Rojo: «Ye un añu nel que podemos algamar la permanencia y asentanos na categoría»/ Mi Oviedo
La capitana del Lobas Alimerka cumple 12 temporaes nel club uvieín cola allegría de competir otra vuelta na Liga Guerreras Iberdrola depués d’un ascensu que s’allargó poles cuestiones económiques; esti sábadu reciben al Replasa Beti-Onak nel Florida Arena
Con 18 años llegó a Uviéu y dende entós defende la camiseta del Lobas. Ye Celia Rojo (Lleón, 1997), pivote que disfruta d’una nueva esperiencia na Liga Guerreras Iberdrola col enfotu d’amarrar por fin la permanencia na máxima categoría del balonmanu femenín estatal. Depués de salvar la eliminatoria copera’l miércoles col Rahi Sepisur Córdoba (19-27), la xugadora que cumple la so decimosegunda temporada nel club uvieín atiende a miOviedo hores enantes del ilusionante enfrentamientu lligueru d’esta tarde del Lobas Alimerka, a les 20 hores nel Florida Arena, col Replasa Beti-Onak.
¿Cómo son les sensaciones nesti entamu de temporada?
Mui positives. Ye un equipu que tien ganes de llegar alto. Nos partíos que llevamos amosó una actitú mui bona y tamos con ganes de sumar los mayores puntos posibles nesta primer vuelta.
Güei reciben al Beti-Onak, un equipu ya asentáu na categoría.
Será un partíu duru, yá que tien una plantía mui bona, con xugadores de calidá abondo, pero creo qu’en casa cambiarán les cosas. Venimos preparándolu mui bien, asina que lu afrontamos de la meyor manera posible pa sacar el partíu alantre.
¿Ye optimista col oxetivu de la permanencia?
Sí, creo que ye un añu nel que podemos algamala, asentanos un poco más na categoría. Tenemos xugadores moces que trabayen bien y l’equipu ta xuníu.
No personal, ye toa una vida deportiva en Oviedo. ¿Qué supunxo pa vusté esti ascensu nuevu?
Foi ún de los más especiales por toles circunstancies que pasamos l’añu pasáu. Al final quedamos toes, asina que quiero disfrutalo coles moces y poder siguir deprendiendo un añu más.
¿Cómo vivió la incertidume de saber si l’equipu saldría a competir na máxima categoría?
Foi’l momentu más difícil de tola temporada, porque al final ye un llogru que consigues a base de trabayu y que nun se pudiera consiguir por un tema económicu yera un baxón, sobre manera a la hora d’afrontar la temporada siguiente. Foron unes selmanes un poco dures nes qu’intentamos ayudar al equipu direutivu del club a sacalo alantre. Nesi sen, agradecer al Conceyu, Principáu y patrocinadores que nos dieran l’emburrión.
¿Pesa llevar el brazalete de capitana?
Non, con esti grupu ye mui cenciello, toes remamos na mesma direición y al final namás ye un nome. Toes facemos un poco llabor de capitanes de xemes en cuando.
¿Noten l’apoyu de la ciudá y de l’afición?
Sí, notámoslu. Como dixi, l’Ayuntamientu echónos una mano mui grande, ensin ellos nun pudiéramos sacar l’equipu en Primera. Y por supuesto notamos el sofitu de l’afición, que cada sábado llévanos en tarandines nel Florida Arena.
¿Escaecerá dalguna vez esti San Mateo?
Foi un momentu mui especial poder dar l’entamu de les fiestes de San Mateo y toi mui agradecida al Ayuntamientu por escoyenos pa da-y al botón.