Mediu Rural presenta a Comiḷḷón, la nueva mascota d’Alimentos del Paraísu Natural inspirada nun urogallo. El so nome, qu’incorpora la ḷḷ o che vaqueira, significa comilón o famión. El personaxe va llevar un mandil de la marca calidable y una cesta de productos que se va afaer a les acciones de promoción nes que participe en feries, certames y eventos.
El nuevu personaxe ta inspiráu nun urogallo, una de les especies más representatives de la fauna asturiana, visti un mandil cola imaxe d’esta marca calidable y lleva una cesta con distintos productos acordes con cada actividá concreta.
El conteníu d’esta cesta va poder modificase y afaese a la temática de cada feria, presentación, certame o actividá promocional, lo que va dexar representar la variedá y riqueza del sector agroalimentario asturianu.
El nome escoyíu, Comiḷḷón, incorpora la ḷḷ o che vaqueira, unu de les traces más característiques de les variedaes llingüístiques del occidente asturianu, y significa comilón o famión. La denominación refuerza’l calter gastronómico y cercano de la mascota y la so vinculación colos productos calidable d’Asturies.
La creación de Comiḷḷón va dexar disponer d’una figura reconocible para acompañar les campañes y actividaes d’Alimentos del Paraísu Natural y averar la marca al conxuntu de la ciudadanía, especialmente al públicu infantil y familiar.
La mascota va participar en feries, mercaos, certames gastronómicos, presentaciones de productos y otres acciones de promoción desenvueltes dientro y fora de la comunidá. El so diseñu va dexar, amás, afaer los productos y elementos que lu acompañen a los distintos sectores o temátiques presentes en cada eventu.
Con esta iniciativa, el Gobiernu d’Asturies refuerza la promoción d’Alimentos del Paraísu Natural y de los valores venceyaos a la marca: la calidá, l’orixe, la tradición, la diversidá y la vinculación de los productos col territoriu.
