- Alborecemos con nubosidá baxa, tando escampláu na cordelera y fastera más surocidental d’Asturies con unes temperatures que tan alrodiu de los 16ºC, rexistrándose nel puirtu Payares 17ºC.
- Güei vamos tener nubosidá estratificada cola posibilidá de dalgo d’orpín mui sele a primeres ya últimes hores con unes temperatures que van camudar poco con másimes que malpenes algamarán los 21-22ºC que mos van dexar un ambiente afayizu. Na cordelera y fastera surocidental van tener el cielu poco nuboso o escampláu como ye vezu nestes situaciones.
- Mañana domingu la estratada sedrá menos densa ya veremos el sol en munches más zones d’Asturies cola apertura de dellos claros o abancios al mediudía, amás les temperatures suben llixeramente, sicasí na costa l’aire nordés pue baxar dalgo la sensación térmica.
- El llunes vamos seguir cola apertura de claros o abancios nes hores centrales del día y les temperatures van subir otru poquitín más, mentantu’l martes les nubes baxes sedrán les protagonistes con un descensu de les temperatures másimes.
