La Banda Sonora de Marcos García

Un discu qu’enxamás canses de sentir.

Enantes de ná, quiero davos les gracies por convidame a esta estaya. Fáime una ilusión enorme, de verdá. A ver. Últimamente toi sintiendo muncho muncho a Ferrán Palau. Si pienso un poco más dende una perspectiva temporal más amplia, quiciabes el Family Dinner Vol. 2 de Snarky Puppy de 2016. De Ninghures ta atrapándome muncho tamién.

Si tuvieres que formar parte d’otru proyectu musical, ¿cuál sería?

Tuvi la oportunidá de comentalo fai unos díes con Donald Shaw (Director Artísticu del Celtic Connections de Glasgow): siempre m’interesaron enforma los formatos que nesi festival desendolquen baxo la etiqueta “New Voices”, y modelos afines que fui alcontrando a lo llargo de los años n’otru tipu de festivales. Básicamente, trátase d’un proyeutu que naz d’una comisión (un encargu) que-y propón un festival a un artista (o a trés artistes por añu, nel caso del Celtic) col oxetivu de crear música totalmente nueva y orixinal, pa estrenala n’esclusiva nesi festival. Muncha de la música que más disfruté (y más estudié) cuando trabayaba como músicu son discos que salieron d’ehí y llegaron a mí. Creo tengo tolos discos dende la primer edición de 1997. Prestaríame muncho tener esa posibilidá de volver a crear dende cero con esi formatu algún día.

«Siempre m’interesaron enforma los formatos musicales que nacen d’un encargu que-y propón un festival a un o varios artistes col oxetivu de crear música totalmente nueva y orixinal, pa estrenala n’esclusiva nesi festival»

De los cantares que compusisti o interpretes, ¿cuál ye’l to preferíu?

Teo que confesar daqué: cuento que los temes y los proyectos que compuse nestos años nunca pudieron tresmitise a la manera que yo tenía na mio tiesta. Fuese en grabaciones de discos o n’espectáculos en directo, nun quedé nunca del too conforme con esa traducción de la música que sonaba na mio cabeza con respecto a cómo llegaba al espectador/a. Soi consciente de que ye, mui probablemente, cierta falta de capacidá o habilidá pela mio parte.

Dicho esto, tengo-y un ciñu especial a tolo que fixi con Palabres en 2013 (un proyectu del grupu San Félix de Candás onde m’encargué de los arranchos y la producción xunto a Mapi Quintana, Rubén Bada y Fernando Arias) y, sobremanera, con ERRAI (un enfotu mui personal en forma de suite musical de composición propia pensada al rodiu del curdión diatónicu, el mio instrumentu principal, con 9 músicos a los qu’almiraba ya almiro muncho, arropándome naquel saltu al vacíu).

¿Cuándo foi la primer vez que xubisti a un escenariu y que pasó enantes, durante y depués?

Nun foi un escenariu como tal. La mio primer actuación en público foi nel desfile del Dia d’América n’Asturies de 1997, col tambor asturianu, como parte d’una xuntanza de munchos (munchos…) gaiterxs y tamboriterxs de diferentes formaciones d’Asturies que tocábemos la misma pieza ad infinitum. Aquella tarde deprendí varies coses: a siguir el pasu nun desfile; a garrar bien les baquetes (cayóme una a los 10 metros d’entamar) y daqué más importante: qu’en determinaos contestos, yes muncho más un decoráu que’l centru d’atención.

¿Qué ye lo más inxusto de ser artista?

Sentir fonderamente que tas infravaloráu cuando lo qu’a lo meyor te pasa (probablemente) ye que tas demasiáu enamoráu de la to propia obra. Ye mui llícito y entiéndolo mui muncho, ente otres coses porque lo viví en primer persona y naide pue dicime que nun pasa. La nuestra materia prima ye intanxible: trabayamos colo que más nos importa; suañamos con facer música pa que te sientan; queremos comunicanos y compartirnos con otres persones al traviés del arte. Pero eso nun mos fai meyores per se, nin tenemos ganao nengún derechu universal a que la xente tenga que facenos casu o tengan que tener esi mesmu amor incondicional polo que facemos. D’ehí a la frustración hai namás un pasín bien curtiu y son munchos y munches quien queden ehí.

