La NASA publicó un informe sobro la verdadera forma del planeta Tierra y terminó colo que creyimos per años: nun ye una esfera perfecta. Según l’axencia espacial estadounidense, la Tierra tien una forma xeoide y esibió un modelu 3D que lo demuestra, dempués de dellos años d’arrexuntar datos satelitales. https://www.nasa.gov/es/
Mientres sieglos, la imaxe mental de la Tierra foi abondo estable, una esfera azul, redonda, casi perfecta, suspendida nel espaciu. Esa idea apaez en llibros de testu, documentales, globos terráqueos y hasta na iconografía más popular de la ciencia.
Pero la NASA acaba de volver poner el focu sobro una verdá que la xeodesia conoz dende va décades; la Tierra nun ye una esfera llisa, sinón un planeta irregular que la so forma real ta condicionada pola gravedá.
La nueva visualización espublizada pola axencia espacial corrió como la pólvora porque, a güeyu, paez un planeta deformáu o con «forma de pataca». Sicasí, esa apariencia nun representa la superficie física real de la Tierra, sinón el xeoide, un modelu científicu qu’amuesa cómo sería la superficie del océanu si solo actuara la gravedá y nun intervinieren el vientu, les marees nin les corrientes. N’otres palabres, la NASA nun amosó una Tierra «rota», sinón una representación muncho más útil para entender cómo funciona’l planeta per dientro.
Qué ye’l xeoide. Yee una superficie equipotencial del campu gravitatorio terrestre. Dichu de forma senciella, ye la referencia qu’usaríamos para describir el nivel mediu del mar si l’agua tuviera dafechu en reposu y estendiérase ensin interrupciones per tol planeta. Nun se trata d’un caprichu visual nin d’una recreación artística, sinón d‘una ferramienta científico esencial pa la midida precisa d’altitúes y p’entender la variación de la gravedá sobro la superficie terrestre.
La clave ta en que la masa del planeta nun ta distribuyida de manera homoxénea. Hai zones con materiales más trupos, rexones onde l’interior terrestre concentra más masa y otres onde esa distribución ye distinta. Ye eso lo que provoca pequenes variaciones nel campu gravitatorio. Eses diferencies xeneren «llombes» y «valles» gravitatorios qu’el xeoide fai visibles. Por eso’l mapa paez esaxeráu, la NASA amplifica les irregularidaes nun factor de 10.000 por que puedan apreciase a güeyu.
La visualización más recién sofítase nel modelu de campu gravitatorio GOCO06s, un modelu global calculáu pol proyectu Gravity Observation Combination. Según la NASA, ellaborose a partir de más de mil millones d’observaciones recoyíes mientres 15 años por 19 satélites. Ente ellos les misiones GRACE de la NASA y GOCIE de la ESA. Esa combinación de datos dexa afinar de forma estraordinaria la llectura del campu gravitatorio terrestre.
Na representación espublizada pola NASA, el xeoide bazcuya ente unos +85 metros n’Islandia y unos -106 metros nel sur d’India. Nun significa qu’eses zones tean lliteralmente elevaes o fundíes d’esa manera, sinón que la gravedá ellí presenta diferencies medibles al respective de otres partes del planeta. Esa ye precisamente la razón pola que la imaxe espertó tanto interés: convierte en daqué visual un fenómenu que de normal resulta invisible.
La Tierra real. Convien dixebrar dos idees que de cutiu s’entemecen. Una cosa ye la forma xeométrica xeneral del planeta y otra, bien distinta, ye’l xeoide. La Tierra sigue describiéndose como un esferoide oblato, esto ye, un cuerpu casi esféricu, llixeramente esnacháu polos polos y enancháu nel ecuador por efectu de la rotación. El xeoide nun sustitúi a esa definición, sinón que la complementa dende’l puntu de vista gravitatoriu.
Por eso, cuando se viraliza una imaxe de la NASA amosando una Tierra «estraña», nun convien lleela como una corrección al dibuxu clásicu del planeta, sinón como una versión más técnica y más completa del so comportamientu físicu. La idea d’una esfera perfecta sirve pa simplificar, pero la ciencia precisa modelos más precisos pa midir, comparar y predicir.
