La plaga del denomináu vierme soldáu, detectada primeramente en Folgueras de Cornás, en Tinéu, yá s’estendió hasta’l conceyu de Valdés, onde los insectos apaecieron atropaos en cais, viviendes y esplotaciones ganaderes, inclusive al pie de los tanques de lleche.
Trátase d’unu guxanu que s’alimenta de gramínees y puede causar daños en praderíes y cultivos como’l maíz o’l raigrás. Les altes temperatures y el secañu favoreceríen la so apaición, inusualmente temprana esti branu. Anque nun supon un riesgu para la salú humana, esmolez el so impactu sobro l’alimentu del ganáu. Les autoridaes recoyeron amueses y encamienten utilizar namá tratamientos autorizaos. 🐛
