So la solombra: el minutu y 48 segundos qu’Asturies yá ta vendiendo. L’eclís solar de 2026 va convertir a Asturies n’escaparate turísticu y científicu. Nortes
Falta un añu. El 12 d’agostu de 2026, la Lluna va tapar el Sol y Asturies va quedase a escures. Un minutu y 48 segundos n’Uviéu; daqué menos nel restu. Curtiu, pero capaz de mover hoteles, congresos y hasta ministerios.
La última vegada qu’España esperimentó un eclís total foi en 1905. La próxima va tardar más d’un sieglu. Nun hai segunda oportunidá. Y non solo equí: la solombra va travesar trelce comunidaes autónomes, el primer eclís total visible n’Europa dende 1999.
El Gobiernu central yá implicó a trelce ministerios porque se calcula que más de 17 millones de persones van movese pol país para guardalo. En Guadalaxara, los hoteles escosaron places con un añu d’antelación.
Asturies prepárase. Esi movimientu tamién algama a Asturies. Nel momentu d’escribir estes llínees, ye posible que se tean cerrando nuevos planes para atraer visitantes el día del eclís, pero los confirmaos yá marquen la dirección.
El Gobiernu del Principáu, en coordinación col Executivu central, creó un grupu de trabayu para asitiar a la rexón como referencia internacional na observación científica del eclís de 2026. Ente les midíes previstes figuren un alcuentru con espertos de la NASA y de la ESA, amás de la ellaboración d’un mapa de llugares seguros pa siguir el fenómenu.
En paralelu, los conceyos muévense con propuestes propies:
- Uviéu prepara congresos internacionales, trenes especiales y conciertos.
- Xixón apuesta por sidra y terraces frente al mar combinaes con astronomía divulgativa.
- Mieres va tresformar antigües escampaes mineres en miradores improvisaos.
- L.lena ufierta l’alternativa: silenciu de monte y cielos llimpios.
- Y el occidente tamién quier la so cuota de solombra. En Valdés señalóse’l puntu de mayor duración del eclís n’España —110 segundos—, lo qu’asitia al conceyu nel focu estelar d’agostu de 2026.
El Principáu asegura que ta preparáu. Anúnciase un mapa d’observación segura, rutes alternatives y árees con servicios básicos. Van partise gafes homologaes en colexos y van entamase talleres d’astronomía. Amás, actividaes para enllargar la esperiencia: senderismu escontra miradores, patrimoniu industrial reconvertíu n’observatoriu y gastronomía tematizada.
El fenómenu ye celeste; la oportunidá, bien terrenal.
