El calor y la seca amenorguen la producción de lleche y encarecen l’alimentación del ganáu.
Los ganaderos sollerten del estrés térmicu nes vaques, mientres el preciu de la paya dispárase. Tenrales y vaques de lleche sufren el calor y la seca. La única solución que ven los ganaderos ye esperar a que’l tiempu ameyore, apunta Hermes Naredo, ganaderu Villaviciosa.
El estrés térmicu y la falta de camperes repercute na cayida de la producción de lleche. Un la ganadería de Villaviciosa tienen 27 vaques en cato y cada recoyida en condiciones normales saquen 140 llitros, agora tan solo recueyen 110. La fertilidá de les vaques tamién puede vese afectada.
Según datos de URA, la seca provocó un fuerte encarecimientu de los alimentos para’l ganáu respectu al añu pasáu. La tonelada de paya pasó d’unos 30 a 70 euros, la veza de 130 a 170 y la yerba de 90 a 120 euros.
La seca dexó baxo mínimos dalgunos bebederos d’El Puertu Cuana, en Cangues d’Onís, con animales que lo tienen mui difícil pa beber.
Los ganaderos afectaos demanden dalguna solución que pasaría pola construcción d’una balsa o depósitos, una opción esta última que yá estudien los responsables municipales.
N’El Puertu Cuana, al Norte de Cangues d’Onís, el ganáu qu’usa estos pastos comunales alcuentra dalgunos bebederos que malapenes tienen agua, un problema que medró esti branu. Falta agua y, amás, los accesos rodados tán en males condiciones.
Reforzar ún de los bebederos de Cuana con un depósitu d’agua ye una de les soluciones que se baraxen dende l’Ayuntamientu de Cangues d’Onís.