«Lo más inxusto de ser artista ye sentir fonderamente que tas infravaloráu cuando lo qu’a lo meyor te pasa (probablemente) ye que tas demasiáu enamoráu de la to propia obra. Ye mui llícito y entiéndolo mui muncho»

Si fueres Conseyeru de Cultura, ¿qué son les primeres coses que fadríes?

Escuchar, priorizar, comunicar y rectificar. Quiero pensar que nestes posiciones de tanta responsabilidá hai que sentir a tol mundu (si ye de forma organizada, como nes artes escéniques o nel sector audiovisual, muncho meyor…); hai que priorizar y enfocase no que pue facese y cuándo pue facese; y tamién no que nun pue facese agora; y hai que cuntar lo que se fai, pa que nun se pierda ente’l ruíu diariu del que tamos rodeaes.

Cuento qu’en tolos llaos hai coses que nun se tán faciendo, que se tán faciendo mal, que podríen facese meyor y que tán faciéndose mui bien. Pero nun sé cuánto d’esto acaba llegando a la ciudadanía y a los sectores involucraos. Y si lo que faes nun funciona, ye obligatorio tener l’axilidá necesaria pa camudar, deprender y ameyorar. Si lo mires bien, cuando trabayes nuna posición asina sueles tener, mal que bien, un plazu de 4 años pa tratar de facelo bien. Cuando ties un puestu de trabayu nuna compañía internacional, suelen date un marxe de maniobra d’un trimestre pa poner en marcha toos estos verbos.

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Pues creo que cola música pasome daqué que nun sé si ye mui habitual. Acerquéme proactivamente a ella con unos 12 años y, dende’l primer día de clas, fícelo d’una manera mui pragmática, mui poco telúrica. Seguramente pola falta d’acompañamientu de los mios enseñantes, interesábame poco (o desconocía dafechu, más bien) qué función social tenía esti o aquel instrumentu dientro del contestu cultural n’Asturies. Eso sí, sentía 30 veces al día les grabaciones de Silvino Fernández y Andresín d’Insiertu o los primeros discos de música asturiana que topaba na Biblioteca Pública (fonte de sabiduría infinita y descubrimientu incalculable) con un ciñu análiticu y una fame cuasi enfermiza: ¿Por qué’l tambor sonaba asina naquella parte de la pieza? ¿Cómo podía yo deprender a escribir esos arranchos qu’escuchaba nel Tierra de Felpeyu? Yo quería saber facer eso, saber xenerar eses sensaciones, esos soníos. Pero yera una cuestión puramente técnica, d’aprendiz total. Creo que por eso quedé siempre segundu en tolos concursos de gaita y tambor a los que me presenté, onde me decíen que yera mui “jazzísticu” (siempre me lo decía’l mesmu paisanu, por cierto. Un abrazu, Manolo).

Creo que la conexón sentimental vieno dempués. Descubrir qu’aquello que yo entamaba a facer colos mios instrumentos conectaba muncho más estrechamente de lo que nunca pensara coles mios vivencies y sensaciones más personales: mio pá, cantante d’asturianada (domingos nel Campoamor a fartucar); mio güelu Jamín, gaiteru de Soto d’Ayer (con un amor y respetu pol oficiu que nunca nun volví a ver en nengún otru sitiu)…

Supongo que toles pieces que taben perehí xuniéronse definitivamente. Y decatéme que llograr facer esa música, poder rir o llorar con una forma d’espresase musicalmente que te fai sentir que too encaxa (“onde vuela’l sitiu míu, onde too tien sentíu, onde soi quien quiero ser”) ye imposible de manufacturar. O lo sientes, o nun lo sientes.

Dicho esto, seguramente si tuviese nacío en Nueva Orleans taría tocando’l trombón (o’l curdión diatónicu tamién) cola mesma pasión, pero nun contestu y con un discursu sentimental absolutamente distintu.

