LNE acompaña al club raxón na xubida al puertu asturianu para cuntar en primer persona la grabación d’un vídeu que yá ye hestoria de la entidá raxona. Asina foi dende dientro l’ascensión de Capi a L´Angliru, la intrahistoria de la campaña d’abonaos más emotiva del Sporting: una promesa, l’esfuerzu se sesenta persones, llárimes y solidaridá nel «Puertu más difícil del mundu».
José Luis Capitán, Capi, rompió a llorar namás llegar al visu del Angliru. Pero, en realidá, naide pudo contener les llárimes. Tampoco la so muyer, Teresa; nin el so fíu, Bruno, sociu del Sporting; nin Julia; nin Mario y Álex Sabou, los fíos del históricu futbolista raxón al que la ELA llevóse apocayá más d’un añu; nin los barganal de sesenta persones qu’acababen d’emburriar la so siella mientres casi trés hores poles ramples del puertu más duru d’España.
Ellí había familiares, amigos, futbolistes, lleendes del Sporting, periodistes, músicos, trabayadores del club, voluntarios… y tamién muncha xente qu’aquella mesma mañana apenes conocía a Capi.
Les llárimes del montañeru madrilanu afincáu n’Asturies terminaron siendo les llárimes de toa una espedición xunida pa cumplir una promesa. Quiciabes tamién les d’un sportinguismo que güei afaya, al traviés de la campaña d’abonaos del Sporting de Xixón pa la temporada 2026-2027, la intrahistoria d’una de les hestories más humanes que cuntó nunca’l club raxón. LNE acompañó al Sporting mientres tola grabación y foi testigu d’una xornada qu’empezó muncho primero de que les cámares empezaren a rodar. Porque, en realidá, tou empezó’l 19 d’abril.
