«Ye un premiu que va muncho más allá de la parroquia, ye un premiu a un trabayu n’andecha, nada puede salir alantre si nun hai un grupu de persones que lo faigan», señala’l etnográfo Xosé Ambás sobro’l galardón Moscón d’Oru» en categoría local que foi otorgáu pola Asociación Amigos de Grau a la mazcarada Los Aguilandeiros de San Xuan de Villapañada, de la qu’empecipió los trabayos de recuperación en 2014.
Ambás destaca’l valor positivu d’esti galardón, porque ye una reconocencia del pueblu de Grau a la tradición de la parroquia, y reconoz el trabayu de munches persones como’l suyu y el de Ramsés Ilesies, ceadores del Arquivu de la Tradición Oral (ATOAM), pa recuperar la mazcarada al traviés de los testimonios orales de los mayores y cola collaboración del vecín Álvaro Valdés.
«Depués ta el grupu Xeitu, qu’ayudó a facer los traxes y preparar la comparsa, porque la primer vegada que se fixo namás había trés del pueblu: Pablu, Xuan y Xuanma. Foron la clave pa engranar col pueblu y cada vez hai más xente de la parroquia y de Grau, ensin olvidanos de los collaboradores que dieron el testigu a la xente, al pueblu, porque ye una mazcarada del pueblu pa el pueblu», afirma Ambás.
N’ese sentíu, l’etnógrafu moscón resalta’l trabayu de los vecinos de la parroquia y de los moscones que se sumaron a la mazcarada, como les cases qu’abren les sos puertes para dar l’aguilandu al sonar el cantar «Anxelinos somos, del cielu venimos, bulsina traemos, dineiru pidimos».
«Beneficiu emocional»
«Si nun hai cases, nun hai tradición», señala Ambás, que tamién sorraya que tolos años hai una alcordanza y homenaxe para los informantes y collaboradores que van faltando, como foi Xuacu Baselgas. Tamién pon el focu d’atención sobro los mozos de San Xuan de Villapañada, que collaboren cola comparsa «llevando los tractores». Otru de los puntos que destaca Ambás sobro Los Aguilandeiros ye «el beneficiu emocional pa la comunidá, cómo lo viven y cómo son felices, eso ye daqué bien a tener en cuenta».
Tampoco escaez el etnográfo que, cola recuperación de Los Aguilandeiros, «ponse a Grau nel mapa de les mazcaradas de la península ibérica, atrayendo a fotográfos tan importantes como Cristina García Rodero, lo que da un material gráfico impresionante al conceyu. Ye daqué bien importante pa la parroquia, pa Grau y pa Asturies». Amás, epondera l’impactu que tuvo na infancia del conceyu, que trabaya la mazcarada nos colexos públicos de Grau como material curricular. «Eso ye impresionante», conclúi.
