Autora y testu: JESSICA TRUJILLO
Si na N108 baxamos colos belgues y la Real Compañía Asturiana de Mines de 1833 a la mina de carbón d’Arnao, Agora en San Juan de Nieva, almiramos la preciosa nube tóxica de l’Asturiana de Cinc anglosuiza.
Una nube suspendida sobro la ría, como si’l cielu acabara entrando na fábrica.
La blenda -del alemán blenden, «engañar» o «cegar- llega dende Australia y Canadá y alimenta una industria que, dende la ría d’Avilés, tresformase en cinc.
Nel camín dexa una memoria química que lleva décades pegada al territoriu compuesta de cinc, chombu, cobre, cadmiu, arsénicu y níquel, óxidu de cinc, cementu de cadmiu, concentraos de chombu y plata, cementu de cobre, soluciones con arsénicu y sulfatu de níquel.
Nomes que suenen a tabla periódica y que equí formen parte de lo cotidiano, d’un llugar avezáu a convivir con ellos.
Y ta el mercuriu que nun precisa presentación pa dar mieu, Gases residuales y dióxidu d’azufre que formen parte d’esi paisaxe suspendíu sobro les cabeces de trabayadores y vecinos.
Debaxo queden les balses, les borrafes, los metales pesaos acumulaos na redolada y les buelgues d’una industria que dio trabayu, riqueza ya identidá al territoriu, pero que tamién dexa xuna llarga solombra sobro él.
Y asina, dende la mina d’Arnao hasta San Juan de Nieva, siguimos el rastru del metal.
Primero, so tierra.
Dempués, nel cielu.
Y finalmente, pegáu al paisaxe.
En palabres de l’autora:
«(…) realidaes que conviven, como conviven nesta imaxe les chimenees, la nube, el metal y l’escorpión.
Esta obra naz precisamente d’esa cercanía. De mirar un llugar que forma parte de la mio vida y preguntase qué significa vivir so esi cielu. Reconocelo como propiu. Habitalo. Y nun dexar nunca de preguntase qué contien esa nube que vemos sobro les nueses cabeces.”
- Jessica Trujillo @jessicatrujilloblanco ye ilustradora autodidacta y trabayadora d’AZSA. Esta imaxe naz dende’l llugar de quien conoz les sos chimenees, los sos metales y esa nube que nun trai agua