Cola resaca emocional yá superada, los y les protagonistes na Delegación Asturiana cunten la so esperiencia nuna edición que tuvo novedaes bien reseñables: cumplíase’l 40 aniversariu de la primer vegada qu’Asturies participó como país; foi l’añu en que más bandes moces participaron; l’asturianada xubió con voz propia per vez primera a un escenariu; y tamién foi l’estrenu d’una banda creada na diáspora formando parte de la delegación asturiana. Musicasturiana.com
Too esto foi un reconocimientu al dinamismu, historia, evolución, vitalidá y futuru de la música’l país.Ferla Megía
El xoven artista multidisciplinar sierense, ganador del XVII Premiu Camaretá al Meyor Cantar en Llingua Asturiana, aportó por vez primera Lorient, un festival nel qu’enantes tampoco tuviera como públicu. Ellí llevó la so propuesta qu’amesta sones como la electrónica, pop, rap, folk y canción d’autor.
«Creo que’l públicu acoyó perbién les propuestes porque yeren diferentes a les ufiertes de los demás paises»
¿Cuála foi la to participación en Lorient?
Escenariu Le kleub el 1 d’agostu a les 21:00. Ye un escenariu como de sones nuevos.
¿Qué balance faes?
A mi prestóme la de dios. Como músicu tocar énte tantísima xente ye una pasada. La organizacion tratóme xenial tamién.
¿Cómo crees que s’acoyó la música asturiana en xeneral nesta edición?
La pena ye que nun pude ver más conciertos porque al dia siguiente colé. Inda asina se de bona mano que por exemplu Llevólu’l Sumiciu, que tocó los díes siguientes, reventólo tamién. Creo que’l públicu acoyó perbién les propuestes porque yeren diferentes a les ufiertes de los demás paises.
Grupu Etnográficu L’Oriente – Llacín
L’agrupación de música tradicional de l’oriente foi, xunto cola Banda Gaites El Gumial, una de les bandes que representó a la cultura de raigañu en Lorient. Yera la primera vez qu’aportaben al festival, anque dellos de los sos componentes yá participaren n’otres ocasiones con otres formaciones.
«Pensamos que l’acoyida que tuvimos h.oi bien guapa y que la imaxen que damos é la de h.uercia, enerxía, diversión y cercanía»
¿Cuála foi la vuestra participación en Lorient?
Tuvimos dellas y mui variadas actuaciones. Las trés principales h.oren: l’espectáculu Horizons Celtiques, que se representa nel estadiu del Mustoir y que h.ecimos cinco nueches nesta edición (sábadu, domingu, martes, miércoles y xueves) y dos d’ellas grabárense pa la televisión nacional francesa; otra de las principales h.oi la Grande Parade (primer domingu), el gran desfile nel que calculárense 95.000 personas viéndolu pela cai y 1’1 millones viéndolu en directo pela televisión; la tercera de las principales h.oi’l nuestru espectáculu propiu nel ciclu Musiques et Danses des Pays Celtes nel escenariu principal del festival, el Jean-Pierre Pichard, que h.oi’l miércoles. Amás d’estas trés actuaciones, tuvimos dellas más, como una ena Plaza de los Países Celtas el primer sábadu, una animación ena residencia d’ancianos que tuvo bien guapa y una actuación de desfile y escenariu ena ciudá de Guérande aprovechando la güelta nel bus p’Asturias.
¿Qué balance facéis?
El balance é más que positivu. Esti añu nos metimos más de 310 horas d’ensayu, tolos domingos del cursu menos trés exactamente, dende pela mañana a la nueche y eso vióse bien refleh.áu nos escenarios. Renovamos o actualizamos tou’l nuestru repertoriu específicamente pal festival y creo que h.oi un aciertu y que las actuaciones tuvieren acordie al esfuerzu. Amás, esti h.oi’l primer viaxe del grupu h.uera de la Península y tamién el primer festival intercélticu a esti nivel pa muncha xenti del grupu y ver cómo descubríen y disfrutaben de cosas que llevan acompañándomi toda la vida como las Fest Noz o los moules y demás pues h.oi una satisfacción mui grandi.
