Guía de cómo educar a los neños en tiempos de IA: los espertos piden nun dexar usar la máquina enantes de los 12 años, fomentar les habilidaes llingüístiques y face-yos exámenes orales. Un grupu nacional d’especialistes, coordinaos pol catedráticu asturianu Antonio Bahamonde, publica un Llibru Blancu p’adaptar la educación y atayar l’influxu colonizador de mentes de la intelixencia artificial. LNE
Apunten estes cuatro palabres: razonar, parolar, crear y verificar. Eses son les cuatro habilidaes fundamentales que tien de tener un ser humanu adultu nesti sieglu XXI yá envolubráu por un texíu dixital de máquines pensantes que, acaldía más, reten la mesma pervivencia del pensamientu humanu tal que lu hemos conocíu hasta agora.
Razonar, parolar, crear y verificar son los cuatro puntales de la nueva educación que van haber de recibir los neños de güei pa nun vencer al mañana y que titulen el Llibru Blancu qu’acaba de publicar la fundación Avanza.
Nesti informe, coordináu por Antonio Bahamonde, catedráticu d’Intelixencia Artificial de la Universidá d’Uviéu, y con aportaciones de destacaos espertos, perfílense les llinies maestres de la reforma educativa necesaria pa formar adultos que nun acaben intelectualmente taramiaos por esa gran máquina dixital que proyecta l’espeyismu de tar en posesión de toles respuestes correctes.
Lo que dicimos ye qu’hai qu’enseñar a los neños y a les neñes a pensar, a parolar, a crear y a verificar. Formar la mente pa que sían capaces de gobernar la intelixencia artificial. Gobernar nun significa solamente dici-y a la IA: faime esto. Significa que, cuando te da una respuesta, hai que criticala, verificala, contrastala. De ponela en solfa, resume Bahamonde.
