida. Yá na Segunda Guerra Mundial fueron fundamentales pa descifrar códigos nazis les informátiques de Bletchley Park, qu’al contrariu de lo que nos quiera amosar Hollywood en películes como Descifrando Enigma (na que solo aparez una muyer), suponíen el 75 por cientu de la plantilla. Más p’alantre tenemos a figures clave na carrera espacial y na llegada de la humanidá a la Lluna como Margaret Hamilton o Katherine Johnson ente munches otres.

Con too y con ello, lo que quiero dicir ye que nun podemos permitinos perder a la metá de la humanidá nuna ciencia de la que fueron fundamentales nel so pasáu y que ye clave pal nuestru presente y futuru.


LA ESPLOTACIÓN FORESTAL N’ASTURIES ANTAÑO Y ANGUAÑO,

de Xavi Cayao Valdés


Sabemos les presentes que la economía mueve’l mundiu. Y el monte ta en mundiu.

El monte yera, nes sociedaes pretétites asturianes, parte fundamental de la casería. Nel mediu forestal cazábase (yera obligación que tuviere llimpiu pa poder andar per él), pañabense castañes y bellotes (necesidá de replantar lo que se conoz como árboles del país: castañales y carbayos sobremanera), segábase l’estru pa facer les cames de los animales na corte y enta daba madera pa poder prender la cocina 3 veces al día (almuerzu, xinta y cena) y calecer la casa tol día nos iviernos.

La madera nun se sacaba de bastir l’arbol, más bien yera cosa de llevar pa casa caños secos, playos que baltiare l’aire o retoños de les sebes.

En tou casu, sabiéndolo o inorándolo, primaba la sostenibilidá.

Hai qu’aparar a apuntar qu’a nivel políticu les sociedaes rurales de l’Asturies tradicional son n’últimu casu dependientes de l’alministración del estáu pero la so economía diaria ríxense de mou autoxestionáu.

La propiedá privada del monte yera un fechu pero tamién equí hai qu’esplicar que nun yera ruina la cantidá de díes de gües de monte comunal y la posibilidá de poner el güevu en ñeru ayenu y que nun hubiere consecuencies negatives, ye dicir, podíen plantase árboles nun monte d’otra persona y garrar el so frutu.

Pero ente los años 50 y 70 del sieglu XX esti modelu de sociedá desapaez.

Les sociedaes rurales pasen a depender muncho más de les alministraciones del estáu: instalaciones d’allumáu públicu, asfaltáu o hormigonáu de los caminos que van a les cases y n’últimu casu pensiones.

Sicasí enta queden rastros de les antigues sociedaes autónomes: cola llegada de les tuveríes de PVC la mayor parte de pueblos instalen agua nes cases faciéndose cargu de llevar el tubu al manantial y facer el depósitu.

Al monte pasa a pasa-y lo qu’al signu llingüísticu: ye inmutablemente monte pero muta.

El monte pasa a nun ser precisu nin pa la xente de los pueblos que yá tien o lleva arrendáu lo suyo y lo d’un vecindariu que marchó a villes o ciudades y dexa de tener valor económicu de primer nivel na vida diaria.

Esto dase pentemedies d’una tresllación que más o menos ye asina: les güertes pasen a finca (pumaraes por exemplu) y les finques, pastos y montes iguálense al plantase d’una especie invasora que da rentabilidá mayor a curtiu plazu pero que nun permite: nin frutu, nin flora aprovechable. Tampoco nun permite pasu a animales, namás el so encueve.

El monte pasa a tener una categoría económica de segunda pal propietariu o la propietaria, unes perres que saca-y cada 12 o 15 años y que valen pa reteyar la corte, iguar l’horru o face-y un regalu a un familiar.

Nun hai que pasar per altu tampoco que n’ultima instancia la persona que baste esi monte anguaño nun suel tener vínculu ningún col entornu. Ye posible que nunca nun vuelva a esi monte nin siquier a esi pueblu. Esto motiva que de nun ser una persona con concencia ecoloxista nun ye raro alcontrar montes estraos de garrafes d’aceite vacíes, envoltorios, etc.

Otra manera’l contestu económicu d’anguaño, de calter capitalista, fai que seya necesario pa la persona que compra la madera que produz esi entornu forestal la saca de la mayor cantidá de madera posible nel menor tiempu posible.

