La CometCon esplega la so mayor edición en Xixón

Xixón volverá convertise en puntu d’alcuentru para los aficionaos a los videoxuegos, el cosplay, el cómic, la lliteratura y la cultura pop. La CometCon va celebrar, ente esti 4 y 6 de setiembre na cortil ferial Lluis Adaro, la so decimocuarta edición, la sesta qu’acueye’l conceyu, con más de 150 actividaes, alredor de 40 invitaos y delles novedaes coles qu’aspira a repitir les cifres de la pasada convocatoria, que raspió los 25.000 asistentes.

 

«Llevo catorce años diciendo qu’esta va ser la meyor edición de la CometCon, pero bonalmente asina lo creo», aseguró Lasheras, convencíu de que’l maduror alcanzáu pol certame va dexar siguir creciendo. La convención, nacida en 2013, consolidóse como uno de los principales referentes del ociu xuvenil y alternativo del norte d’España y que, como destacó Martínez Salvador, asitia a Xixón «como epicentru de la cultura y l’ociu alternativu».

La principal novedá va ser la incorporación, per primer vegada, del pabellón del Principáu d’Asturies. Los sos 2.000 metros cuadraos van ampliar la superficie disponible con una zona de videoxuegos arcade, realidá virtual cooperativa, propuestes tecnolóxiques y otres actividaes. Tamién va haber un espaciu de más de cien metros cuadraos dedicáu a Nintendo, amás de dos nueves esposiciones, ente elles ‘Regresu al videoclub’, un viaxe señardosu pola cultura cinematográfica de les décades de los ochenta y noventa.