El cocineru mierense llevó sidra de Trabanco para enseñar al presentador cómo había que tomar un bon culete. LNE
El gran culete americanu: la estrella de la televisión Jimmy Kimmel echa sidra asturiano col chef José Andrés. L’escanciáu de sidra natural asturiana llegó a unu de los programes estrelles de la televisión estadounidense, el «llate night» de Jimmy Kimmel. Foi’l chef mierense José Andrés, convertíu nel cocineru llatinu de referencia en EE UU, quien enseñó al presentador y cómicu a echar nel so últimu programa.
José Andrés, qu’allegó vistíu con una camiseta de la selección d’Ucrania (colos mesmos colores, azul y mariellu, de la bandera d’Asturies) allegó a presentar el so últimu llibru «Spain My Way: Eat, Drink and Cook Like a Spaniard».
Kimmel echó un culete de sidra Trabanco, el mayor productor d’Asturies, que José Andrés llevó al plató. El cocineru asturianu esplicólu cómo había qu’echar: “Agora llevantes la botella.Y depués, mientres tas enriba y el vasu ta embaxo. Dexes cayer un chorrito finu. El chorrito va chiscar el cantu del vasu”.
Como vía que Kimmel taba dispuestu a enllenar el vasu, alvirtiólu: “Pero nun sirvas tantu. Sirves un mizcu”. El presentador preguntó-y por qué y el cocineru esclariólu que la sidra compartíase. “Tol mundu tien que beber un pocu”.
Darréu, y como la meyor manera de presentar el so llibru yera faer una de les recetes, púsose a cocinar tortiella de pataques. En realidá, foi una “tortiella vaga”, onde les pataques son de bolsa. Kimmel llevaba mandil y José Andrés la camiseta d’Ucrania, el país que ta xugando “el partíu más importante, pola llibertá y la democracia”, dixo
Nun ye la primer vegada que los espectadores estadounidenses ven a una celebridá echando sidra natural asturiana. La última vegada anterior asocedió na primer vera pasada, cuando s’emitió en CNN la serie documental protagonizada por Eva Longoria titulada “Searching for Spain”. L’actriz, que vieno buscar el so raigaños asturiana precisamente al pueblu balmontín de Longoria, faló de los sos oríxenes nel Principáu y echó sidra.