«Cuando m’avere a la música desconocía dafechu qué función social tenía esti o aquel instrumentu dientro del contestu cultural n’Asturies. Eso sí, sentía 30 veces al día les grabaciones de Silvino Fernández y Andresín d’Insiertu o los primeros discos de música asturiana que topaba na Biblioteca Pública»

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Tolos que tenemos guah.es de seis años en 2026 van entendeme bien: o Las Guerreras K-Pop en vena o hai pitote. Nun sé yá siquiera si siento culpa. Creo qu’hasta empiecen a gustame. Teo a gala amás decir que conozo yá hasta l’últimu recovecu de la estructura armónica y toles perverses fórmules sonores de destrucción masiva qu’utilicen en toes y cada una de les 10 canciones (11 si contamos los créditos) de Rumi, Mira, Zoey, Jinu y hasta’l gatu. Gracies, Netflix.

¿A qué personaxe públicu convidaríes a un conciertu tuyu, a pasar llueu pel backstage y pa qué?

¿Pa qué sirven esactamente les invitaciones a los backstage? Por trabayu, teo la oportunidá (o la desgracia) de moveme en determinaos círculos onde, si daqué voi sacando en claro ye que, si xeneres interés polo que representes y non polo que yes, ehí nun suel ser. Vuélvese too predecible y aburrío a esgaya. Un poco día de la marmota. Y suel ser lo más habitual, porque’l contestu préstase a eso. Da igual si son palcos d’estadios, zones VIP en festivales o los reservaos nos clubs más esclusivos. Les conversaciones conviértense, les más de les veces, nun puru compromisu con un oxetivu meramente conseguidor y transaccional. Asina que menos back y más front. Menos ínfules y clasismu y más realidá y piel. Y los camerinos, si acasu, p’aislase una migaya de too enantes o dempués de tar nel escenariu, disfrutando de tar faciendo lo que más te gusta en condiciones dignes.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Una película que siempre me prestó muncho ye Kilómetro Cero (de Yolanda García Serrano y Juan Luis Iborra), que tien un zarru de BSO de Ismael Serrano descomunal, que resume perfectamente lo que pasa na película. Asina que tengo-y especial ciñu a les histories cruzaes de perdedores. Y equí Miguel Rojo ye un mayestru: Asina somo nós o Histories d’un seductor (Memories d’un babayu) recueyen de manera mui intelixente eses vulnerabilidaes y eses derrotes (más o menos visibles) que cuento que sedríen un bon puntu de partida.

Asina fala Marcos García de los cantares qu’escoyó pa la so playlist

Cantarea – Anubía Les qu’abrieron el verdaderu camín de munches coses que recién entendemos nesti 2026 (con permisu de Leilía y Mercedes Peón). Esti ye’l meyor entamu d’un discu de la historia. Si nun te conmueve esta harmonía, esta fuerza, esti empaste… ¿qué faes, ho?

El probe Manuel (Xiraldilla) – Rubén Bada. Costóme entrar nel discu de Rubén. Pero vilu per primer vez en directo l’otru día nun de los showcases d’Asturies, Música en Rede y dexóme ablucáu. A mín y a tolos y toles profesionales (programadores, managers…) que taben ellí. En vivo ye una maraviyaa y Rubén ta nun momentu artísticu increíble. Creo qu’una de les munches coses bones que ta xenerando la “galaxia Rodrigo Cuevas” ye l’estándar tan altu al rodiu l’oficiu que ta xenerando en tolxs profesionales que lu acompañen: la puesta n’escena, la creación de narratives acullá de la propia música y un cuidáu diferente hacia’l públicu que ta interesáu en descubrite. Bravo por ello.

S3NS – Ibrahim Maalouf. Tengo una fixación especial colos trompetistes y vigulineros que tomen el so instrumentu como campu base pa esperimentar dende ehí. Tol discu (homónimu) ye una clase maxistral de sensibilidá, pero lo d’esti tema y facer “falar” a la trompeta asina… cómo caminen xuntos tolos músicos, les dinámiques… Too casa. Ye una canción vocal non cantada.

