El pasáu nun contien tan solo’l relatu de los guerreros y les sos fazañes. La nueva mirada de l’arqueoloxía fálanos de la xente común, de dambos sexos, de la so organización social y de les sos formes de vida.
Asturies alluga más de doscientos castros fortificaos, les primeres aldegues del nuesu territoriu, fundaes fai casi 3.000 años. Nelles vivíen les xentes a les que los romanos llamaríen tiempu dempués “ástures”. Dedicábense a l’agricultura y la ganadería y en dellos llugares tamién a la minería y la metalurxa: el cobre de les mines asturianes foi atopáu en diversos enterramientos del norte d’Europa, a miles de kilómetros d’equí.
Les escavaciones arqueolóxiques de los castros fálennos de ciertu costumes que coinciden en bona midida colo descrito polos xeógrafos romanos: la importancia de les muyeres y una rara igualdá de clases, n’una sociedá na que probablemente nun hubo élites económiques. Pero tamién nos dexen el misteriu del so mieu: ¿qué yera lo que tarrecíen para arrodiar siempres los sos asentamientos con grandes muralles y fondos fosos?
Ánxeles Casu, en compañía de voces espertes, vive l’aventura de cuntanos el pasáu prehistóricu d’Asturies con rigor, cercanía y pasión, contribuyendo a camudar la nuesa visión y los nuesos estereotipos sobro les xentes d’aquelles dómines.
