El «estrañu» fenómenu que se dibuxó nel cielu de Turón (y non, nun ye un ovni): «Tuvimos que parar el coche para fae-y foto». Luisa María Paz captó imaxes d’un peculiar aru negru, identificáu como un vórtice toroidal. LNE
Lo que diba convertise nun trayectu normal d’un puntu a otru de Turón, acabó siendo la revelación d’un fenómenu pocu habitual. Luisa María Paz viaxaba nel so coche cuando, al altor del pueblu de Cuadriella, vio nel cielu daqué «estrañu». «Yera como un aru negru bien marcáu, nun entendíamos qué podía ser», esplica Paz. Por eso decidió parar el coche y fae-y semeyes.
La instantánea, n’efectu, amuesa esi aru negru», similar al que se ve nos dibuxos animaos cuando hai una esplosión. Paz allugalo, más o menos, pel monte de La Ceposa (Turón). «Pensamos que podíen ser bichos pero se víen bien marcaos y taben demasiáu llueñe», esplica. La primer fotografía fícela a les 21.09 hores, la postrera a les 21.11 hores. N’apenes dos minutos el círculu negru sumió.
«Tuvimos tola tarde pensando qué podía ser, hasta que-y metimos les imaxes al buscador de Google y dionos la respuesta: un vórtice toroidal», esplica Paz. Trátase d’un fenómenu que se produz cuando un fluyíu, líquidu o non, xira formando un aníu paecíu a un donut y avanza ensin desfacese de momentu.
Lo qu’apaeció esti sábadu en Turón ye l’exemplu más fácil de ver, yá que yera un aru de fumu marcáu. «Nun yera solu fumu llexando, sinón aire en movimientu que rota sobre sí mesmu y abasna eses partícules visibles», esplica agora Paz, que trabaya nel Centru Tecnolóxicu de la Información y la Comunicación (CTIC).
