L’eclís viose n’Asturies de manera desigual. Ún de los meyores sitios onde pudo vese l’eclís n’Asturies foi nel puertu Payares onde yá a primer hora de la tarde había gran espectación. En parte porque munches persones qu’escoyeren otros llugares pa ver l’eclís, especialmente na mariña, decidieron movese hasta ellí onde la bona visibilidá paecía que taba garantizada.
N’Avilés, un bon númberu de persones diérase cita a primer hora de la tarde pa ver l’eclís dende la esplanada del centru Niemeyer. Un espaciu que convidaba a una bona visibilidá pero que quedó torgáu poles nubes. Entá con too, munchos decidieron quedar.
N’Uviéu, n’El Monte Naranco cortárase’l tráficu. Púnxose en marcha un dispositivu especial de tresporte públicu pa favorecer l’accesu pero, a metá de la tarde, instalábase nesi puntu una trupa borrina. La empresa de tresportes urbanos d’Uviéu decidió adelantar la baxada.
Les nubes fueron les grandes protagonistes de la xornada
Alredor de les 19:30 empezaba la espectación nel cielu asturianu, coles miles de persones movíes asitiaes pelos diferentes puntos d’Asturies pa disfrutar del eclís.
Sicasí, les nubes, presentes a lo llargo de tol día, fueron les grandes protagonistes na mayor parte del territoriu, torgando a los asistentes poder disfrutar de la visión directa del Sol clisáu. Munchos siguiéronlu dende’l móvil.
Nun pudo vese na mayor parte de la mariña, en llugares como Xixón y Llanes, nin tampoco en Grau o n’Uviéu, onde amás se llevantó la borrina.
Lo que sí que se pudo ver, a pesar de les nubes, ye cómo’l cielu s’escurecía dafechu per daqué más d’un minutu.
Sí llogró dexase ver en zones como Tinéu, Ayer o Payares, onde a les 20:27 llegó la totalidá del eclís, pudiendo ver la corona y los detalles del Sol. Una imaxe pa l’alcordanza, que nun volverá vese n’Asturies hasta l’añu 2180.
