Del suelu al techu d’Uviéu en decenes de segundos: la hestoria de Pablo Roces y Ana Ordiales, el ganadores de la xubida a La Xirafa. El ganador absolutu de la prueba, estudiante de Maxisteriu de 22 años, iguala’l récord de 85 segundos para xubir los 345 pasos de los 21 pisos del edificiu. LNE
Xubir 21 pisos no que dura un sollutu. Esactamente en 85 segundos. Ese ye’l tiempu que precisó Pablo Roces para taramiar los 345 pasos de La Xirafa y coronase como’l nuevu rei del techu d’Uviéu.
Esti estudiante de maxisteriu vecín de Pola de Siero non solo impúnxose a los sos 22 años na categoría Open de la tercer carrera vertical al emblemáticu edificiu, sinón que llogró igualar el récord absolutu que l’añu pasáu estableció Diego Nogueira. «Nun me lo esperaba porque yera la primer vegada que participaba», confesó un Fregadures inda faltu d’aire, pero compensáu poles meyores vistas de la capital.
A pesar de la so victoria, el mozu Pablo Roces tiró d’humildá: «Tien muncho más méritu lo que faen los bomberos con tou esi pesu enriba», señaló l’estudiante, avezáu a los trails de monte pero *neófito nel arte de «quemar» cuádriceps en vertical.
La xesta de Roces tuvo retruque femenín y tamién venceyos sierenses. Ana Ordiales, uvieín de nacencia pero tamién afincada na Pola, foi la más rápida ente les muyeres al completar l’ascensión en 112 segundos. La hestoria de Ordiales ye la d’una reinvención: xeóloga de formación con pasáu na minería andaluza, agora entorna los sos esfuerzos en opositar pa ser bombera. El so entrenamientu, «a base de munches escaleres nel Tartiere y daqué n’Avilés», dio los sos frutos nel colosu de la cai Pelayo antes de calzase de nuevu les zapatielles pa correr la prueba popular de 5 kilómetros.
La prueba, integrada nel VI Memorial Eloy Palacio, rexuntó a 120 participantes estremaos a partes iguales ente la categoría Open y la de profesionales. Nesta postrera, l’esfuerzu adquier tintes épicos: los bomberos tienen de engatar pol corazón del edificiu cargando con casi 20 quilos d’equipu d’intervención.
La carrera vertical, creada va dos años como un retu singular dientro del homenaxe póstumu a Eloy Palacio, volvió sirvir d’altavoz para’l compañerismu del cuerpu y para caltener viva la memoria del bomberu nel corazón d’una ciudá que, per un día, mira escontra riba non solo para ver los sos rascacielos, sinón para recordar a los sos héroes.
