Sidoro Villa: «Les torgues (al asturianu) van per otru llau: la invisivilidá crónica nos medios, nos establecimientos, la llaceria educativa de la llingua». 7 díes /
Sidoro Villa Costales (Lieres, 1962) ye’l recién ganador de la cabera edición del Premiu Xosefa Xovellanos cola novela “Camín de Meri”. Maestru de Primaria xubiláu, ente’l so haber como escritor firmó otres obres como “A estaya” (2016), “Tres beyuscos” (2019), “Pielgos de llercia” (2021) y “El fervinchu” (2021), ganadora esta tamién d’otru Xosefa Xovellanos en 2020.
¿Qué trama hai en Camín de Meri?
Camín de Meri son dos histories paraleles y complementaries. Na primera, qu’envuelve a la otra, relátase l’amistá qu’afondia col tiempu ente dos muyeres, Meri y Deli, la primera vieya y la otra moza, que s’atopen en Somundi, un llugar ficticiu de Valdediós. La segunda historia, que ta dientro de la primera, ye’l relatu que Meri-y fai a Deli sobre un viaxe azarientu que fixo nos tiempos de la posguerra per tierres d’Asturies y Lleón, siendo tovía neña, pa recuperar daqué colo que-y arramplaren a ella y la so familia. Camín de Meri ye esi camín y tamién el camín emocional que xunce a les dos. Hai bastantes más personaxes y enguedeyos qu’arriquecen la trama, y otru personaxe esencial na obra que nun ye humanu.
¿Qué-y prestaría que sintieran los llectores al terminar la novela?
La novela reflexa, per un llau, un pasáu recién, y, per otru, una época yá más llonxana. Nesi sen, y dependiendo de la edá, a los y les llectores podrá vali-yos pa conocer un poco eses dómines o pa recordales (directa o indirectamente). En cuantes a la trama, espero que nun los aburra, y los personaxes que-yos resulten atrayibles, que-yos encartien no emocional. Pero nun busco treslladar nengún mensaxe, nunca lo pretendo nes mios noveles.
¿Cómo foi en xeneral el procesu de creación de la novela?
La primer versión d’esta novela escribíla va unos años, casi yá nun m’acuerdo del tiempu que tardé. Debieron ser dos meses, más o menos. L’añu pasáu refíxila quitándo-y muncha paya, o lo qu’entós me paeció paya. Recuerdo pilancos p’avanzar en dellos momentos por cuenta resolver problemes puntuales del argumentu referíos al viaxe qu’entama Meri nos años cuarenta.
¿Cuál foi’l detonante de facese escritor?
Yo escribí siempre, yá facía dalgún cuentucu de neñu, pero, afortunadamente, el pruyimientu de publicar entróme de veteranu. El detonante, nun sé; supongo que dalgo tendríen que ver les llectures que m’estelaron naquella época: acuérdome de los “Sendas”, yeren unos llibros complementarios de los de testu de la editorial Santillana nos años de la EXB qu’esbillaben poemes y fragmentos d’obres y autores clásicos adaptos a la edá. Sobre esto de la lliteratura sigo pensando, igual que Borges, que ye más xuicioso lleer qu’escribir. Pero bueno, ensin aventaos nun diba haber lliteratura.
¿Cómo organiza’l tiempu cuando ta escribiendo una novela?
Pueo tar bastante tiempu ensin poneme a escribir, cavilgando trames, maureciendo idees, pero cuando me pongo a ello necesito un par d’hores al día pelo menos dedicáu al asuntu. Pémeque si afloxo nesa tensión diaria, la xera resiéntese. Cualquier momentu de la xornada me val pa escribir, anque prefiero les primeres hores de la mañana.
¿Cambió daqué’l Sidoro de la primera novela a la d’esta?
Como escomencé cola novela penriba los cincuenta, l’escritor Sidoro yá debía tar, sinón tayudu, sí aperiáu más o menos pal llabor, asina que los cambios d’estilu o ideolóxicos nun pudieron ser fondos. Sí creo qu’ameyoré daqué técnicamente, y a controlar y evitar escesos o esvaríos no narrativo.
¿Ta trabayando nun proyeutu nuevu?
Tengo una novela entamada, sí. A ver en qué para. D’otra manera, volví a facer daqué de poesía rimao como lo que facía antaño pa los mios llibros infantiles; puramente por placer, ye que siempre me prestó esa estaya, nun lo toi pensando en publicalo nin nada de momentu.
¿Un escritor n’asturianu anguaño cuenta colos preseos necesarios (diccionarios, normes, estilos, obres de consulta, etc.) pa desendolcar el so trabayu?
Sí, yo nun echo en falta esos preseos, anque too lo que salga publicao nesi sen d’agabitanos na xera va ser bien acoyío. Les torgues van per otru llau: la invisivilidá crónica nos medios, nos establecimientos, la llaceria educativa de la llingua, en fin, los problemes arreyaos y derivaos de la falta d’oficialidá y reconocencia del idioma.
¿Qué conseyu-y daría a un rapaz que quiera comenzar a escribir n’asturianu?
Si tien enfotu, que tire p’alantre ensin escaecer que manexar con xeitu’l códigu ye casi lo más importante, sobre too na situación que ta la llingua anguaño. Esa ye tamién, creo, una bona razón pa nun tener priesa en publicar: hai que formase primero lleendo a los clásicos y sintiendo falar a los falantes patrimoniales (si topa dalgún per ende).
