El descubrimientu d’una edificación nueva amplía’l potencial científicu de la villa romana d’Andayón o de La Estaca/ RTPA / La conseyera Vanessa Gutiérrez visitó güei l’enclave, declaráu Bien d’Interés Cultural nel 2024, pa conocer los avances de la campaña arqueolóxica d’esti añu. El Principáu destinó más de 90.000 euros a la investigación de la villa romana dende la reanudación de les escavaciones nel 2018. #PatrimoniuAsturies #Arqueoloxía #CulturaAsturies
La conseyera de Cultura, Política Llingüística y Deporte, Vanessa Gutiérrez, visitó güei’l xacimientu romanu d’Andayón o de La Estaca en Les Regueres, pa conocer de primer mano los avances de la campaña arqueolóxica d’esti añu, que fixo posible localizar una construcción nueva dientro del complexu. L’afayu reforcia l’interés patrimonial y científicu d’esti enclave y abre víes nueves pa siguir afondando nel conocimientu de l’Asturies romana.
Declaráu Bien d’Interés Cultural (BIC) nel 2024, la villa romana d’Andayón o de La Estaca afianzóse nos últimos años como ún de los enclaves arqueolóxicos más relevantes del noroeste peninsular, tanto pola dimensión de les sos estructures como pola riqueza y singularidá de los materiales afayaos.
A lo llargo de la visita, Gutiérrez sorrayó’l compromisu del Principáu cola protección, la investigación y la difusión del patrimoniu cultural como ferramienta de conocencia, identidá y dinamización del mediu rural.
La campaña actual dexó identificar una edificación nueva dientro de la villa romana, la cuarta documentada hasta’l momentu. Los trabayos arqueolóxicos sacaron a la lluz parte d’ún de los sos murios, amás de cachos de enllucidos y restos de cubierta de teya (tegulae), materiales qu’apunten a la existencia d’una construcción hasta agora desconocida y abren llinies nueves d’investigación sobre la organización y evolución del asentamientu.
La planta del edificiu descubiertu gracies a los estudios con xeorradar supera los 50 metros cuadraos de superficie. Los arqueólogos entamaron a desenterrar los restos de les muries gracies a les que podemos asitiar na dómina romana l’edificiu polos sos materiales de construcción. El siguiente pasu sedrá afitar l’usu que tuvo la estancia.
Esti descubrimientu súmase a los avances tan importantes llograos en campañes anteriores, que fixeron posible documentar l’edificiu residencial principal, dellos espacios termales, dos mosaicos de gran valor y un repertoriu destacáu de pintures murales. L’amplitú del conxuntu, la riqueza de los sos elementos decorativos y la complexidá de les sos estructures sitúen güei la villa romana d’Andayón o de La Estaca ente los xacimientos romanos más singulares d’Asturies.
Dende la reanudación de les escavaciones nel 2018, el Principáu destinó más de 90.000 euros a campañes d’investigación arqueolóxica nesti enclave. Esta inversión sostenida dexó avanzar na conocencia d’una villa romana singular, que’l so edificiu residencial principal tien una planta estimada de 700 metros cuadraos, de los qu’hasta agora escaváronse alredor de 120. Los estudios xeofísicos realizaos nos últimos años fixeron posible localizar restos constructivos en parceles nueves, lo que confirma que’l xacimientu conserva tovía un potencial científicu escomanáu.
La conseyera destacó tamién el papel del equipu arqueolóxicu dirixíu por Juan Ramón Muñiz, amás de la implicación de l’Asociación d’Amigos de La Estaca, el Conceyu de Les Regueres y de los propietarios de les parceles, que la so collaboración ta resultando clave pal avance de les investigaciones.
El descubrimientu nuevu confirma que la villa romana d’Andayón o de La Estaca sigue aportando información decisiva pa comprender la presencia romana n’Asturies y reforcia’l potencial d’un xacimientu que tovía conserva un marxe d’investigación y una puesta en valor amplios.
En las imáxes, la conseyera de Cultura, Política Llingüística y Deporte, Vanessa Gutiérrez, col director xeneral de Patrimoniu Cultural, Pablo León, mientres la visita al yacimiento.
