La última película de «Los Xuegos de la Fame», rodada n’Asturies, llanza’l so tráiler y amuesa nueves espectaculares imaxes de Somiedu. Trátase del primer adelantu de la nueva precuela de la saga, que’l so rodaxe acoyó’l parque natural el branu pasáu. LNE
Los sos siguidores tán de norabona y Asturies tamién. Esti llunes la productora Lionsgate estrenó’l primer tráiler oficial de la sesta entrega de Los Xuegos de la Fame: «Amanecer na collecha», con escenes rodaes nel Principáu, que’l so estreno en cines ta previstu para’l próximu 20 de payares de 2026.
El nuevu episodiu asitia la hestoria 24 años antes de la saga de Katniss, concretamente na mañana de la siega de la 50 edición de los xuegos.
El Valle de Llagu foi unu de los primeros puntos de rodaxe. La «cornucopia» (estructura central nel sable qu’allugaba’l bañu de sangre inicial de la saga lliteraria) preside’l valle ente la impresionante envoltura del monte asturianu. El camín al Valle de Llagu transita por un ampliu abargane glaciar arrodiáu de praderíes verdes, ríos cristalinos y cabanes tradicionales, siendo xuna de les rutes más sencielles y encamentaes del nuesu territoriu.
El conxuntu lacuestre de Saliencia (Llagu de la Cueva, Llagu Cerveriz y Llagu Negru-Calabazosa), declaráu Monumentu Natural, allugó les últimes escenes rodaes nel Principáu d’Asturies, en concretu na zona del Llagu de la Cueva aprovechando la redolada de l’antigua mina de fierro próxima. Aportar pol Altu de la Farrapona, puntu de partida d’una de les escursiones que más caminantes rexunta, la Ruta de los Llagos.
El Hayendo de Montegrande (Teberga), con un percorríu qu’escurre ente fayes centenaries, texos, abedurios y xardones de gran tamañu foi’l llugar escoyíu pa recrear L’Arena de los xuegos.
El final del camín ye El Xiblu, un impresionante conxuntu de trés cascaes que cayen ente la vexetación con más de 100 metros de desnivel. «Un formosu prau nun monte infinitu», apunten fontes cercanes a la producción, d’acordies coles descripciones que la so creadora Suzanne Collins realiza nes sos noveles.
