Arantza Margolles Beran gana’l Premiu Alfonso Iglesias de cómic n’asturianu pola obra Slečno.
¡Norabona a Arantza Margolles Beran, ganadora del XVIII Premiu Alfonso Iglesias de Cómic! L’autora xixonesa ye la primer muyer en facese con esti gallardón, que lleva cola obra Slečno, narración que garra la forma del diariu de viaxe d’una asturiana con raíces en Moravia que viaxa a Olomouc p’aprender la llingua checa y poder asina averase al pasáu de la so familia. Xixón al día / La historiadora y periodista xixonesa narra una hestoria basada nos sos oríxenes familiares centroeuropeos.
La decimoctava edición del Premiu Alfonso Iglesias n’asturianu, convocáu pola Conseyería de Cultura, Política Llingüística y Deporte, recayó na autora xixonesa Arantza Margolles Beran (1982) pol so cómic Slečno. La obra inspírase nel diariu de viaxe d’una muyer asturiana con raíces en Moravia que se tresllada a Olomouc p’aprender el checu y asina averase al pasáu de la so familia.
Ente los valores de la obra premiada, los miembros del xuráu destacaron nel acta «la orixinalidá y la coherencia de la propuesta gráfica, y la espresividá cola que se da forma a una historia personal entemecida cola memoria histórica familiar y social». Margolles construye asina un relatu de fuerte carga personal y emocional qu’enxareya lo íntimo y lo colectivo pa encarar, dende’l llinguaxe del cómic, una historia vinculada a la memoria histórica familiar y social.
El xuráu d’esta edición tuvo compuestu pol filólogu Marcos Martínez, la ilustradora Mónica García y l’escritor Agustín Cernuda del Río, ganador de la última convocatoria. Nel acta, les sos integrantes destacaron “la orixinalidá y la coherencia de la propuesta gráfica, asina como la espresividá cola que se constrúi una historia personal que s’entemez cola memoria histórica familiar y social”. Margolles articula un rellatu de fuerte carga emocional con una reflexón sobre la identidá y la memoria.
El Premiu Alfonso Iglesias, promovíu pola Conseyería de Cultura, Política Llingüística y Deporte, ta dotáu con 6.000 euros y inclúi la publicación de la obra ganadora. A la convocatoria podíen presentase trabayos inéditos, non premiaos n’otros certames, de temática y estilu llibres, yá fuera en forma d’historia única o de conxuntu de rellatos, con una estensión mínima de cincuenta páxines.
Arantza Margolles Beran ye llicenciada n’Historia pola Universidá d’Uviéu y cunta con estudios de posgrau pola Universidá Autónoma de Madrid. Collaboró en diversos medios de comunicación asturianos y ye responsable de la sección d’efemérides del diariu El Comercio. Coles mesmes, presentó’l programa Histories y Misterios na RTPA y ye codirectora del periódicu A quemarropa, vinculáu a la Selmana Negra de Xixón. En llingua asturiana, ye autora de Fuimos granos d’arena. La solidaridá n’Asturies énte’l desastre d’Annual (2004) y de la novela histórica Santu Amaro, obra cola que llogró’l Premiu Muyer d’Ediciones Trabe nel 2025.
