Publicado en Horru

El ‘Plan del Horru’ n’Asturies

Más d’un centenar d’horros y paneres van poder ser restauraos con ayudes autonómiques en 41 conceyos d’Asturies. El ‘Plan del Horru’ combina’l sofitu económicu a la restauración con otres midíes empobinaes a recuperar materiales tradicionales y facilitar nuevos usos compatibles cola protección patrimonial. Fonte

La Conseyería de Cultura, Política Llingüística y Deporte d’Asturies concedió 400.107 euros en subvenciones pa caltener, restaurar y rehabilitar 102 horros, paneres, cabazos y otros elementos d’interés etnográficu. Les ayudes, correspondientes a la convocatoria d’anguaño, van dexar recuperar construcciones tradicionales en 41 conceyos y van contribuyir a caltener parte esencial del patrimoniu cultural y del paisaxe rural.

La resolución inclúi actuaciones n’horros y paneres, cabazos del occidente, cabanes de teito de Somiedu y otros elementos de l’arquitectura popular, como fontes, payares y construcciones auxiliares. Les subvenciones tán destinaes a particulares y entidaes ensín ánimu d’arriquecimientu que s’ocupen de caltener estes construcciones.

Con estes subvenciones, el Gobiernu d’Asturies contribúi a sufragar el costu d’unes obres que, en munchos casos, riquen conocencies especializaes y l’emplegu de materiales y técniques tradicionales. Trátase de facilitar que les persones y entidaes propietaries puedan acometer los arreglos necesarios pa caltener les construcciones en bon estáu.

La resolución establez l’abonu íntegro de les ayudes concedíes y amplía los plazos pa facilitar les intervenciones. Asina, van poder executase hasta’l 15 d’ochobre del 2027 y les persones beneficiaries van tener un mes más, hasta’l 15 de payares del próximu añu, pa presentar la xustificación.

Caltener el patrimoniu rural. Esta llinia de subvenciones forma parte del ‘Plan del Horru’, la estratexa cola que’l Gobiernu d’Asturies trabaya pa caltener estes construcciones. El programa combina’l sofitu económicu a la restauración con otres midíes empobinaes a recuperar materiales tradicionales y facilitar nuevos usos compatibles cola protección patrimonial.

Autor:

Maestra de Llingua Asturiana Colexu Carmen Ruiz-Tilve - Uviéu