¿Cómo creéis que s’acoyó la música asturiana en xeneral nesta edición?
La xenti venía tou’l ratu a comentanos lo vistosu y coloridu de la indumentaria asturiana y llama-yos munchísimu l’atención la enerxía y complexidá de los bailles. Tamién vinieren inclusu a agradecenos l’ambiente que dábamos a pie de cai cola nuestra forma de ser tan divertíos y animaos como somos los asturianos. Colo cual pensamos que l’acoyida que tuvimos h.oi bien guapa y que la imaxen que damos é la de h.uercia, enerxía, diversión y cercanía.
Banda Gaites La Tarabica
Esta banda creada na Casa d’Asturies de Guadarrama (Madrid) estrenábase per partida doble: foi la primer vegada qu’una formación creada na diáspora asturiana actuaba nel festival y, polo tanto, yera la primer vez que La Tarabica diba a Lorinet, anque dalgunos miembros yá fueren al eventu como públicu.
«La música asturiana tien una personalidá mui marcada y, cuando se presenta nun marcu como Lorient, amuesa que tien capacidá pa conectar con públicos d’otros países y d’otres tradiciones»
¿Cuála foi la vuestra participación en Lorient?
La banda de gaites La Tarabica participó’l domingu 2 d’agostu nel desfile de la Grande Parade y, pela tarde, una pequeña representación participo nel Triomphe deas Sonneurs et deas Danseurs. El llunes 3 dimos un conciertu na Plaza de los Países Celtes, nel que nos acompaño al baille’l Grupu Etnográficu l’Oriente-Llacín. Al rematar el conciertu los componentes de La Tarabica sorprendieron al director de la banda, Diego Caballero, y al director de percusión, José Luis de la Cera, con unes plaques de reconocencia al trabayu y esfuerzu realizáu por llevar a la banda de Guadarrama hasta’l festival de Lorient.
¿Qué balance facéis?
El balance nun pue ser más positivu. Foi una esperiencia inolvidable, tanto dende’l puntu de vista musical como humanu. Detrás d’esta participación hubo munchu trabayu, ensayos y meses de preparación, y poder vivir finalmente Lorient dende dientro compensó con creces tolos esfuercios, amás de ser la primer banda asturiana de la diáspora que participa nel festival. Una gran responsabilidá y una gran alegría coles mesmes. Volvemos con muncha satisfacción, pero tamién con aprendizaxes y con ganes de siguir trabayando y medrando como banda. Frente a la conocía «maldición de Lorient», el grupu tornó pa Guadarrama mui reforzáu.
Tamién foi especialmente importante pa nós compartir estos díes col restu de la delegación asturiana y sentir que formábamos parte d’un proyectu común de promoción de la nuestra cultura. Tamos per agradecíos a Iñaki Santianes, delegáu del festival n’Asturies, a Vanesa Gutiérrez, Conseyera de Cultura, y a Olaya Romano, directora d’Emigración; ensin el so sofitu nun sería posible.
¿Cómo creéis que s’acoyó la música asturiana en xeneral nesta edición?
Creemos que tuvo una acoyida magnífica. La respuesta del públicu foi mui positiva, tanto nos escenarios como nos pasucáis, onde pudimos sentir de cerca l’interés y la sorpresa de munches persones. La música asturiana tien una personalidá mui marcada y, cuando se presenta nun marcu como Lorient, amuesa que tien capacidá pa conectar con públicos d’otros países y d’otres tradiciones. Foi mui guapo comprobar cómo la xente reconocía la gaita como parte d’un universu celta común, pero al mesmu tiempu descubría les peculiaridaes de la tradición asturiana. Nun hai que dexar de felicitar la revolucionaria puesta n’escena de los grupos asturianos El Gumial y el Grupu Etnográficu de L’Oriente-Llacín n’Horizontes Celtes que foi, ensin duda, lo meyor de la nueche celta. Y nun podemos dexar de llau al restu de grupos y artistes que participaron nos distintos conciertos, qu’animaron y fixeron a la xente cantar, saltar, baillar y aplaudir. Pa La Tarabica, participar en Lorient foi muncho más que dir tocar a un festival: foi llevar un cachín d’Asturies fuera de casa y representar, con humildá y muncho arguyu, la nuestra música y la nuestra tierra.
