Publicado en Aniversariu, Cómic, Premios Princesa d´A.

Güei Mafalda cumple 62 años.

❤️‍🔥 Güei Mafalda cumple 62 años. Y mañana cúmplense seis años de la muerte de Quino. X /Premiu Princesa d’Asturies de Comunicación 2014. ©FPA  bit.ly/QuinoPremioPríncipeAsturias |🌈 Mafalda preguntaba pola paz, poles inxusticies, pol planeta, pola desigualdá y por un futuru que paecía siempres tar en manos de persones adultes demasiáu ocupaes para escuchase ente sí. Décades dempués, munches d’eses entrugues siguen abiertes.

La protagonista yera una neña de seis años perteneciente a una familia de clase media arxentina. Les sos entrugues sobro la política, la guerra, la educación, la economía, la familia y les relaciones sociales dexaron que l’humor de Quino encetara cuestiones qu’entepasaben la vida cotidiana de los sos personaxes.

En 1964, Mafalda apaecía per primer vegada n’una tira publicada por Quino, dando entamu a una de les creaciones más reconocíes de la historieta arxentina

Quino  foi un humorista gráficu y historietista arxentín nacionalizáu español. La so obra más conocida foi la tira risible Mafalda, publicada ente 1964 y 1973. Entendió daqué que munches vegaes el mundu adultu escaez: que les infancies nun tán a cencielles esperando crecer. Miren, piensen, dulden, enóxense, pregunten. Y munches vegaes ven con una claridá incómoda les contradicciones d’esi mundu que-yos tamos dexando.

Quiciabes lleer a Quino coles infancies sía tamién animanos a escuchales. A nun esplica-yos solamente cómo funciona’l mundu, sinón a preguntar al pie de elles por qué funciona asina y qué podemos faer pa tresformalo. Mafalda, qu’amás yera «amante de los Beatles, la democracia, los derechos de los neños y la paz»

Quino morrió’l 30 de setiembre de 2020, a los 88 años. Joaquín Salvador Lavado Tejón naciera en Mendoza en 1932, n’una familia d’ascendencia andaluza. Dende neñu recibió’l llamatu Quino para estremalo del so tíu Joaquín Tejón, pintor y diseñador qu’influyó na so vocación artística. Abandonó los estudios formales de Belles Artes y dedicóse al humor gráfico.

“Ye un honor bien grande recibir el Premiu Príncipe d’Asturies. Toi bien emocionáu y bien estimáu a España, a la que me siento bien xuníu pola sangre que me dieron los mios padres”.

Nel Campu San Francisco d’Uviéu

Autor:

Maestra de Llingua Asturiana Colexu Carmen Ruiz-Tilve - Uviéu