Entren equí en xuegu les pales escavadores y los grandes tratores -nomaos popularmente dingos- por ser esta la so marca más vendida. Vuelve a ser determinante’l contestu económicu porque como dicía al principiu too ye economía. Pala escavadora y trator de saque de madera son, na mayor parte de los casos, trabayadores autónomos que cobren por hores. Trátase de facer la pista pa sacar esa madera (lo más de les veces nun hai más qu’un camín de carru cuando se saca’l primer corte) nel menor tiempu posible. Puntu. Si ruempe la veta de la riega, ruempe. Si hai que cruciar un ríu con truches y el trator pierde aceite hidráulico, cruciase.

Presionando penriba, no cimero de la estructura económica forestal d’anguaño, les grandes beneficiaes: empreses papeleres que compren esa madera.

Nun s’entiende, poro, la tresformación del entornu forestal d’Asturies ensin entender les tresformaciones económiques qu’acontecieren equí nos caberos 70 años.

El monte posiblemente nun faiga más qu’espeyar la realidá asturiana d’anguaño.


L’HUMOR COMO FERRAMIENTA DE CRÍTICA POLÍTICA: UN PERCORRÍU HISTÓRICU,

de Rafael Rodríguez Valdés

L’humor ye un importante factor integrante de la cultura popular, una actividá o una conducta político-social que rique complicidá y qu’a lo llargo del tiempu valió pa lliberar la conciencia humana de les cadenes al amosar la verdá. L’humor, en cuantes que ferramienta de crítica política, llibera y comparte, prepara pa pervivir, refuga la conderga y quita culpabilidá; al cantu y al cabu, evita’l mieu y la resignación al traviés del desorde, la educación y la desestabilización de lo establecío. Con esa fin y dende cuantayá, esploráronse y esplotáronse distintos recursos humorísticos pa desenmazcarar la opresión y pa que fuéramos conscientes del mundu onde vivimos: la parodia, el ridículu, la ironía, la sátira, l’alteridá, ente más otros. Nesti percorríu históricu rescampla cómo l’humor dio en ser elementu tresgresor y catárticu y al empar mediu de llucha política: de Luciano de Samosata a los situacionistes, de Dióxenes de Sínope a Jonathan Swift, de Bulgákov al movimientu italianu del 1977… Asina les coses, yá Karl Marx solliñara que la historia pasa per bien de fases primero de sapozar les vieyes formes sociales, sorrayando’l papel de la comedia nesi procesu al envís que la humanidá pudiera ser a separtase con allegría del so pasáu.


1984 D’ORWELL, 70 AÑOS DEPUÉS,

de Rafael Rodríguez Valdés

La novela 1984 de George Orwell ye una crítica aceda y ensin matices pa col nuevu mundu que se configura tres de la II Guerra Mundial. L’autor pinta nesta distopía una dominación total al traviés del modeláu de los pensamientos de les persones, el control coercitivu y el manexu y control de la neollingua, col envís de posibilitar el doble pensar. Too ello pa defendese d’un poderosu y cambiante enemigu esterior. Con ello l’Hermanu Grande va sapozar la historia, reescribiendo de contino la mesma acordies coles sos necesidaes. Novela ambiciosa, con gran diversidá temática y con bayura matices que provocaron desinfinidá de llectures, dio en conformar un universu lliterariu d’impactu mundial, trescalando nel inconsciente colectivu, de cuenta qu’hai quien tienen referencies de la obra ensin siquier lleela. 1984 acullá de la forma frívola y superficial en que s’interpreta dacuando, plantia con llucidez, non ensin dramatismu, cuestiones que nun han dexar indiferente a nengún ciudadanu consciente. Asina les coses, ye bon momentu pa facer un balance y ver cuánto hai de distópico 70 años depués, si sigue poniendo a prueba la nuestra imaxinación y si tovía vamos alcontrar dalgo relevante nes sos páxines que seya d’utilidá a la de comprender el nuestru mundu.


VIVIR SELE, VIVIR CONSCIENTE: ENSEÑANCES DEL CORONAVIRUS,

de Diego Solís


Habíemos dío a trabayar, teníemos comprada una entrada pa un conciertu, tábemos preparando un viaxe y, de sópitu, un día de mediaos de marzu vímonos zarraos en casa por un virus que, nun principiu, parecíanos lloñe.

