27 d’agostu de 1962. Estaos Xuníos llanzó la sonda espacial Mariner 2 dende Cabu Cañaveral con destín a Venus. L’oxetivu de la misión foi volar hasta Venus y devolver datos sobro l’atmósfera del planeta, el so campu magnético, redolada de partícules cargaes y la so masa. #Mariner2
Mariner 2 nun aterrizó y tampoco tomó fotografíes: nun llevaba cámares. La so misión yera científica. Los sos preseos estudiaron l’atmósfera venusina, les temperatures del planeta y les condiciones del espaciu interplanetariu, incluyendo importantes midíes del vientu solar.
La misión asocedió apenes 36 díes dempués del fracasu de Mariner 1 y utilizó una nave de respaldu modificada para intentar nuevamente’l viaxe interplanetariu. Mariner 2 realizó una corrección de trayectoria y llegó a les proximidaes de Venus el 14 d’avientu de 1962, pasando a unos 34.762 kilómetros del planeta.
Mientres 42 minutos arrexuntó datos sobro l’atmósfera y les condiciones térmiques de Venus, apurriendo midíes qu’amosaron un mundu desaxeradamente caliente y cubiertu por una atmósfera apoderada por dióxidu de carbonu.
La nave siguió depués n’órbita heliocéntrica y caltuvo comunicación cola Tierra hasta xineru de 1963.
La misión foi la primera de la hestoria en completar con ésitu un vuelu interplanetariu y un sobrevuelu d’otru planeta.