The Trains (Live from NYC) – Angus Lyon & Ruaridh Campbell. Encargué-y esti discu a Javi Tejedor, que tocaba nel 2007 nel Celtic Connections. Angus Lyon convirtióse dafechu nun de los mios referentes musicales más evidentes. 10 años más tarde, yo taba metíu nun avión que me trayía de Miami a Glasgow, onde m’esperaba Angus pa llevame a los estudios Gran’s House (lliteralmente, a so casa en metá de la nada y arrodiau d’oveyes) pa grabar una idea lloca que se mos ocurrió xunto a Xose Lois Romero: Accordtrio.

Por supuestu, esti tema acabó formando tamién parte del nuestru discu. Y Angus convirtióse tamién nun referente vital y bon amigu y tuvo a bien contame que ‘The Trains’ yera cuasi qu’una fábula: nin el tema taba grabáu en directo nin muncho menos taba grabáu en NYC. Qué coses…

Ayande/Tolena – Blima. Blima foi l’entamu de munches coses pa min: de xubir a un escenariu y que la xente t’escuche; d’esperimentar y romper clichés, de llevame al llímite, de componer ya alcontrar una forma d’espresame xunto a músicos y personalidaes mui distintes, de deprender a xestionar tolo que nun yera facer música en sí…

Way Go Lily  – Sam Amidon Canción recoyía por Alan Lomax a Bessie Jones en 1961 (equí la fonte, pa los frikis como yo:). Paez ser un cantar de corru pa neños (afroamericanos), que tien una lletra absolutamente lletal escontra los esclavistes. Denuncia disfrazada de xuegu.

Sam Amidon ye munches coses (¡tamién vigulineru!) y arródiase de xente tan interesante como Valgeir Sigurðsson. Si queréis zarrar el círculu, buscái la versión d’esti tema grabada esti añu xunto al cabra de Pekka Kuusisto y la Norwegian Chamber Orchestra.

Adios la mio vaca pinta – Carlos Fernández Solís (Carlitos el de Murias). 9 años enantes taba Lomax per Asturies, mira tú. La fórmula melismática única d’una canción ayerana, esa potencia al traviés normalmente de voces finines; incluso esa falta d’aire p’acabar les estrofes (propia en munchos casos de la silicosis y la mina…) ye casa pa mín. Carlitos ye’l mio tercer cantante d’ayerana preferíu (pero l’únicu que ta en Spotify): el primeru ye mio pá; el segundu, Tonín de Nembra.

Cutariel.lu – La Bandina’l Tombo. Una xuntanza de bonos músicos non siempre da como resultáu una bona banda. La Bandina’l Tombo demonstrónos en 2004 que sí sabíen selo.

I Asked – Snarky Puppy, Becca Stevens, Väsen. Falando de xuntances: si sumes a Snarky Puppy, Becca Stevens y Väsen pasa esto. Y en directo.

A Desenhista – Ana Larousse. En febreru de 2011, dempués de dar una charra na Universitat Jaume I en Castellón, fui a dar un paséu pela playa. Facía sol pero taba frío. Lo qu’a min más me presta. Pero saltóme esti cantar nel iPod y… fízome polvo pa los siguientes 6 meses. Seguramente taba decatándome de que “la vida pue ser maraviyosa (Daimiel!)” y mui puta tamién, munches veces a la vez.

Importante – Carlos Ares … pero, a veces, la vida ye pura maraviya y yá ta. Carlos Ares (y los cuatro conciertos suyos a los que diremos nesti 2026) ye la meyor banda sonora pa ún de los meyores momentos de la mio vida: el d’agora. Carlos y la so banda son un cañón (y tienen cuota asturiana: Tony Finu). Esta lletra ye, amás, un toque d’atención pa baxanos un poco d’esta ñube de yoísmo cola que tamos tol día engarriaos y engarriaes. (Y otra pa frikis: equí repítese una fórmula harmónica qu’apaez nel últimu tema de les amigues del K-Pop. A ver si lu descubrís!)