Entós
Yera la primer vegada que’l tríu de folk de cámara actúaba en Lorient; sicasí, los trés componentes sumen yá una docena de visites al festival formando parte de la Delegación Asturiana y actuando como solistes, en bandes de gaites, bandines, espectáculos, y otros formatos.
«Lorient ye’l llugar onde ameyores y garres idees, colo que la maleta suel venir p’Asturies cargada de ganes de facer coses»
¿Cuála foi la vuestra participación en Lorient?
Actuamos na Plaza de los Paises Celtes el 2 d’agostu, escenariu central y abiertu de toles delegaciones. Ye una plaza grande onde fuimos pasando cada artista del FIL, y el 3 d’agostu na Taverne Celte durante la Nueche d’Asturies (Soirée Asturies), qu’incluyó un formatu de cena-conciertu compartiendo actuación con Rellume y los ganadores del Premiu Obdulia Álvarez «La Busdonga» d’asturianada, que yeren los primeros cantantes de tonada asturiana en dir dientro de la Delegación Asturiana na so hestoria.
¿Qué balance facéis?
Foi una esperiencia perbona que te fai garrar puxu. El públicu de Lorient siempre ta volcao n’amosar el so respetu y nótase. Sumao al restu de cartelu, que faente subir el nivel pa ponese al nivel de la escena. D’otra banda, Lorient ye’l llugar onde ameyores y garres idees, colo que la maleta suel venir p’Asturies cargada de ganes de facer coses.
¿Cómo creéis que s’acoyó la música asturiana en xeneral nesta edición?
Con un nivel envidiable. Cumplíense 40 años de la llegada de la Delegación Asturiana a Lorient, y tuvo mui presente. Aprecióse como d’una pequeña delegación qu’abría camin fai 40 años y güei teniemos una representación con una delegación sólida y al altor de les meyores de les presentes, y eso viose en dalgunos detalles: entrugues y interés pola cultura asturiana ente folixes, participación d’artistes d’otres delegaciones colos asturianos, amistaes d’años que s’alcuentren ellí con ganes de siguir faciéndose crecer… viose qu’Asturies yá nun va d’oyente a Lorient y que tien bon puxu nel FIL.
Alicia Villanueva y Esteban Verdeja
Los ganadores del II Premiu Obdulia Álvarez «La Busdonga» d’Asturianada -Alicia Villanueva, Esteban Verdeja y Nestor Díaz- llevaben per vez primera la tonada asturiana a esti festival intercélticu; una participación de la qu’hai intención que tolos años haiga repeticiones p’amosar nesti eventu la forma de cantar más tradicional del país.
«Toi contenta de que por fin la tonada tea por vez primera de manera oficial; pero prestaríame que tuviera un poco mas de presencia y que se pudiera integrar coles demás formaciones»
¿Cuála foi la vuestra participación en Lorient?
Alicia Villanueva. Actuamos na presentación nel Ayuntamientu de Lorient, na cena asturiana na Taberna Celta y nel subprefecto notru actu de presentación colos demas países y xente importante.
¿Qué balance facéis?
Alicia Villanueva. Contenta de que por fin la tonada tea por vez primera de manera oficial; pero bueno, con coses qu’ameyorar como too. Prestaríame que tuviera un poco mas de presencia y que se pudiera integrar coles demás formaciones.
Esteban Verdeja. Un balance positivu ensin dulda.
¿Cómo creéis que s’acoyó la música asturiana en xeneral nesta edición?
