L’alumnáu del Colexu Públicu Peña Tú de Llanes publica’l single y videoclip ‘Pericote Peña Tú’. Ye’l resultáu d’un proyectu educativu coordináu por Vítor Carbajal pa que los y les escolines s’averen a la música tradicional y a la producción musical.
El Colexu Públicu Peña Tú ta acabante d’asoleyar en toles plataformes musicales el single y videoclip ‘Pericote Peña Tú‘, una pieza musical que naz gracies al trabayu desendolcáu na asignatura de Música de la escuela y que permitió que l’alumnáu d’Educación Primaria s’averara y deprendiera de la música tradicional del Oriente d’Asturies y del conceyu Llanes, partiendo d’un tema tan sonáu pa esta fastera como ye ‘El Pericote’.
Esti proyeutu ta dirixíu y producíu por Vítor Carbajal. El desarrollu de tol procesu d’enseñanza-aprendizax enfotóse a tola etapa d’Educación Primaria de manes de Carlos José de la Fuente y el propiu Carbajal, dambos mayestros d’Educación Musical nel Colexu Públicu Peña Tú. Xunióse-yos darréu Ángela Meana.
Nel segundu trimestre d’esti cursu 2025-26 desendolcóse la presentación, análisis y aprendizax del emblemáticu tema y foi nes primeres selmanes del mes de mayu cuando tol alumnáu de Primaria participó nun procesu de grabación por pistes nel estudiu de la Escuela de Música Tradicional y la Banda Gaites Llacín de la que tamién ye director Vítor Carbajal.
El resultáu final axunta dos llínies interpretatives: la versión más instrumental del ‘Pericote’, cola base de gaita y tambor, y la versión cantada acompañada de percusión tradicional (pandereta, panderu y tambor). Too ello baxo una llínia conceptual d’instrumentación escolar que da como resultáu una versión emocionante na que rescampla la instrumentación y les voces blanques de tol alumnáu d’Educación Primaria del Cole Peña Tú.
Participación del alumnáu en toles fases
Nel apartáu téunicu contóse con Sergio Rodríguez y Olaya Llucía Díaz de Tutu Estudios, quienes s’encargaron de la grabación, mezcla y masterización. Xunto con ellos trabayaron tamién Dani Álvarez y Kai Martínez, esti últimu encargóse de la toma d’imáxenes durante’l procesu de grabación, dando como resultáu el videoclip.
Dende’l planu musical hai que destacar el sofitu de les Escueles de Música Clásica y Tradicional, asina como a la Bandina y Banda Gaites Llacín pol apoyu téunicu e instrumental. Tamién hai que destacar la collaboración de los tres Bandos de Llanes pal trabayu d’adaptación a una versión musical qu’axunta les estremaes llínies interpretatives nuna llinia especial adaptada a les voces blanques infantiles de la Villa.
Esti proyeutu enmárcase nuna de les llínies metodolóxiques propuestes pola LOMLOE: l’Aprendizax Basáu en Proyeutos (ABP). Dende esta perspeutiva, l’alumnáu abordó l’estudiu de la música tradicional magar los saberes básicos establecíos pal área d’Educación Artística. Nun entamu, trabayáronse los elementos del llinguax musical imprescindibles pa la interpretación y comprensión de la obra seleccionada. Llueu, l’alumnáu participó de forma activa nes distintes fases del procesu de producción musical nel Estudiu: grabación multipista, edición, mezcla y masterización, asina como na publicación del resultáu final. Nesti procesu identificáronse y experimentáronse los estremaos roles profesionales asociaos a la industria musical, favoreciendo una comprensión funcional y contestualizada de los conteníos curriculares que foron bien adaptaos a caún de los niveles de la Etapa d’Educación Primaria.
Pa too ello el Colexu Públicu Peña Tú cuntó col apoyu de tola Comunidá Educativa, families, alumnáu, Equipu Direutivu, profesoráu, AMPA y el propiu Ayuntamientu de Llanes al traviés de la Conceyalía Cultura y la Casa Cultura, collaborando activamente nesti apueste pola música de raigañu nel conceyu Llanes que sigue viva na reciella gracies a esta iniciativa.
