El certame presenta les claves y el cartelu de la trixésimu novena edición, obra del ilustrador chilenu Félix Vega Encina, que pon el focu nel «Elogio del Horizonte». La Selmana Negra de Xixón va premiar la trayectoria de Lorenzo Silva, va homenaxar a Rambal y va cuntar con Barbara Baraldi y Marta Robles, ente otros autores. LNE / #semananegra #semananegradegijón #semananegradexixón / https://www.instagram.com/semana.negra.gijon/
El cartelu que va representar a la Selmana Negra nesta edición ye obra del ilustrador chilenu Félix Vega Encina, quien optó por otorga-y importancia al «Elogio del Horizonte». Al pie de la escultura d’Eduardo Chillida apaecen, amás, una ballena y delles gaviluetes. «Quixi amosar cuántu estrañu a Xixón y a la Selmana Negra. Cuando fui lleváronme a ver la escultura y sosprendióme cuando miré’l cielu al traviés d’ella. Yera una verdadera postal», comentó Félix Vega al traviés d’una grabación.
El xuráu d’esti premiu decidió apurri-y ese «Rufo» a Lorenzo Silva para reconocer «una trayectoria sólida, coherente y fondamente venceyada a la meyor tradición de la novela negra n’español». «A lo llargo de trés décades, la so obra supo combinar l’ambición lliteraria cola capacidá de llegar a un públicu ampliu», destacaron na presentación de les claves del festival.
Una de les cites más especiales de la Selmana Negra va ser la mesa redonda sobro Rambal, coles mires de reivindicar la so figura y recordar cuántu s’escribió sobro la so hestoria. Coles mesmes, va presentase «El llibru futuru», realizáu con poemes inéditos de Xuan Bello, y va rescatase «Una selmana bien negra», de Pedro de Silva, que va ser regalada’l 11 de xunetu a los asistentes a la presentación de «Lo que queda al llombu», les memories dialogaes por Pedro de Silva con Julio César Iglesias.