Alicia Villanueva. L’acoyida pienso que foi mui bona; felicitónos xente d’unos cuantos países y pienso que lo valoraron bastante; hasta cantando tomando dalgo nun chigre yera impresionante la de xente que paraba a escuchar. Eso en cuantes a la tonada. En cuantes a les demás formaciones pienso que tamién l’acoyida foi bona y que’l trabayu que ficieron na nueche máxica foi impresionante.
Esteban Verdeja. La tonada acoyóse mui bien; foi dalgo que llamó l’atención porque esi estilu ellí nun lu hai. La voz a la gaita impactó cautivando a la xente que nos felicitaba dempués de los conciertos… y les sos cares yeren mui espresives; quedaron plasmaos. La música asturiana y Asturies en xeneral, la so música y la so xente acoyóse de la meyor manera. La xente foi mui agradable, respetuosa y agradecida.
Rellume
Les xovencísimes pandereteres Alba Suárez, Alba Estrada y Ana Feito, acompañaes de Pablo Rodríguez a la guitarra y baxu y Edu Llosa a les percusiones, estrenáronse nesti festival con esta formación, anque yá tienen participao con otres bandes n’anteriores ocasiones.
«La predisposición y el respetu qu’amuesa tol mundu ye daqué p’almirar y tamién dalgo a facenos mirar y decatanos que nun fai falta salir de casa pa valorar tol trabayu y esfuerzu qu’hai detrás de toles agrupaciones»
¿Cuála foi la vuestra participación en Lorient?
La verdá ye que, a nivel Rellume namás qu’esfrutamos el llunes 3 de la xubida al escenariu na Taverna Celta amenizando la Soirée des Asturies xunto a los nuesos collacios d’Entós, y los cantantes d’asturianada Alicia, Néstor y Esteban.
Sicasí queremos sorrayar qu’esta esperiencia vivímosla por partida doble porque tuvimos la gran suerte de poder formar parte de la delegación d’Asturies non namás como grupu musical sinón tamién como miembros del grupu baille, polo tanto, la vivencia esponencióse un grau más.
¿Qué balance facéis?
Mui mui positivu, gratificante y, sobre manera, ilusionante. El poder facer y formar parte de la representación d’Asturies nuna de les cites más importantes -por nun decir la más-, de la música y la cultura al llargor del añu foi daqué emocionante tanto de trabayar pa preparalo como de montalo nel directu.
¿Cómo creéis que s’acoyó la música asturiana en xeneral nesta edición?
Pues diríemos que colos brazos más qu’abiertos. La predisposición y el respetu qu’amuesa tol mundu ye daqué p’almirar y tamién dalgo a facenos mirar y decatanos que nun fai falta salir de casa pa valorar tol trabayu y esfuerzu qu’hai detrás de toles agrupaciones y tomalo como dalgo que nos faiga cambiar la perspectiva de la profesionalización de la nuesa pasión.
Rubén Alba
El gaiteru avilesín ye ún de los asturianos más veteranos en Lorient. Dende’l 2000 hasta aguaño tien participao en 14 ediciones, actuando en formatos como’l de gaiteru solista nel Troféu Macallan/MacCrimmon, con bandes de gaites, como portador de la Bandera d’Asturies nel Desfile de los Países Celtes, nel proyectu Erray, a dúu con Nel de Purnea o presentando los sos dos discos en solitario, Despertar y Secretos sin contar.
«Comprobar qu’un instrumentu con tanta historia como la gaita asturiana sigue teniendo esa capacidá d’emocionar y facer mover a milenta persones nun festival d’esti tamañu ye la meyor recompensa»
¿Cuála foi la to participación en Lorient?
Nesta edición centróse en dos momentos y espacios mui estremaos: el llunes 3 toqué na zona de la Villa de les Naciones Celtes (nel entornu de la villa), nun escenariu al aire llibre con un ambiente de cai mui vivu. El martes 4 ufrí un conciertu nel Palais des Congrès nun entornu más recoyíu y intimista, onde’l públicu pudo esfrutar de la música d’una manera más tranquila y concentrada.