Onde la mar – Balandrán. Namás pueo dicir que l’intentu de versión que ficimos en Blima d’esta preciosidá nun-y fai xusticia (lo de poner a funcionar les idees tal y cómo les pienses…). Ensin dulda, una de les bandes que, de tar actives güei, más taríen petándolo a nivel estatal. Cero dudes.

Josefa – Arriba Limón – Mapi Quintana & Elías García. Seguramente naide lo sepa, pero esti tema tien una pista de curdión (grabada por mi) que nunca nun s’incluyó na mezcla final (y menos mal!). Daquella taba mui apegáu a Mapi y Elías; ayudábalos en tolo que podía a nivel xestión y esi día peleéme un poco con ellos naquella casona de Campumanes porque yo creyía (y sigo creyendo) qu’esti discu merecía tomes d’estudiu y non grabalu en rigurosu directu (ta grabáu en directu, chavales!!). Creo que pa que dexara de refunfuñar un ratu, dixéronme que probara a grabar unes tomes pa esti auténticu single. Fici lo que pude, pero taba claro que yo nun aportaba nada musicalmente a esta xoya. Siéntome un privilexáu teniendo vivíos ciertos momentos, y esti grábolu mui dientro de min.

Hopopono – GoGo Penguin. Creo qu’una de les bandes que más veces ví en directo. Una de les meyores muestres de que trés músicos puen facer una música amplia, expansiva, infinita.

Nueva Internacional – Egon Soda. Gústame tanto esti tema que quixi usalu como entrada pa una charra que fixi nos Premios TikTok del añu pasáu. Yo sabía que marchaba pa otru trabayu, asina que la xestión de riesgos yera controlable dafechu. Teníeis que ver les cares de lxs xefazxs cuando sonaba l’estribillu…

Falun Fine (Return) – Aidan O’Rourke. El mio interés polos vigulineros ñació’l día que descubrí a Aidan O’Rourke ya el so discu Sirius (el so primer discu, frutu de la comisión que-y encargó el Celtic Connections en 2003). Ye, enson dulda, el músicu que más m’inspira y col que más deprendí y sigo deprendiendo. El conceptu de la primer parte d’ERRAI (habrá otra?) inspírase fondamente nesta obra. Esti tema ye l’últimu, zarra’l círculu de discu y vuelve a abrilu al empar. Un fenómenu.

Tan feliç – Ferrán Palau. Siento qu’agora mesmo la música fecha en catalá, xunto a lo que se ta faciendo en Galiza, ye de lo más interesante que ta asocediendo nel estáu español a nivel creativu. Flípame tolo que fai Ferrán, Maria Jaume, Oques Grasses… Son un universu propiu, con un mercáu propiu, que son capaces de conmover a los non catalofalantes.

Corales na Montaña – Herbamora. Otru de los regalos de la vida. Nun pudi poner el mio nome a llau del d’Elías y Mapi. Pero enantes d’eso llevaba yá cuasi un añu trabayando con él y con Ruth Suárez nos arranchos del EP N’Acusticu de Herbamora. Elles confiaron en nós y dexáronnos les manes llibres p’arropar les sos voces. Nós intentemos traducir lo qu’elles queríen cuntar. Mira! Quiciaves la escepción que confirma la regla: d’esti arranchu sí que toi especialmente arguyosu.

El Cámbaru Skamáu (Bestiariu II) – Skama la Rede. Cuando vives fora d’Asturies y tienes un guah.e, la serie discográfica Bestiariu conviértese na meyor aliada p’amosa-y a esi neñu que, ellí enriba, onde viven los güelos paternos, fáense coses mui molones nuna llingua distinta. Y ponémonos a berrar una y otra vuelta nel coche coles aventures del Cámbaru Skamáu.

Como la flor – Igor Medio, Lisardo Prieto. Les meyores lletres son les que dicen más con menos. La dulzura nun necesita de grandes aspavientos, porque dexa posu de por vida.