Publicado en Esposiciones, Fotografía

Esposición ‘Constelaciones fotográfiques’ n’Avilés

La esposición ‘Constelaciones fotográfiques’ axunta n’Avilés les obres de 38 artistes para reflexar el compromisu del Centru Nacional de Fotografía col espardimientu del patrimoniu artísticu del país. INFO / LNE

El Centru Nacional de Fotografía (CNF), centru de titularidá estatal del Ministeriu de Cultura, va presentar el próximu 2 d’ochobre nel Centru Niemeyer d’Avilés la esposición «Constelaciones fotográfiques. Pensar dende les imaxes», la primer amuesa realizada a partir de los fondos de la so colección.

La esposición, entamada pel Centru Nacional de Fotografía en collaboración col Centru Niemeyer, va constituyir la primer presentación pública de la colección construyida pol CNF dende la so creación por aciu una política d’alquisiciones empobinada a conformar un fondu representativu de la fotografía española.

«Les imaxes van convidar a afayar nueves llectures sobro’l pasáu y el presente, poniendo de relieve la diversidá de llinguaxes, enfoques y esmoliciones que traviesen la práctica fotográfica contemporanea»

Con 102 obres de 38 artistes, l’amuesa va dexar percorrer dalgunos de los principales nomes, llinguaxes y enclinos de la fotografía española contemporanea. Con esta amuesa, el Centru Nacional de Fotografía reafita’l so compromisu col caltenimientu, investigación y espardimientu del patrimoniu fotográficu español al traviés de la collaboración con distintes instituciones partíes por tol territoriu.

La muestra reunirá obras de todos los Premios Nacionales de Fotografía concedios hasta la fecha: Gabriel Cualladó (1994), Cristina García Rodero (1996), Joan Fontcuberta (1998), Alberto García-Alix (1999), Chema Madoz (2000), Joan Colom (2002), Carlos Pérez Siquier (2003), Ramón Masats (2004), Rafael Sanz Lobato (2004), Ouka Leele (2005), Pablo Pérez-Mínguez (2006), Manuel Vilariño (2007), Bleda y Rosa (2008), Humberto Rivas (2009), Gervasio Sánchez (2009), José Manuel Ballester (2010), Alberto Schommer (2013), Colita (2014), Toni Catany (2014), Javier Vallhonrat (2015), Juan Manuel Castro Prieto (2015), Isabel Muñoz (2016), Cristina de Middel (2017), Leopoldo Pomés (2018), Pilar Aymerich (2021), Cristóbal Hara (2022), Ana Teresa Ortega (2023), Carmela García (2024); así como de la Premiu Velázquez de Artes Plásticas Marisa González (2023) y dalgunes de les voces más destacaes de les nueves xeneraciones, como Yolanda del Amo, Paula Alce, Mar Sáez, Jorge Yeregui y Jon Cazenave, configurando un panorama plural de la creación fotográfica española.

Al traviés d’esti conxuntu d’obres, la esposición va proponer una reflexón sobro la fotografía como espaciu d’alcuentru ente distintes xeneraciones, sensibilidaes y formes de representación. Les imaxes van convidar a afayar nueves llectures sobro’l pasáu y el presente, poniendo de relieve la diversidá de llinguaxes, enfoques y esmoliciones que traviesen la práctica fotográfica contemporanea.

Tres la so presentación n’Avilés, l’amuesa va viaxar per distintes ciudaes, siendo la primera prevista Salamanca en 2027, hasta’l so asientu definitivu nel futuru Centru Nacional de Fotografía en Soria.

La esposición va tar acompañada de la publicación d’un llibru coles obres espuestes y dos testos al cargu de Mónica Carabias Álvaro, directora del CNF, y l’escritora Lara Moreno.

Autor:

Maestra de Llingua Asturiana Colexu Carmen Ruiz-Tilve - Uviéu