¿Qué balance faes?
¡Positivu! Tar na cabeza de cartelu d’ún de los festivales más importantes del mundu siendo gaiteru y poder tar ellí enrriba col mio propiu nome, ye un placer absolutu. Alcuérdome perfectamente cuando yera pequeñu, allá pel añu 2000, y veía esos cartelos suañando col futuru. El mio gran retu, amás de tener la suerte de ganar el Troféu MacCrimmon, siempre foi formar la mio propia banda y ver el mio nome, Rubén Alba, nel cartelu de Lorient. Por fin esti añu cumplióse esi suañu. Toi contentu dafechu y naguo por qu’esto dea’l puxu necesariu pa volver con más discos, con más fuercia y con más música.
Amás, poder tar nel festival defendiendo’l mio proyectu como Rubén Alba, coles mios propies composiciones y comprobado una vegada más que la gaita asturiana sigue tando no más alto, ye un arguyu enorme. Soi y seré siempre un defensor de la gaita, porque toi convencíu de que ye la esencia mesma d’Asturies. Pa mí, llevar esti instrumentu al presente, al 2026, significa facer que dialogue col mundu ensin perder la so alma. Por eso siempre quixi arropala nel escenariu con una banda completa d’ocho músicos qu’entienden a la perfección la mio forma de componer, que respeten el raigañu tradicional y que al empar nútrense con naturalidá d’otres fontes como’l jazz, el rock, el pop, la música celta y el folk.
¿Cómo crees que s’acoyó la música asturiana en xeneral nesta edición?
Respecto a la repercusión y el balance de la nuestra actuación en Lorient, la verdá ye que la respuesta del públicu superó toles nuestres espectatives. Hubo una enerxía tremenda: el públicu vibró y amosó un respetu y un cariñu enorme pol nuestru instrumentu por escelencia: la gaita asturiana. Comprobar qu’un instrumentu con tanta historia sigue teniendo esa capacidá d’emocionar y facer mover a milenta persones nun festival d’esti tamañu ye la meyor recompensa.
Amás, el tratu que recibimos foi inmeyorable. Tanto la organización como l’equipu técnicu y la xente que s’averó a sentinos ficiéronnos sentir como en casa. Facer un viaxe llargu dende Asturies y ver que la gaita asturiana trespasa fronteres, emociona y vívese con esa intensidá al otru llau de la llende reafírmate nel camín y enllénate d’enerxía pa siguir creando. En resume: volvimos p’Asturies col corazón enllenu, con una acoyida maraviyosa y cola certeza de que la gaita asturiana tien un públicu con ganes de vibrar con ella ellí onde vaiga.
Iñaki Santianes
El que ye’l director de la Delegación Asturiana de Lorient dende l’añu 2011 participó dientro del espectáculu L’Irlande Symphonique xunto a una montonera d’artistes de tol Arcu Atlánticu.
«Asturies ye un país de plenu derechu en Lorient. L’éxitu de públicu foi importante y tolos músicos tuvieron la sensación de sentise importantes y acoyíos pol públicu»
¿Cuála foi la to participación en Lorient?
Esti añu tuvi la suerte de poder tocar nel Gran Teatru de Lorient el miércoles día 5 xunto a la orquesta y el coru del festival Intercélticu y a otros músicos del Arcu Atlánticu.
¿Qué balance faes ?
La mio actuación foi una esperiencia mui positiva. Poder tener la oportunidá de trabayar cola orquesta del festival y con grandes músicos ye un lluxu. Poder interpretar con gaita la obra The Pilgrim que yá s’interpretara notres ocasiones y sobre manera facelo dempués de sentila por vez primera nel añu 2000, que foi la primera vez que tuvi yo nel festival.
¿Cómo crees que s’acoyó la música asturiana en xeneral nesta edición?
