Marisa Valle Roso entemez mitoloxía, feminismu y electrónica nel single ‘Acebachi’

Marisa Valle Roso vuelve con un tema nuevu: ‘Acebachi‘ Nesti cantar, que ve la lluz acompañáu d’un lyric videu, inspírase nuna cuarteta del ‘Perlindango’ de Cuideiru y, como desplica, reivindica la cigua d’azabache «como elementu de protección» y la figura «de toes eses muyeres que fueron señalaes como bruxes por munchos motivos que nun teníen nada que ver cola maxa» Amás, arrodióse de Xosé Ambás, la salmantina Cristina Len y el cántabru Yoel Molina pa crear esti tema. Musicasturiana.com

Marisa Valle Roso nun apara. Tres de llanzar en setiembre’l discu Cenicientes y n’avientu’l single ‘Salguerinas‘ vuelve con un tema nuevu: ‘Acebachi‘. Nesti cantar, que ve la lluz acompañáu d’un lyric videu, inspírase nuna cuarteta del ‘Perlindango’ de Cuideiru y, como desplica, reivindica la cigua d’azabache «como elementu de protección» y la figura «de toes eses muyeres que fueron señalaes como bruxes por munchos motivos que nun teníen nada que ver cola maxa». Amás, arrodióse de Xosé Ambás, la salmantina Cristina Len y el cántabru Yoel Molina pa crear esti tema.

«Tuvi una temporada restolando muncho na mitoloxía asturiana, en tola cuestión de la bruxería y tenía en mente facer un cantar con ello, asina que contacté con Xosé Ambás -que ye del que siempre tiro pa estes coses- porque nun topaba nenguna cuarteta tradicional que falara de bruxería. Entós cantóme una cuarteta del ‘Perlindango’ y uséla pa esti tema porque me gustaba muncho melódicamente», desplica Marisa Valle Roso sobre l’orixe d’un cantar col que tamién quería homenaxear a la cigua pola «gran fascinación» que siente por esta tradición, faciéndolo amás «dende’l llugar de la bruxa, pa da-y voz».

Asina ye como aportó al estudiu de grabación xunto a dos artistes qu’almira. Per un llau Cristina Len, que trabaya cola tradición sonora del so pueblu Salamanca y la música electrónica en trabayos como Martiago. Pel otru, Yoel Molina, productor d’esi EP y componente de Casapalma, dúu qu’entemez raigañu cántabru y electrónica. «Foi perfecto facer una collaboración con ellos. Yoel foi’l productor pero’l tema compúselo con Cristina Len basándonos nesta idea del ‘Perlidango’; a partir d’ehí foi too surdiendo nun únicu día d’una manera mui natural«, comenta l’artista llangreana ente rises alcordándose de cómo acabaron «baillando toos el ‘Perlidango’ electrónicu». «Foi una esperiencia mui guapa y deprendí munchísimes idees».

Universu Cenicientes

‘Acebachi’ ye’l tema más electrónicu que publicó Marisa Valle Roso hasta la fecha. Sicasí, l’artista matiza que la so carrera nun tien por qué siguir per esta sienda: «céntrome muncho más en facer canciones y estes son les que me marquen el camín musicalmente. A mí esta cuarteta pidíame facer daqué electrónico, pero de repente pueo componer otra cosa que me lleva a otru llugar diferente dafechu». Lo que sí qu’avanza l’artista ye que ta «componiendo coses y van per caminos estremaos«.

Pero enantes de metese nel so próximu discu, Valle Roso avanza que «va haber dalguna sopresina más aparte de ‘Acebachi’» y que va dir «sacando próximamente». «Estos temes tovía formen parte del universu Cenicientes, porque tien muncha rellación con tolo que conlleva esti discu y ye como una continuidá d’él», añade.

Echando la vista atrás, l’artista afirma tar mui contenta col so últimu álbum: «La xente ta recibiéndolo mui bien dientro y fuera d’Asturies, pa mí foi un arguyu el poder tar nominada nos premios de l’Academia de la Música y nunca tuvi tantos conciertos nuna xira; amás queden munchos que tovía nun anuncié». El próximu n’Asturies va ser el 12 d’agostu a les 13h na Plaza Mayor de Xixón, ampliando un tour que yá la llevó per Madrid, Cataluña, Aragón, Galicia, Valencia, Murcia y País Vascu. «Préstame qu’un discu que nació d’un llugar tan propiu, de la nuestra identidá tan característica y nuestra, tea convirtiéndose en daqué tan universal y llevándome a tantos sitios», conclúi Marisa Valle Roso, que con esti ‘Acebachi’ va siguir espardiendo la cultura asturiana perdayuri.