El pabellón d’Asturies na Feria de Muestres conviértese nuna gran esperiencia interactiva sobre’l tresformamientu d’Asturies nos 45 años del Estatutu d’Autonomía. 7 Díes Baxo’l lema Asturies yes tu, la esposición va permitir descubrir la evolución d’Asturies dende l’aprobación del Estatutu d’Autonomía hasta anguaño.
El Gobiernu va convertir el pabellón d’Asturies na 69.ª edición de la Feria Internacional de Muestres d’Asturies (FIDMA) nun percorríu interactivu pelos 45 años d’autonomía.
Baxo’l lema Asturies yes tu, la esposición propón a les persones visitantes descubrir, d’una forma participativa y inmersiva, cómo evolucionó Asturies dende l’aprobación del Estatutu d’Autonomía hasta configurar la comunidá actual. El percorríu rinde tamién homenaxe a les xeneraciones d’asturianes y asturianos que, dende ámbitos bien diversos, ficieron posible esa evolución coleutiva.
La vicepresidenta del Principáu, Gimena Llamedo, presentó ayeri miércoles el conteníu d’esti espaciu espositivu, que va ser la primer parada d’un programa d’actividaes que van desendolcase mientres los próximos meses por toa Asturies con motivu del 45º aniversariu del Estatutu.
“Queremos que lo qu’entren nesti pabellón percuerran la hestoria recién d’Asturies d’una forma distinta, participativa y cercana. Estos 45 años d’autonomía permitieron impulsar un fondu tresformamientu y esa evolución merez ser conocida, compartida y tamién celebrada. Pero, sobremanera, queremos reconocer a les xeneraciones d’asturianes y asturianos que, col so trabayu, el so talentu y el so compromisu, contribuyeron a construyir l’Asturies que güei conocemos”, señaló.
El percorríu amuesa les meyores rexistraes n’ámbitos como la sanidá, la educación, l’emplegu, la igualdá, la movilidá, la cultura o la ciencia, xunto a aquellos elementos que formen parte de la identidá coleutiva d’Asturies, como’l paisaxe, el patrimoniu natural, el modelu territorial o la cultura propia.
Pa Llamedo, “Asturies yes tu fala d’una autonomía construyida ente toes y toos. Una hestoria coleutiva que permitió a Asturies avanzar n’ámbitos fundamentales como la sanidá, la educación, la igualdá o la innovación, y caltener coles mesmes la capacidá de conservar aquello que forma parte de la so identidá”.
La propuesta combina memoria ya innovación pa que’l públicu pueda esperimentar en primer persona esa evolución. Los que visiten el pabellón van poder afayar cómo se remana un robot quirúrxicu, esplorar les posibilidaes de la intelixencia artificial y asistir a demostraciones en vivo, como’l funcionamientu d’un humanoide utilizáu por Idonial. L’itinerariu tamién convida a pasiar pela hestoria de la Universidá Llaboral o percorrer dalgunos de los museos d’Asturies por aciu de la realidá aumentada y viaxar pela evolución teunolóxica de les comunicaciones, dende les antigües cabines telefóniques hasta los teléfonos intelixentes. Amás, va permitir comprobar cómo camudaron les escueles, les ambulancies o’l seutor pesqueru a lo llargo d’estes cuatro décades y media.
L’espaciu incorpora propuestes empobinaes a tolos públicos, como videoxuegos retro, dellos photocalls distribuyíos pel percorríu y dos fotomatones que van permitir al que se detenga nel estand recrear la so presencia en dellos de los acontecimientos más representativos d’estes últimes décades.
La Radiotelevisión del Principáu d’Asturies va tener un protagonismu especial nel pabellón por cuenta de la conmemoración del so vixésimu aniversariu. TPA y RPA van treslladar parte de la so actividá a la feria y van emitir dellos programes en direuto p’averar al públicu’l trabayu que se desendolca detrás de les cámares y los micrófonos enantes del entamu d’una emisión.
La programación va completase con un xuegu inspiráu n’El Picu, unu de los concursos más populares de TPA, nel que les persones participantes van poder poner a preba les sos conocencies sobro l’autonomía asturiana y optar a distintos regalos.
“Esti pabellón mira al futuru dende l’arguyu pel camín percorríu, esa Asturies que decidimos caltener y protexer. Innovación y tradición formen parte de la mesma Asturies y esa convivencia ye precisamente la que queremos compartir con quien visiten la Feria Internacional d’Amueses”, concluyó la vicepresidenta.