Foi un gran añu. La delegación asturiana yá ta asentada nel festival dende fai tiempu y cada añu intentamos que tanto los grupos de folk como los grupos de baille o les bandes de gaites caltengan una presencia importante durante los diez días y tanto la música como la cultura asturiana tea presente permanentemente nel festival. El nivel de les agrupaciones que llevamos esti añu foi reconocíu tanto pola organización como pol públicu. Asturies ye un país de plenu derechu en Lorient y asina lo reconoz el públicu. Tanto nel espectáculu Horizons Celtiques onde la Banda Gaites El Gumial y el Grupu Etnográficu L’Oriente – Llacin, como nel kleub con Llevólu’l Sumiciu o Ferla Megía o na Plaza de los Países Celtes con Rubén Alba, Herbamora o Entós; na Taverna con Rellume y Verdeja, Villanueva y Díaz; nel Expo Celtic Art, nos conciertos del Interceltique Music Camp con Julio y Celia, l’éxitu de públicu foi importante y tolos músicos tuvieron la sensación de sentise importantes y acoyíos pol públicu.
Llevólu’l Sumiciu
El dúu d’electrónica de raigañu aportó a Lorient por vez tercera, tres de facelo enantes en 2022 y 2024, una amuesa de cómo esti estilu ta teniendo una perbona acoyida dientro’l festival.
«Esti añu paeciónos ver más énfasis en proyectos amestando tradición y electrónica, y creemos qu’eso ye dalgo qu’atrái más xente mozo y ye bueno pal futuru del festi»
¿Cuála foi la vuestra participación en Lorient?
Zarramos Le Kleub trés nueches; del martes 4 al xueves 6. Les dos primeres ficimos el nuestru set d’una hora. Pa la última pidiéronnos dos hores y ficimos un DJ set amestando otra música de raigañu. La única pena foi qu’esti añu nun hebo presupuestu pa pantalla LED, que ye una parte fundamental del nuestru set. Polo demás, un lluxu d’ambiente, organización y equipu técnicu.
¿Qué balance facéis?
Lorient siempre mola, y presta ver al festi medrar y adaptase a los tiempos. Disfrutamos un montón de ver dende bolos pequeñinos nos bares d’alredor a la superproducción de los horizontes celtes nel estadiu. Esti añu paeciónos ver más énfasis en proyectos amestando tradición y electrónica, y creemos qu’eso ye dalgo qu’atrái más xente mozo y ye bueno pal futuru del festi.
¿Cómo creéis que s’acoyó la música asturiana en xeneral nesta edición?
La verdá que namás podemos falar pol nuestru set y el bolu d’Herbamora na carpa bretona, pero dambos tuvieron una aceptación mui buena. Como anécdota, una de les nueches vimos un grupín cantando ‘Saldiguera’ en primer fila y pensamos, de xuru que son d’Asturies o Galicia. Al final del bolu, vinieron a falar con nós y resulta que yeren de Lorient. Conocíennos de la última vegada y nos cuntaben que se prepararen les lletres en casa pa cantales. ¡Foi dalgo perespecial pa nós!
Herbamora
Esta yera la tercera vegada que la formación de música tradicional renovada participaba en Lorient, tres d’estrenase en 2008 pa presentar el primer álbum y en 2013 col espectáculu Les Voces de la Tierra, nel que participaron del conciertu inaugural del festival nuna edición que tuvo dedicada a Asturies.
«Los medios técnicos, tanto de soníu como de lluces, son d’una calidá impresionante. Vese que nun escatimen en recursos y que’l personal que trabaya nello tien una profesionalidá inmensa. Too ello ayuda a que’l resultáu final tenga una calidá superior»
¿Cuála foi la vuestra participación en Lorient?
El xueves 6 d’agostu tocamos nel Espaciu de Bretaña, a les 22h, énte un públicu -nel qu’había unes 2500 persones- más mozu con muncha gana baillar y participar de la nuestra música. El vienres 7 d’agostu foi’l turnu de La Plaza de les Naciones Celtes, a les 20.30h, énte un públicu -unes 5.000 persones- más familiar que nos sintió con gran atención ya interés.