El confinamientu por mor del andanciu xeneró que los ritmos vitales aselaren y que cuestiones como’l consumu o los niveles de contaminación baxaren a niveles históricos; un estudiu de la la Universitat Politècnica de València incluso constató que los cielos españoles taben de media un 64% más llimpios.

Ciertamente, si nos paramos a cavilar, ¿nun será que l’estilu de vida que llevamos xenera desequilibrios climáticos? ¿nun será qu’esos desequilibrios aumenten la probabilidá de que lleguen pandemies? ¿nun será que la llamada «normalidá» nun yera tala? Siguir igual qu’enantes de marzu de 2020 sería, según dellos espertos, continuar alimentando a la mesma maquinaria que, de mano, nos causó malura.

Asina’l virus ta dándonos unes pautes pa una nueva mena de vivir «sele y consciente» que tien, pal mio entender, tres pegoyos: la empatía, la humildá y la mesura:

Fai falta empatía pa facenos conscientes de la nuesa fraxilidá, y de la importancia de cuidar al otru, conocíu o non, frente a la enfermedá; toos somos vulnerables y toos somos sustanciales.

Ye necesaria humildá pa comprender que nun somos lo único importante nel planeta; de fechu solo somos, según el sociológu Boaventura de Sousa Santos, un 0,01% del mesmu polo tanto ¿por qué nos permitimos el luxu de perxudicar al 99,9% de la biodiversidá que nos arrodia?

Y, a lo cabero, precísase mesura nel consumu y nos ritmos de vida, pues nun necesitamos tanto, nin a tan baxu preciu, nin tampoco tan inmediatamente, si nun queremos romper con esa empatía y esa humildá.

Pa rematar, según l’estudiosu Jorge Riechmann habemos d’aspirar a «romper les inercies mortales. Deprender del trauma. Sentir. Alendar. Contemplar. Caminar. Trabayar. Amar. Esos verbos esenciales». Que’l virus sirva pa que vivamos sele y d’una mena consciente y que venga, como diz el cantar, «un tiempu meyor».


¿POR QUÉ YE TAN IMPORTANTE LA SIDRA N’ASTURIES?

d’Inaciu Galán y González

Magar qu’esisten munchos otros sitios d’europa y del mundu onde se fai sidra, les pallabres clave p’atalantar eso que mos estrema como un verdaderu país sidreru, son trés cultura sidrera.

Beber sidra o inclusive producilo, nun fai qu’un territoriu tenga necesariamiente un venceyamientu cultural especial con esi productu. N’Asturies prodúcense alimentos y bebíes que malapenes xeneren impactu na cultura y na sociedá.  Sicasí, cola sidra asocede otra cosa. Nun sabemos con seguranza dende cuando facemos sidra, pero sí que trescaló na cultura asturiana de munches maneres dende va sieglos.

La cultura sidrera asturiana ta presente na configuración de les unidaes productives del campu asturianu: les caseríes. Estes tienen nes pumaraes unu de los sos componente imprescindibles, que configuraron una parte importante del paisaxe. La cultura sidrera marca’l calendariu: el tiempu de mayar, el tiempu de corchar, la primer sidra l’añu…

Y la sidra entemezse cola música, la lliteratura, les formes d’ociu: la configuración del chigre como espaciu social, colos cantares, les espiches como manifestación d’espardimientu y esfrute de la gastronomía, pero sobre manera de la compañía.

Ye por ello que nos años caberos ta trabayándose pa que la cultura sidrera asturiana seya reconocida como Patrimoniu Inmaterial de la Humanidá, lo que-y daría una importantísima proyección. Les alministraciones lleven años declarando bebida oficial a la sidra, y cada vegada ye más normal velo nos actos oficiales. Amás ta faciéndose güecu na alta gastronomía y xenerando productos nuevos o evolucionaos, como la sidra brut, la sidra de xelu o los vermús de sidra.

Estos avances nun habríen facenos escaecer que la responsabilidá de curiar la cultura sidrera asturiana y consiguir que siga siendo una parte importante de la nuesa sociedá, ye tamién de nueso.  Fai falta siguir tresmitiendo a la reciella les tradiciones: pañar la mazana, mayalo, echalo al llagar y dexalo pingar, tomar la sidra’l duernu con castañes nos amagüestos, na seronda, metelo a los toneles y a les pipes, corchar…

Y yá de mozos, saber echalo y saber bebelo. Con responsabilidá y tamién curiando los usos llingüísticos, porque nun perder la forma de llamar a les coses del mundu sidreru pol so nome, ye tamién protexer y da-y futuru a la sidra y a la so cultura, una parte perimportante de la cultura asturiana.

¡Qué bien llueu podamos tomar unos culinos y compartir el vasu otra vuelta! Pero siempres de sidra fecho con mazana d’Asturies, yá seya amariega, arbeya, coloraoa, durona, llimón montés, raxona, solarina, sucu, xosefa, xuanina o cualesquier otra triba, siempres que tengan la garantía de producise equí, n’asturies, que ye lo que garantiza la DOP Sidra d’Asturies.


AZOTES POR INDULXENCIES EN SABUGO: LA HESTORIA DE FRAY PEDRO ALONSO, CONDERGÁU POLA SANTA INQUISICIÓN,

d’Arantza Margolles Beran

Fala Didieu, na obra magna de Bartolomé Benassar al rodiu de la Inquisición o del Santu Oficiu español, qu’hebo n’esta cuatro tiempos bien diferenciáos. Y que d’una dómina a la otra foi faciéndose sinon más benevolente, sí más reservada a la hora de matar o de castigar munchu.

Y esta hestoria que vos voi cuntar asocedió nesos tiempos caberos nos que la influencia del, vamos nomalu asina, el Borbón llistu, va notase y munchu n’esa benevolencia de la Inquisición. Ye en 1778. Esi añu, una muyer d’Avilés, María Antonia Rodríguez, confiesa que hebo un relixiosu del conventu de La Merced, nel barriu de Sabugo, que-y mandó facer coses vergoñoses dafechu.

Diz la muyer que fray Pedro Alonso, mercedariu’n Sabugo, y mandaba azotá-y nel traseru. Dái unes bones tundes. Pa averase, dicia él, a Dios. Que a ella, probina, -y daba munchu noxu aquello, y qu’el decía qu’entós, yera meyor. Que yera meyor azotar con repunancia y ascu pa averase al cielu y a los santos. Y que cuando acababen con aquel tingláu, fray Pedro Alonso-y besaba y llamía por tola cara, y toles manos, y los pies, n’agradecimientu.

Nun foi la única María Antonia. Nel procesu xudicial qu’entá güei caltenemos decenes d’avilesinos, y d’avilesines, dixeron tamién ser víctimes de les proposiciones indecentes de fray Pedro. Son diecisiete páxines enllenes d’una filia que, ensin embargu, tenía una explicación. Nun facía tanto, foi en 1777, que Carlos III prohibiera la autoflaxelación, el facese dañu a ún mesmu na creencia qu’eso facía qu’ún tuviera más cerca del mundiu espiritual. Una creencia qu’entá va caltenese na dómina de Goya… y angüañu, en dalgunes procesiones de Selmana Santa, ¿verdá?

Pero Fray Pedro Alonso foi más lloñe. Dizse nel procesu que tenía tables de precios. Qu’en función del santu o la virxe al qu’ún quixere congraciase, yeren más o menos azotes. Qu’intentó propasase con dalgunes criáes faciendo con elles coses que nos resultaríen heterodoxes inclusive angüañu, más de 240 años dempués. Insístese nel procesu nel casu d’un matrimoniu que facía tóes estes coses con fray Pedro coles ventanes abiertes, a plena lluz. Y ye qu’aquella Real Orden de 1777 censuraba particularmente la flaxelación pública.

Nun yera esti casu bien referente pa la Inquisición, que nun-y prestó tanta atención como otros casos qu’hebo n’Asturies, n’otros tiempos del Santu Oficiu que diría Didier, como les condenes bien crueles cuantayá pa la supuesta estriga de Xove o la bruxa llanisca. Non. A Fray Pedro se-y condenó a una cosa aborrecible pa cualquiera… menos pa él: a recibir, en castigu de los sos actos… unos cuantos azotes.

IMAGEN DE PORTADA: Stump speaking, de George Caleb Bingham (1853-54)