¿Qué balance facéis?
El xueves dimos, probablemente, el meyor conciertu de la nuestra vida. Cuando la comunión ente artistes y públicu se da d’una forma tan fuerte ye difícil describir les emociones qu’ellí sentimos toles presentes.
El vienres, ensin dulda, tamién foi un conciertu pal recuerdu. Tocar énte tanta xente con tanto interés ye difícil vivilo peles nuestres tierres. Amás, los medios técnicos, tanto de soníu como de lluces, son d’una calidá impresionante. Vese que nun escatimen en recursos y que’l personal que trabaya nello tien una profesionalidá inmensa. Too ello ayuda a que’l resultáu final tenga una calidá superior.
¿Cómo creéis que s’acoyó la música asturiana en xeneral nesta edición?
Polo que pudimos ver y sentir de los grupos colos que compartimos díes ellí: Llevólu’l Sumiciu, Grupu Etnográficu L’Orienti-Llacín, la Banda Gaites El Gumial, Rellume, Alicia Villanueva, Néstor Díaz González,… y la nuestra esperiencia propia, podemos dicir que toes tuvimos encantaes col nuestru pasu pel festival. Tocar en Bretaña, dir a An Orient, ye falar d’otra forma d’entender la música, otru nivel, tresportate a otra dimensión.
Banda Gaites El Gumial
La formación ayerana volvió al festival por segunda vez, tres d’estrenase en 2018.
«Destaca tamién un momentu especial nel que’l director de percusión de la Bagad de Lann Bihoué y otru componente tocaron una actuación completa con la nuesa banda. Venimos coles piles cargaes y motivaos pa seguir creciendo»
¿Cuála foi la vuestra participación en Lorient?
Participamos tol festival, nel espectáculu Horizons Celtiques, desfilando peles cais, actuando na Plaza los Países Celtes, na Gran Parade y nel Festival de Guerande.
¿Qué balance facéis?
Mui positivu. Muncha presencia asturiana nel festival, un arguyu poder representar a Asturies. Encantaos de compartir el viaxe colos nuesos collacios del Grupu Etonograficu L’Oriente-Llacín. Destaca tamién un momentu especial nel que’l director de percusión de la Bagad de Lann Bihoué y otru componente tocaron una actuación completa con la nuesa banda. Venimos coles piles cargaes y motivaos pa seguir creciendo.
¿Cómo creéis que s’acoyó la música asturiana en xeneral nesta edición?
Muchu públicu y munchu interés polo que faciemos.
Diego Lobo
El director de la Banda Gaites El Gumial d’Ayer y Saxum de Xixón participó na 55 edición de Lorient como responsable de la formación ayerana, como competidor nel Troféu MacCrimmon -que ganó en 2024 y nel que participó cinco vegaes- y como docente d’una masterclass de gaita.
«Los concursos siempre son buenos p’ameyorar el nivel y compartir momentos tan buenos colos nuestros compañeros asturianos y gallegos, fai que seya tovía más prestoso»
¿Qué balance faes?
Del MacCrimmon faigo un balance mui positivu. Los concursos siempre son buenos p’ameyorar el nivel y compartir momentos tan buenos colos nuestros compañeros asturianos y gallegos, fai que seya tovía más prestoso. Como mayestru, siempre inculco qu’hai que presentase a estos certámenes pa deprender de toos y ameyorar el nivel.
Per otru llau, yera la primera vez que participaba nuna masterclass dientro’l festival y prestóme muncho porque pudi enseñar el funcionamientu de les gaites asturianes a más d’un centenar d’asistentes. Tuvi’l placer de compartir actividá col mio collaciu José Manuel López «Josele», gran profesional al que’almiro, que foi l’encargáu de tresmitir el funcionamientu de la gaita galega.
